قازاق حالقى سان عاسىرلار بويى ءوزىنىڭ ەگەمەندىگى مەن تاۋەلسىزدىگى ءۇشىن كۇرەسىپ كەلدى. ءوزىنىڭ ەڭ جاقسى قاسيەتتەرىنىڭ: قاتەر تونگەن ساتتە بىرىگىپ، ۇيىمداسا ءبىلۋىنىڭ، سونداي-اق باسقا حالىقتارمەن بەيبىتشىلىك، كەلىسىم مەن تاتۋ كورشىلىك جاعدايىندا تۇرۋعا دەگەن ىنتى-ىقىلاسىنىڭ ارقاسىندا ول تاريح تاسقىنىنىڭ استىندا قالىپ قويماي، ءوزىنىڭ مەملەكەتتىگىن قالپىنا كەلتىرە الدى.
نۇرسۇلتان نازاربايەۆ.
1994 جىلعى 28-30 ناۋرىزداعى ماسكەۋ ساپارى اياسىندا نۇرسۇلتان نازاربايەۆ ماسكەۋ مەملەكەتتىك ۋنيۆەرسيتەتىنىڭ پروفەسسور-وقىتۋشى قۇرامى مەن ستۋدەنتتەرى الدىندا ءسوز سويلەپ، ءوزىنىڭ ايگىلى باستاماسى – ەۋرازيالىق ەكونوميكالىق وداق قۇرۋ يدەياسىن ۇسىندى.
1994. تاۋەلسىزدىك شەجىرەسى. جىلدىڭ باستى وقيعالارى
- ق ر جوعارعى كەڭەسىنىڭ سايلاۋى. تۇڭعىش كاسىبي پارلامەنت.
- نۇرسۇلتان نازاربايەۆتىڭ ەۋرازيالىق وداق يدەياسى.
- استانانى الماتىدان اقمولا قالاسىنا كوشىرۋ تۋرالى شەشىم.
- قازاق ەلىنىڭ مەملەكەتتىك وردەندەرى مەن مەدالدارى.
- ەكىنشى قازاق ازاماتى – تالعات مۇسابايەۆ عارىشقا ۇشتى.
1994 جىل مەملەكەتتىك قۇرىلىستىڭ العاشقى قادامدارى جاسالعان، توتاليتارلىق جۇيەنىڭ سارقىنشاقتارىنان ارىلۋ، نارىقتىق ەكونوميكانىڭ باستالعان كەزەڭى بولدى. قازاق ەلى دامۋدىڭ جاڭا مودەلىن – «قازاقستاندىق جولدىڭ» ىرگەتاسىن قالاۋعا تالپىندى. ارينە مۇندايدا، ەڭ الدىمەن، ۇتىمدى ساياسي جۇيەنى قالىپتاستىرىپ الماي، ەكونوميكالىق داعدارىستى ەڭسەرۋ دە، حالىقتىڭ ءال-اۋقاتىن جاقسارتۋ دا، ۇلتتىق قاۋىپسىزدىكتى قامتاماسىز ەتۋ دە مۇمكىن ەمەس ەدى. وسى جايتتەردى جان-جاقتى زەردەلەگەن ەل بيلىگى ەكونوميكانى ىرىقتاندىرۋ ارقىلى ماكروەكونوميكالىق تۇراقتىلىققا قول جەتكىزۋدى ماقسات ەتتى. جاڭا رەفورمالار مەن وزگەرىستەردى قۇقىقتىق تۇرعىدا نەگىزدەۋ ءۇشىن كاسىبي بىلىكتى پارلامەنت كەرەك بولدى.
1994 جىل قازاقستاندىق پارلامەنتاريزمنىڭ قالىپتاسۋىنداعى ايىرىقشا ماڭىزدى كەزەڭ رەتىندە ەستە قالدى. ەل تاريحىندا ساياسي پارتيالار مەن قوزعالىستار تۇڭعىش رەت بيلىكتىڭ ناقتى تۇتقالارىنا قول جەتكىزدى. كوپپارتيالىلىققا جول اشىلدى. دەموكراتيالىق سايلاۋ ناتيجەسىندە جوعارعى كەڭەستە قازاقستان حالىق بىرلىگى وداعى، قازاقستان حالىق كونگرەسى پارتياسى، سوسياليستىك پارتيا جانە كاسىپوداقتار فەدەراسياسى فراكسيالارى قۇرىلدى، سونداي-اق، نەگىزىنەن كاسىبي بەلگىسى بويىنشا 14 دەپۋتاتتىق توپ قالىپتاستى. ولار مەملەكەتتىك باعدارلامالاردى قالىپتاستىرۋعا جانە قابىلداۋعا قاتىسۋ مۇمكىندىگىن الدى. ون ءۇشىنشى سايلانعان قازاقستان رەسپۋبليكاسى جوعارى كەڭەسىنىڭ ءتوراعالىعىنا بەلگىلى قوعام جانە مەملەكەت قايراتكەرى، قازاقستاننىڭ حالىق جازۋشىسى ءابىش كەكىلبايەۆ سايلاندى.
ون ءۇشىنشى سايلانعان جوعارعى كەڭەس از ۋاقىت جۇمىس ىستەسە دە (1994 جىلعى ءساۋىر – 1995 جىلعى ناۋرىز) تاۋەلسىز قازاقستان پارلامەنتاريزمىنىڭ جۇيەسىن قالاعان قازاق ەلىنىڭ تۇڭعىش كاسىبي پارلامەنتى ەدى.
كسرو-نىڭ شيكىزات بازاسى بولىپ كەلگەن رەسپۋبليكا تاۋەلسىزدىگىن العاننان كەيىن حالىق شارۋاشىلىعىنىڭ «ءۇزىلىپ قالعان تامىرلارىنا قان جۇگىرتىپ، دەم بەرۋ»، قازاقستاندى تەك شيكىزات شىعاراتىن مەملەكەتتەن ءوندىرىسى دامىعان وركەنيەتتى ونەركاسىپتىك مەملەكەتكە اينالدىرۋ – كەزەك كۇتتىرمەس شارالاردى تالاپ ەتتى. كۇن تارتىبىندە جاس تاۋەلسىز ەلدىڭ باسقاعا تاۋەلدى بولماۋى ءۇشىن جۇيەلى ەكونوميكالىق رەفورمالاردى جەدەلدەتە جۇرگىزۋدى قولعا الۋ قاجەتتىگى تۇردى. باعانى ىرىقتاندىرۋ سالدارىنان پايدا بولعان گيپەرينفلياسيانى اۋىزدىقتاۋ مەن قارجىلىق تۇراقتىلىققا قول جەتكىزۋ ءالى بۋىنى قاتايماعان مەملەكەتتىڭ ەكونوميكالىق ساياساتىنىڭ نەگىزگى مىندەتى بولدى. سونىمەن بىرگە وداقتان ەنشىسىن العان جەرگىلىكتى كاسىپورىنداردى «ءتىرىلتۋ» ماقساتىندا ۇلتتىق ەكونوميكانى ينۆەستيسيالارمەن «قورەكتەندىرۋ» باعىتى دا پرەزيدەنتتىڭ العاشقى قادامدارىنىڭ قانشالىقتى كۇردەلى بولعاندىعىن كورسەتسە كەرەك. ءتىپتى وسى جىلدان باستاپ جەكەمەنشىك ينۆەستيسيالىق قورلارعا شەتەل كاپيتالىن قۇيۋعا دا رۇقسات ەتىلدى. «قازاقستان رەسپۋبليكاسىنىڭ مەملەكەتتىك ەكسپورت-يمپورت بانكى» قۇرىلدى. ۇلتتىق التىن-ۆاليۋتا رەزەرۆى 805،221 ملن. اقش دوللارىن قۇرادى. پارلامەنتتە ستراتەگيالىق جاعىنان ماڭىزى زور «مۇناي تۋرالى» زاڭ جوباسى قابىلداندى. الەمنىڭ يادرولىق دەرجاۆالارى بەيبىت دامۋ جولىن تاڭداعان قازاقستاننىڭ قادامىن جوعارى باعالاپ، ەل قاۋىپسىزدىگىنە كەپىلدەمە بەردى.
1994 جىل، 10-11 قاڭتار
پرەزيدەنت مەملەكەتتىك ساپارمەن وزبەكستان رەسپۋبليكاسىنا بارىپ، نۇكىس قالاسىندا وتكەن ورتا ازيا مەملەكەتتەرى باسشىلارىنىڭ ارال تەڭىزى باسسەينىنىڭ پروبلەمالارىنا ارنالعان كونفەرەنسياسىنا قاتىستى. وندا «ارال تەڭىزى الابىنىڭ باعدارلاماسى» قابىلداندى. باعدارلاما ارقىلى ارال تەڭىزى الابىنداعى قورشاعان ورتانىڭ جاعدايىن تۇراقتاندىرۋ، ارال ماڭىنىڭ ءبۇلىنگەن ەكولوگياسىن قالپىنا كەلتىرۋ، القاپتىڭ سۋ جانە جەر رەسۋرستارىن قالپىنا كەلتىرۋ جانە باسقا دا جۇمىستار كوزدەلدى.
1994 جىل، 28 قاڭتار-1 اقپان
مەملەكەت باسشىسى شۆەيساريانىڭ داۆوس قالاسىندا وتكەن دۇنيەجۇزىلىك ەكونوميكالىق فورۋمعا قاتىستى.
1994 جىل، 12 اقپان
قازاقستاندا ادام قۇقىعى جونىندەگى رەسپۋبليكالىق كوميسسيا قۇرىلدى. ول ادام قۇقىعى مەن بوستاندىعىنىڭ قۇرمەتتەلۋىن قامتاماسىز ەتۋ،ولاردىڭ ساقتالۋى جولىنداعى كەپىلدىكتى كۇشەيتۋ ماقساتىن كوزدەدى.
1994 جىل، 13-18 اقپان
نۇرسۇلتان نازاربايەۆ رەسمي ساپارمەن امەريكا قۇراما شتاتتارىندا بولدى. ەكىجاقتى كەلىسسوزدەر بارىسىندا ەكى ەلدىڭ مەملەكەت باسشىلارى دەموكراتيالىق ىقپالداستىق حارتياسىنا قول قويدى.قازاقستان يادرولىق قارۋى جوق ەل رەتىندە تانىلىپ، يادرولىق قارۋدى تاراتپاۋ تۋرالى شارتقا قول قويىلدى. وسى ساپار اياسىندا قازاق پرەزيدەنتى نيۋ-يوركتە بۇۇ باس حاتشىسى بۋتروس ب.گاليمەن جۇزدەستى.
1994 جىل، 25 اقپان
اقمولادا ، تىڭگەرلەر سارايىندا تىڭ جانە تىڭايعان جەرلەردى يگەرۋدىڭ 40 جىلدىعىنا ارنالعان سالتاناتتى جينالىس ءوتتى.
1994 جىل، 7 ناۋرىز
اتا زاڭ نەگىزىندە ءدال وسى كۇنى رەسپۋبليكانىڭ جوعارى زاڭ شىعارۋ ورگانىنىڭ العاشقى دەموكراتيالىق سايلاۋى وتكىزىلدى. اتى ايتىپ تۇرعانداي، بۇل سايلاۋ قازاقستاندا كوپپارتيالىلىقتىڭ قالىپتاسۋىنا ىقپال ەتتى. سايلاۋعا بارلىق سايلاۋشىلاردىڭ 73،84 پايىزى قاتىستى. ساياسي پارتيالار مەن قوزعالىستاردىڭ، ءبىر مانداتتى وكرۋگتەردەن سايلاۋعا تۇسكەن ۇمىتكەرلەردىڭ ۇگىت-ناسيحات جۇمىستارى شىنايى دەموكراتيالىلىقتىڭ كورىنىسىندەي بولعانىن ەرەكشە اتاپ وتكەن ءجون. 135 ءبىر مانداتتى وكرۋگتەر بويىنشا 910 ادام ۇسىنىلسا، تىركەۋ شارتتارىنا سايكەس 692 ادام ىرىكتەۋدەن ءوتتى، ءبىر دەپۋتاتتىق ماندات ءۇشىن 5 ۇمىتكەر كۇرەستى.
1994 جىل، 28-30 ناۋرىز
قازاقستان رەسپۋبليكاسىنىڭ پرەزيدەنتى رەسەي فەدەراسياسىنا رەسمي ساپارمەن باردى.ەكى ەل باسشىلارى نۇرسۇلتان نازاربايەۆ پەن بوريس ەلسين ەكونوميكالىق ىنتىماقتاستىق پەن ينتەگراسيانى تەرەڭدەتۋ تۋرالى شارتقا قول قويدى. سونداي-اق « بايقوڭىر» عارىش ايلاعى تۋرالى كەلىسىمگە كەلدى. رەسەي فەدەراسياسىندا تۇراتىن قازاقستان ازاماتتارىنىڭ، قازاقستان رەسپۋبليكاسىندا تۇراتىن رەسەيلىك ازاماتتاردىڭ ازاماتتىق جانە قۇقىقتىق مارتەبەسى جونىندە مەموراندۋمعا، اسكەري ىنتىماقتاستىق تۋرالى شارتقا قول قويىلدى. وسى ساپار اياسىندا نۇرسۇلتان نازاربايەۆ ماسكەۋ مەملەكەتتىك ۋنيۆەرسيتەتىنىڭ پروفەسسور-وقىتۋشى قۇرامى مەن ستۋدەنتتەرى الدىندا ءسوز سويلەپ، ءوزىنىڭ ايگىلى باستاماسى – ەۋرازيالىق ەكونوميكالىق وداق قۇرۋ يدەياسىن ۇسىندى.
1994 جىل، 6-8 ءساۋىر
نۇرسۇلتان نازاربايەۆ رەسمي ساپارمەن جاپونيادا بولىپ قايتتى.
1994 جىل، 12 ءساۋىر
پرەزيدەنت قازاقستانعا رەسمي ساپارمەن كەلگەن اۆستراليا گەنەرال-گۋبەرناتورى ۋ.حەيدەنمەن كەزدەستى.
1994 جىل، 15 ءساۋىر
تاۋەلسىز مەملەكەتتەر دوستاستىعىنا قاتىسۋشى مەملەكەتتەر اراسىندا ەگەمەندىگىن، تەرريتوريالىق تۇتاستىعىن جانە شەكارالارىنىڭ قول سۇعىلماۋشىلىعىن ساقتاۋ تۋرالى دەكلاراسيا قابىلداندى.
1994 جىل، 19 ءساۋىر
ون ءۇشىنشى شاقىرىلعان جوعارعى كەڭەستىڭ 1 سەسسياسى اشىلدى.
1994 جىل، 26 ءساۋىر
مەملەكەت باسشىسى قازاقستانعا رەسمي ساپارمەن كەلگەن جۇڭگو حالىق رەسپۋبليكاسى مەملەكەتتىك كەڭەسىنىڭ پرەمەرى لي پەنمەن كەزدەستى. كەزدەسۋ قورىتىندىسى بويىنشا قازاقستان-قىتاي شەكاراسى تۋرالى،جۇڭگو تاراپىنان قازاقستانعا مەملەكەتتىك نەسيە جانە گۋمانيتارلىق كومەك بەرۋ جونىندە،ەكى ەل اراسىنداعى حالىقارالىق جۇك جانە جولاۋشىلار تاسىمالىن دامىتۋ، تاعى باسقا دا كەلىسىمدەرگە قول قويىلدى.
1994 جىل، 28 ءساۋىر
بۇقارالىق اقپارات قۇرالدارىندا اقش پرەزيدەنتى بيلل كلينتوننىڭ نۇرسۇلتان نازاربايەۆقا جولداعان حاتى جاريالاندى. وندا كلينتون قازاقستاننىڭ يادرولىق قارۋلاردى تاراتپاۋ جونىندەگى شارتقا قوسىلۋى كۇللى الەم ءۇشىن ۇلگى بولاتىن قادام ەكەندىگىن،بۇل باعىتتا قازاقستان كوشباسشى مەملەكەت بولعاندىعىن ەرەكشە اتاپ وتكەن.
1994 جىل، 29 ءساۋىر
بىشكەكتە قازاقستان،وزبەكستان،قىرعىزستان مەملەكەتتەرى باسشىلارىنىڭ ءۇشجاقتى كەزدەسۋى ءوتتى.
1994 جىل، 10 مامىر
امەريكاداعى «سابين مەتالل كورپورەيشن» زاۋىتىندا ارنايى قازاقستان شيكىزاتىنان بالقىتىلعان تۇڭعىش قازاقستاندىق پلاتينا قۇيمالارى ( جالپى سالماعى 14 كيلوگرامم بولاتىن التى قۇيما) الىندى.
1994 جىل، 27 مامىر
قازاقستان ناتو-نىڭ «بەيبىتشىلىك ءۇشىن سەرىكتەستىك» باعدارلاماسىنا قوسىلعان 19-شى مەملەكەت اتاندى.
1994 جىل، 3 ماۋسىم
قازاقستان رەسپۋبليكاسىنىڭ ون ءۇشىنشى شاقىرىلعان جوعارعى كەڭەسىنىڭ ۇيلەستىرۋ كەڭەسىنە قاتىسقان مەملەكەت باسشىسى نۇرسۇلتان نازاربايەۆ ءوزىنىڭ ەۋرازيالىق وداقتى قۇرۋ تۋرالى جوباسىن جاريا ەتتى.
1994 جىل، 9 ماۋسىم
ون ءۇشىنشى شاقىرىلعان جوعارعى كەڭەستىڭ ءبىرىنشى سەسسياسىنىڭ پلەنارلىق ماجىلىسىنە قاتىسقان نۇرسۇلتان نازاربايەۆ قازاقستان حالقىنا جولداۋىن ارنادى.
1994 جىل ، 22 ماۋسىم
مەملەكەت باسشىسىنىڭ تاپسىرماسىمەن مينيسترلەر كابينەتىنىڭ ارنايى وتىرىسىندا ۇكىمەتتىڭ رەفورمالاردى تەرەڭدەتۋ جانە 1994-1995 جىلدارى ەكونوميكالىق داعدارىستان شىعۋ جونىندەگى ءىس-قيمىل باعدارلاماسىنىڭ جوباسى قارالدى.وندا مەملەكەتتىڭ ەكونوميكالىق دامۋىنا بايلانىستى جاڭاشا باعىتتار تالقىلاندى.
1994 جىل، 3 شىلدە
قازاق ەلىنىڭ تاعى ءبىر ازاماتى – تالعات مۇسابايەۆ عارىش ساپارىنا اتتاندى.
1994 جىل، 6 شىلدە
قازاقستان رەسپۋبليكاسى پارلامەنت سەسسياسىنىڭ جالپى وتىرىسىندا پرەزيدەنتتىڭ استانانى اقمولاعا كوشىرۋ تۋرالى ۇسىنىسى ماقۇلداندى. جوعارعى كەڭەس دەپۋتاتتارى استانانى الماتىدان اقمولا قالاسىنا كوشىرۋ جونىندە شەشىم قابىلدادى.
ءبىزدىڭ دايەكتەمە: ەل استاناسىن اۋىستىرۋ ،بىرىنشىدەن،قازاقستاندى گەوساياسي جاعىنان كۇشەيتۋدىڭ قاجەتتىگىنەن تۋىندادى. اقمولانىڭ گەوگرافيالىق جاعىنان ەلدىڭ ورتالىق بولىگىندە، ءىرى كولىك جولدارىنىڭ تۇيىسكەن جەرىندە، ماڭىزدى شارۋاشىلىق،استىقتى ايماقتارعا جاقىن ورنالاسۋى ەسكەرىلدى. ەكىنشىدەن، بۇل شەشىمنىڭ قابىلدانۋى قاۋىپسىزدىك ماسەلەسىنە تىكەلەي بايلانىستى ەدى: تاۋەلسىز مەملەكەتتىڭ استاناسى ورتالىقتا، مۇمكىندىگىنشە، شەكارادان جىراقتا ورنالاسۋى ءتيىس دەگەن تۇجىرىم جاسالدى.ۇشىنشىدەن، كۇن تارتىبىندە قازاقستاننىڭ ەكونوميكاسىن ساۋىقتىرۋ قاجەتتىگى تۇرعان ەدى،ال مۇنىڭ ءوزى ەل ەكونوميكاسىنىڭ تيىمدىلىگىن قامتاماسىز ەتۋدىڭ جولى دەپ ەسەپتەلدى. وبلىس ورتالىقتارىنىڭ دامۋىنا ايىرىقشا كوڭىل ءبولىندى. وسىنداي شارالاردىڭ ناتيجەسىندە ەكونوميكانىڭ قۇرىلىس ماتەريالدارى ءوندىرىسى، تۇرعىن ءۇي قۇرىلىسى، جول توسەنىشتەرى، ەنەرگەتيكا جانە ماشينا جاساۋ سياقتى سالالارى جوعارى قارقىنمەن دامي باستادى. جاڭا استانانى كوتەرۋ ەلىمىزدىڭ سولتۇستىگىندە بەلەڭ العان سلاۆياندىق قوزعالىستاردىڭ جەر داۋى حاقىندا بەلسەندىلىگى ارتقان توقسانىنشى جىلدارى ەرلىكپەن پارا-پار قيىن دا كۇردەلى شارۋا ەدى. بۇل باعدارلار تۇسىنە بىلگەن ادامعا قازاق ەلىنىڭ تاۋەلسىزدىگىنىڭ ىرگەتاسىن نىعايتۋداعى باتىل قادام بولعانى ءسوزسىز.
1994 جىل، 8 شىلدە
الماتىدا قازاقستان،وزبەكستان،قىرعىزستان مەملەكەتتەرى باسشىلارىنىڭ ءۇشجاقتى كەزدەسۋى ءوتىپ،بىرلەسكەن مالىمدەمەگە قول قويدى.
1994 جىل، 21 قازان
ماسكەۋدە تمد مەملەكەتتەرى باسشىلارىنىڭ كەزەكتى ءماجىلىسى بولىپ ءوتتى. وندا مەملەكەتارالىق ەكونوميكالىق كوميتەت قۇرۋ ماسەلەسى تالقىلاندى.
1994 جىل، 23 قازان
قازاق ەلىنىڭ جاڭا وردەندەرى مەن مەدالدارى العاش رەت تاپسىرىلعان كۇن.
1994 جىل، 4 قاراشا
مەملەكەت باسشىسى كوسموستاعى ۆاحتاسىن اياقتاپ،جەرگە ورالعان كوسموناۆتار ت.مۇسابايەۆتى ، يۋ.مالەنچەنكونى جانە ۋ.مەربولدتى قارسى الۋ راسىمىنە قاتىستى.
1994 جىل، 5 جەلتوقسان
بۋداپەشتتە ەۋروپاداعى قاۋىپسىزدىك پەن ىنتىماقتاستىق جونىندەگى كەڭەستىڭ جوعارى دارەجەلى كەزدەسۋى ءوتتى. وندا رەسەي، ۇلىبريتانيا جانە اقش باسشىلارى قازاقستان رەسپۋبليكاسىنىڭ قاۋىپسىزدىگىنە كەپىلدىك بەرۋ تۋرالى مەموراندۋمعا قول قويدى.مەموراندۋمعا قول قويۋشى مەملەكەتتەر وزدەرىنە قازاقستان رەسپۋبليكاسىنىڭ تەرريتوريالىق تۇتاستىعى مەن ساياسي تاۋەلسىزدىگىنە قارسى كۇش قولدانباۋعا، تاۋەلسىز جاس مەملەكەتتى ەكونوميكالىق جاعىنان قىسىم مەن ماجبۇرلەۋدەن باس تارتۋعا مىندەتتەمە الدى. بۇل مىندەتتەمەلەرگە كەيىننەن فرانسيا مەن جۇڭگو حالىق رەسپۋبليكاسى دا قوسىلىپ،كەپىلدىكتەرىن بەردى.
ستاتيستيكا:
1994 جىلى پرەزيدەنت رەسپۋبليكا وڭىرلەرىنە 14 رەت، شەت ەلدەرگە 22 رەت رەسمي ساپارعا شىقتى. ءتۇرلى رەسمي جيىندارعا قاتىسىپ، ءسوز سويلەگەن. ءبىر جىل ىشىندە بارلىعى 24 زاڭ قابىلدانىپ، 308 جارلىققا قول قويىلدى.
جىل ءتۇيىنى:
«بۇل جىل ءبىزدىڭ قازاقستاندىقتار ءۇشىن ەلدىگى مەن ەرلىگىن تانىتقان جىل بولدى. رەسپۋبليكا حالقى ينفلياسيانىڭ اششى ءدامىن تاتىپ،قيىن شاقتاردى باستان كەشىردى. وسىنداي كۇردەلى جاعدايعا قاراماستان ءبىزدىڭ ادامداردىڭ بويىندا تاماشا قاسيەتتەر قالىپتاسا باستادى:وتپەلى كەزەڭنىڭ بولماي قويمايتىن اۋىرتپالىقتارىنا تۇسىنىستىكپەن قارادى، ەڭ باستىسى – اركىمنىڭ كوكىرەگىنە بولاشاققا، قالاپ العان باعىتىمىزعا دەگەن سەنىم ۇيالادى».
(مەملەكەت باسشىسى نۇرسۇلتان نازاربايەۆتىڭ 1994 جىلعى 31 جەلتوقسانداعى
قازاقستان حالقىنا جاڭاجىلدىق ۇندەۋىنەن).
قازاقستان رەسپۋبليكاسىنىڭ
حالىقارالىق باستامالارىنان
1994 جىل، 22 ناۋرىز
ەڭ العاش رەت مەملەكەتتەردىڭ ەۋرازيالىق وداعىن قۇرۋ يدەياسى مالىمدەلگەن كۇن. بولاشاق مەملەكەتارالىق بىرلەستىكتى – «ەۋرازيالىق وداق» دەپ اتاۋ ۇسىنىلدى. ق ر پرەزيدەنتى ن.ءا. نازاربايەۆتىڭ «CHATHAM HOUSE» كورولدىك حالىقارالىق قاتىناستار ينستيتۋتىندا سويلەگەن ءسوزى (ۇلىبريتانيا).