جىل باسىنان بەرى قازاقستاندىقتار تۇركيادان ءبىر جارىم مىڭ باسپانا ساتىپ العان

وتانداستارىمىز تۇركيانىڭ تۇرعىن ءۇي نارىعىن دامىتىپ ءجۇر.

ەلدىڭ ستاتيستيكا ينستيتۋتى، اسىرەسە، ماۋسىم ايىنداعى كورسەتكىش ەكى ەسە ارتقانىن ايتادى. ەسەسىنە وتانداستارىمىز ەل ىشىندەگى باسپاناعا سۇرانىستى ازايتقان. اي سايىن ساتىپ الۋ-ساتۋ كەلىسىمدەرىن راسىمدەۋ كورسەتكىشى تومەندەپ جاتىر، دەپ حابارلايدى Almaty-akshamy.kz 24.kz-كە سىلتەمە جاساپ.

كەي كومپانيالار ءتۇرلى اكسيالار ۇيىمداستىرىپ، جاعدايدى رەتتەۋگە الەك. ءبىراق نارىق ىرىق بەرەر ەمەس. وتكەن ايدا قۇرىلىس ماتەريالدارى تاعى قىمباتتاعانىن ايتادى. ازىرگە تەك كىرپىشتىڭ باعاسى وزگەرمەپتى.

قازاقستان قۇرىلىسشىلار قاۋىمداستىعى مەگاپوليستەردەگى احۋالعا شولۋ جاساعان.  مىسالى باس قالادا ەكونوم ساناتىنداعى ۇيلەر عانا باعا بويىنشا حالىققا قولايلى. ماماندار الماتىداعى ۇيلەردىڭ قىمباتتاعانىن اتاپ ءوتتى. مۇنداعى ءبىر شارشى مەتر 521 مىڭ تەڭگە شاماسىندا. ەڭ قولجەتىمدى باعا شىمكەنتتە تىركەلگەن. مۇندا پاتەردىڭ شارشى مەترى ورتاشا العاندا 354 مىڭ تەڭگە.

ءبىر قىزىعى، تۇركيادا دا قۇرىلىس ماتەريالدارى ەكى ەسە قىمباتتاعان. سوعان قاراماستان ماۋسىمدا ريەلتورلار شەتەلدىكتەرگە 81 پايىزعا كوپ باسپانا ساتقانىن ايتىپ وتىر.