الماتىدا بولاشاق ماماندارعا ارنالعان ۆوركشوپ ءوتتى
الماتى قالاسىنداعى «ارحيتەكتۋرا، ديزاين جانە ينجەنەريا» كوللەدجىندە JapJaryk كومپانياسىنىڭ ۇيىمداستىرۋىمەن «سۆەت پود كونترولەم» دەپ اتالاتىن ۆوركشوپ ءوتتى. بۇل ءىس-شارا ستۋدەنتتەرگە ەلەكتر قالقاندارى مەن جارىقتاندىرۋ جۇيەلەرىن قۇراستىرۋ بويىنشا پراكتيكالىق داعدىلاردى ۇيرەتۋگە باعىتتالدى. كوللەدج شاڭىراعىندا وتكەن شاراعا ستۋدەنتتەر، وقىتۋشىلار، جانە سالا ماماندارى قاتىستى.
ۆوركشوپتا JapJaryk كومپانياسىنىڭ ماماندارى زاماناۋي جارىقتاندىرۋ جانە ەلەكتروتەحنيكا سالاسىنداعى يننوۆاسيالىق شەشىمدەردى تانىستىرىپ، ستۋدەنتتەرگە تاجىريبەلىك ساباقتار وتكىزدى. ءوز كەزەگىندە ستۋدەنتتەر ەلەكتر سىزبالارىن وقۋ، مونتاجدىق جانە پرينسيپيالدى سحەمالاردى تالداۋ، كابەلدىك تراسسالاردى جۇرگىزۋ جانە تاراتۋشى ەلەكتر قالقاندارىن ورناتۋ بويىنشا داعدىلاردى مەڭگەردى. سونىمەن قاتار، جارىقتاندىرۋ جۇيەلەرىن ورناتۋ، باپتاۋ، اقاۋلاردى انىقتاۋ جانە جويۋ بويىنشا دا قاجەتتى تاجىريبە الىندى.
ءىس-شارا بارىسىندا الماتى قالاسىنىڭ «ارحيتەكتۋرا، ديزاين جانە ينجەنەريا» كوللەدجىنىڭ ديرەكتورى كامال جامانعوزوۆ كوللەدجدىڭ تەحنيكالىق ءبىلىم بەرۋ سالاسىنداعى ماڭىزدىلىعىن اتاپ ءوتتى. ونىڭ ايتۋىنشا، كوللەدج دۋالدى وقىتۋ جۇيەسىن ەنگىزۋ ارقىلى ستۋدەنتتەرگە تەوريامەن قاتار پراكتيكالىق داعدىلاردى ۇيرەتۋدى قامتاماسىز ەتەدى.
«ءبىز قازىرگى زامانعى ەڭبەك نارىعىنا قاجەتتى بىلىكتى مامانداردى دايارلايمىز. مەملەكەت باسشىسىنىڭ 2025 جىلدى جۇمىسشى كاسىپتەرى جىلى دەپ جاريالاۋى – وسى سالاعا دەگەن سۇرانىستىڭ ارتقانىن بىلدىرەدى. ءبىز بۇل باستامانى قولدايمىز جانە جۇزەگە اسىرۋعا دايىنبىز»، – دەدى كوللەدج ديرەكتورى.
بۇل ۆوركشوپ الماتىداعى تەحنيكالىق ءبىلىم مەن ءوندىرىستىڭ بايلانىسىن نىعايتۋعا باعىتتالعان. قاتىسۋشىلار تەوريالىق بىلىمدەرىن تاجىريبەمەن ۇشتاستىرىپ، بولاشاقتا نارىقتا سۇرانىسقا يە مامان بولۋعا ۇلكەن قادام جاسايدى. جۇمىسشى ماماندىقتارىنىڭ بەدەلىن كوتەرۋ ءۇشىن مۇنداي باستامالار الداعى ۋاقىتتا دا جالعاسادى دەيدى ۇيىمداستىرۋشىلار.
· تاقىرىپقا وراي
نۇرعالي مۋسيرمانكۋلوۆ، JapJaryk كومپانياسىنىڭ جەتەكشىسى:
ءبىلىم ساپاسىن كوتەرۋدى كوزدەدىك
قازاقستاندا ەلەكترومونتاج سالاسىنا باعىتتالعان كەشەندى وقۋ ورنى جوق. سوندىقتان ءبىز وسى سالانى دامىتۋ ءۇشىن جاڭا وقىتۋ جۇيەسىن قالىپتاستىرىپ، كوللەدجبەن بىرلەسىپ ارنايى كابينەت اشتىق. ستۋدەنتتەرگە تەوريانى ۆيزۋالدى تۇردە كورۋ جانە تاجىريبەدە ورىنداۋ مۇمكىندىگىن بەرۋ ارقىلى ءبىز ولاردىڭ شىنايى قۇرىلىس نىساندارىندا تاجىريبە الۋى ءۇشىن جاعداي جاسادىق.
ءاليحان ءابدىقالىق، ەلەكترومونتاج فاكۋلتەتىنىڭ 1-كۋرس ستۋدەنتى:
بىلىكتى مامان بولۋعا ۇلكەن مۇمكىندىك بەرەدى
مەن بالا كەزىمنەن نيكولا تەسلا سياقتى دانىشپانداردىڭ ءومىرى مەن ەڭبەكتەرىنە قىزىعىپ ءوستىم. بۇل سالاعا دەگەن قۇشتارلىعىم مەنى ەلەكتر ەنەرگەتيكاسى ماماندىعىن تاڭداۋعا جەتەلەدى. مەكتەپتى بىتىرگەننەن كەيىن وسى ماماندىققا دەگەن قىزىعۋشىلىعىم تەك ارتا ءتۇستى جانە مەن اتا-انامنىڭ قولداۋىمەن وسى جولدى تاڭداپ، ءبىلىم الۋعا قادام باستىم. كوللەدجدەگى وقىتۋشىلارىمىز وسى ماماندىقتىڭ تەرەڭدىگىن ءتۇسىندىرىپ، مەنىڭ قىزىعۋشىلىعىمدى ارتتىرىپ كەلەدى. ولاردىڭ سابىرلى ءارى تۇسىنىكتى ءتاسىلى مەنى وسى سالادا جەتىستىككە جەتۋگە دەگەن سەنىمىمدى نىعايتادى.