كونستيتۋسيا جوباسى ادامنىڭ قولدانىستاعى قۇقىقتارى مەن بوستاندىقتارىن ساقتاپ قانا قويماي، ولاردىڭ اياسىن كەڭەيتىپ، ناقتى ىسكە اسۋىن جانە قورعالۋىن كۇشەيتەدى. بۇل تۋرالى كونستيتۋسيالىق رەفورما جونىندەگى كوميسسيا وتىرىسىندا قازاقستان رەسپۋبليكاسىنداعى بالا قۇقىقتارى جونىندەگى ۋاكىل دينارا زاكييەۆا ايتتى، - دەپ حابارلايدى Aqshamnews.kz.
«كونستيتۋسيا – مەملەكەتتىڭ قۇقىق جۇيەسىنىڭ ىرگەتاسى. ونىڭ نەگىزىندە قابىلداناتىن زاڭدار ءارقايسىمىزدىڭ جانە ءار بالانىڭ ءومىرى، بولاشاعى مەن ءال-اۋقاتىنا تىكەلەي بايلانىستى. كونستيتۋسيا جوباسى مازمۇندىق تۇرعىدان ءۇش ماڭىزدى تىرەككە نەگىزدەلەدى: بوستاندىقتار، قۇقىقتار جانە مىندەتتەر. ولاردىڭ بىرلىگى – كونستيتۋسيانىڭ ءمانى مەن تۇتاستىعىن قالىپتاستىرادى. بوستاندىق پەن قۇقىققا مەملەكەت تاراپىنان كەپىلدىك بەرىلەدى، ال ولاردىڭ جۇزەگە اسىرىلۋى وزگەلەردىڭ قۇقىقتارىن بۇزۋعا جول بەرمەيتىن، كونستيتۋسيالىق تارتىپكە نۇقسان كەلتىرمەيتىن جاۋاپتى مىنەز-قۇلىق جانە مىندەتتەردى ساقتاۋمەن قامتاماسىز ەتىلەدى»، – دەدى ول.
وسى تۇرعىدا زاكييەۆا ءبىرقاتار كونستيتۋسيالىق وزگەرىستەرگە نازار اۋدارىپ، نەگىزگى زاڭنىڭ باسىمدىعىن بەلگىلەپ بەردى.
«بىرىنشىدەن، ەكىنشى ءبولىمنىڭ اتاۋى وزگەرەدى. قازىرگى «ادام جانە ازامات» اتاۋىنىڭ ورنىنا «نەگىزگى قۇقىقتار، بوستاندىقتار مەن مىندەتتەر» دەگەن اتاۋ ۇسىنىلادى. بۇل وزگەرىس ادام مەن ازاماتتىڭ قۇقىقتارى مەن بوستاندىقتارىنىڭ، سونداي-اق مىندەتتەرىنىڭ باسىم ماڭىزعا يە ەكەنىن ايقىن كورسەتەدى»، – دەپ سانايدى قازاقستان رەسپۋبليكاسىنداعى بالا قۇقىقتارى جونىندەگى ۋاكىل.
اتالعان ءبولىم قۇرىلىمدىق تۇرعىدان 29 ءتۇرلى قۇقىقتى، بوستاندىقتى جانە مىندەتتى قامتيدى. كونستيتۋسيا جوباسىندا بەكىتىلەتىن بارلىق قۇقىقتار مەن بوستاندىقتار ولاردى ىسكە اسىرۋ شارتتارىمەن قاتار بەلگىلەنەدى.
تاعى ءبىر ماڭىزدىسى – كونستيتۋسيانىڭ جوباسىندا ادامنىڭ بارلىق جەكە قۇقىقتارىنىڭ قول سۇعىلماۋشىلىعى تىكەلەي بەكىتىلگەن.
«جاڭا رەداكسيادا قۇقىقتار مەن بوستاندىقتاردى جۇزەگە اسىرۋ باسقا ادامداردىڭ قۇقىقتارىن بۇزباۋعا جانە بوستاندىقتارىن شەكتەمەۋگە ءتيىس، كونستيتۋسيالىق قۇرىلىمنىڭ نەگىزدەرىنە، قوعامدىق تارتىپكە، ازاماتتاردىڭ دەنساۋلىعىنا جانە قوعامنىڭ ادامگەرشىلىك بولمىسىنا نۇقسان كەلتىرمەۋى ءتيىس ەكەنى ناقتى ايقىندالادى. وسى تۇرعىدان العاندا، كونستيتۋسيادا ادامنىڭ ار-نامىسى مەن قادىر-قاسيەتىنىڭ قول سۇعىلماۋشىلىعى جانە ولاردىڭ زاڭمەن قورعالاتىنى تۋرالى ەرەجەنىڭ ەرەكشە ماڭىزى بار. بۇل ادام ابىرويىن قورعاۋدى جاڭا دەڭگەيگە كوتەرمەك»، – دەدى ول.
سونىمەن قاتار، كوميسسيا وتىرىسىندا اتاپ وتىلگەندەي، كونستيتۋسياداعى حات الماسۋ، حابارلامالار مەن جەكە ءومىر قۇپياسىنىڭ قول سۇعىلماۋشىلىعى تۋرالى نورما بۇل قۇقىقتاردىڭ دا قورعالاتىنىن ايقىن كورسەتەدى.
«كونستيتۋسيا جوباسى قازىرگى زامانعى ۇردىستەردى ەسكەرە وتىرىپ، بۇل قاعيدالاردىڭ تەحنولوگيالىق سەرپىن جاعدايىندا دا تولىق قولدانىلاتىنىن ناقتى ايقىندايدى. ار-وجدان بوستاندىعى، ەڭبەك ەتۋ قۇقىعى، ءجۇرىپ-تۇرۋ ەركىندىگى، تۇرعىن ۇيگە، مەنشىككە، دەنساۋلىق ساقتاۋعا قاتىستى قۇقىقتار وزگەرىسسىز قالۋدا»، – دەپ قورىتىندىلادى ول ءوز ءسوزىن.