بۇل تۋرالى ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقايەۆ ايتتى.
«ەكونوميكانى سيفرلاندىرۋ ءىسىن جالعاستىرۋ جانە جاساندى ينتەللەكت تەحنولوگياسىن كەڭىنەن قولدانۋ اسا ماڭىزدى. ءبىز مەملەكەتتىك جانە قارجى قىزمەتتەرىن سيفرلاندىرۋ ىسىندە ايتارلىقتاي تابىسقا قول جەتكىزدىك. ماسەلەن، 2023 جىلدىڭ قورىتىندىسى بويىنشا قولما-قول اقشاسىز تولەم ۇلەسى 88 پايىزعا جەتتى. 2020 جىلعا دەيىن بۇل كورسەتكىش 50 پايىزدان اسپاعان ەدى. نەبارى ءتورت جىلدىڭ ىشىندە قازاقستاندا قارجى تەحنولوگياسى قارقىندى دامىدى. بۇل جەتىستىك ەكونوميكانىڭ باسقا سالالارىنا دا ۇلگى بولۋعا ءتيىس. ولاردى دا سيفرلاندىرۋ ءىسىن قولعا الاتىن كەز كەلدى. ءار مينيسترلىكتە ءوز سالاسىنا سيفرلىق وزگەرىس جاساۋ كارتاسى بولۋى قاجەت (سينگاپۋر تاجىريبەسى بويىنشا). مۇنداي كارتادا مينيسترلىكتەرگە قاراستى سالالارعا الداعى بەس جىل ىشىندە قانداي تەحنولوگيانىڭ جاپپاي ەنگىزىلەتىنى تۋرالى كوزقاراس تولىق كورىنىس تابۋعا ءتيىس»، - دەدى قاسىم-جومارت توقايەۆ.
پرەزيدەنت جاساندى ينتەللەكتىنى دامىتۋعا باسا نازار اۋدارۋ قاجەت ەكەنىن تاپسىردى.
«ساراپشىلاردىڭ باعالاۋىنشا، 2026 جىلعا قاراي الەمدەگى كاسىپورىنداردىڭ 80 پايىزدان استامى جاساندى ينتەللەكت قۇرالدارىن قولدانادى (بۇگىندە بۇل كورسەتكىش 5 پايىزعا دا جەتپەيدى). مەديسينا، ءبىلىم بەرۋ، كرەاتيۆتى يندۋستريا سالالارىندا جاھاندىق وزگەرىستەر بولىپ جاتىر. ءبىز بۇعان ءقازىردىڭ وزىندە كۋا بولىپ وتىرمىز. ناقتى ايتقاندا، جاساندى ينتەللەكت ارقىلى ءبىز ەكونوميكامىزدى قارقىندى تۇردە دامىتامىز، سونداي-اق ەلىمىزدە ەڭ ۇزدىك يننوۆاسيالاردى قولدانامىز. ول ءۇشىن جۇمىستى تۇبىرىنەن باستاۋىمىز كەرەك، ياعني ينستيتۋسيونالدىق ورتا قالىپتاستىرۋ كەرەك»، - دەدى مەملەكەت باسشىسى.