ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ يۋنەسكو-نىڭ جۋرناليستيكا جانە كوممۋنيكاسيا كافەدراسىنىڭ ۇيىمداستىرۋىمەن 2026 جىلدىڭ 26 قاڭتارىندا الماتى قالاسى «تاۋ-تۇران» دەمالىس بازاسىندا بۇۇ-نىڭ حالىقارالىق ءبىلىم بەرۋ كۇنىنە ورايلاستىرىلعان «تۇراقتى دامۋ مۇددەسىندەگى ءبىلىم: جاھاندىق جانە يننوۆاسيالىق پروسەستەر» اتتى VI حالىقارالىق جاھاندىق جۋرناليستيكا جانە شىعىستانۋ قىسقى مەكتەبىنىڭ اشىلۋ سالتاناتى ءوتتى.
حالىقارالىق شاراعا ۋنيۆەرسيتەت باسشىلىعى، فاكۋلتەتتىڭ پروفەسسور-وقىتۋشىلارى، شەتەلدىك عالىمدار، «Euronews TV» مەن BBC WORLD تەلەارناسىنىڭ بۇرىنعى جۋرناليستەرى، ەلىمىزدىڭ تانىمال «Alatau-Aqparat» مەديا حولدينگىنىڭ باس ديرەكتورى ەرجان قالىمباي ۇلى، Mega كوممۋنيكاسيالار جەلىسىنىڭ ديرەكتورى يمانالييەۆا مادينا، «HeadHunter»ء-دىڭ ورتالىق ازياداعى ماركەتينگ جانە PR مەنەدجەرى مۇحامەد باعدات ۇلى جانە وڭتۇستىك كورەيانىڭ سۋنگشين ۋنيۆەرسيتەتىنىڭ (سەۋل) ستۋدەنتتەرى قاتىستى.
شارانى جۋرناليستيكا فاكۋلتەتىنىڭ دەكانى قانات اۋەسباي اشىپ، قىسقى مەكتەپكە وسى جىلى العاش رەت شەتەلدىك ستۋدەنتتەردىڭ قاتىسىپ وتىرعانىن اتاپ ءوتتى.
باعدارلاما اياسىندا قازىرگى تاڭداعى جاھاندىق كوممۋنيكاسيانىڭ دامۋ باعىتتارى جانە وسى ورايدا ۇلتتىق ماسس-مەديانىڭ زاماناۋي سىن-قاتەرلەرگە توزىمدىلىگى تۋرالى ماسەلەلەر جان-جاقتى تالداندى.
BBC World تەلەارناسىنىڭ بۇرىنعى ءجۋرناليسى، مەديا جانە كوممۋنيكاسيا پروفەسسورى مۇحامماد شەراز الەمدىك دەڭگەيدەگى قوعامدىق جانە مەملەكەتتىك تەلەارنالاردىڭ ناسيحات جۇرگىزۋدەگى ادىس-تاسىلدەرى جانە اقپاراتتىق ساياساتتارى تۋرالى ناقتى دەرەكتەرگە تولى اڭگىمە ايتتى. ال، وڭتۇستىك كورەيا ەلىنىڭ قازاقستانداعى “KazKorean» گازەتىنىڭ ءتىلشىسى جانگ ۆونكي مىرزا شەتەلدىكتەردىڭ ءبىزدىڭ ەلىمىز تۋرالى العان اسەرلەرى جانە قانداي پىكىرلەردى ءجيى ايتاتىنى تۋرالى قىزىقتى پرەزەنتاسيا جاسادى.
“Alatau Aqparat” مەدياحولدينگىنىڭ باس ديرەكتورى ەرجان تولەك ءداستۇرلى ب ا ق پەن سايتتاردىڭ الەۋمەتتىك جەلىدەگى دامۋى، مەديا ماركەتينگ، تيراج ماسەلەلەرىن كوتەرىپ، قازىرگى اقپارات كەڭىستىگىندەگى جاڭاشىل كوزقاراستارىن ءبولىستى.
ال MEGA كوممۋنيكاسيالار جەلىسىنىڭ ديرەكتورى مادينا يمانالييەۆا پيار سالاسى ماماندارىنا قاجەتتى ادەت-داعدىلاردى مىسالدارمەن دالەلدەي كەلىپ، جۋرناليستيكا فاكۋلتەتى جاس ماماندارعا ناقتى نە بەرەدى جانە نە بەرمەيدى دەگەن ساۋالداردى العا تارتىپ، ءوزىنىڭ تاجىريبەسى نەگىزىندە جاۋاپ بەردى. سونىمەن قاتار شارا بارىسىندا “HeadHunter”ء-دىڭ ورتالىق ازياداعى ماركەتينگ جانە PR مەنەدجەرى مۇحامەد باعدات ۇلى قارجى، HR سالاسىنداعى PR مامانداردىڭ جۇمىس ىستەۋىندەگى ەرەكشەلىكتەر تۋرالى قۇندى ويلارىن ءبولىستى.
شىعىستانۋ فاكۋلتەتى، قيىر شىعىس كافەدراسىنىڭ مەڭگەرۋشىسى اقەركە اباعان ورتالىق ازيا تۋرالى كورەي حالقىنىڭ كوزقاراسى جانە قازاقستان مادەنيەتىنىڭ شەتەلدەردە ناسيحاتتالۋى تۋرالى ءوز ويىن ورتاعا سالدى. ال، يۋنەسكو-نىڭ جۋرناليستيكا جانە كوممۋنيكاسيا كافەدراسىنىڭ مەڭگەرۋشىسى ورىنتاي وشانوۆا تۇراقتى دامۋ ماقساتىندا جۋرناليستىك ءبىلىم بەرۋدىڭ جاڭا مىندەتتەرى مەن قوعام رولىندە اتقارار ماڭىزدى قىزمەتتەرى تۋرالى پىكىرىن ءبولىستى.
شارا بارىسىندا ەلىمىزدىڭ ءبىلىم نارىعىنا قاجەتتى PR جانە كوممۋنيكاسيا ماماندارىن دايارلاۋدىڭ وزەكتى ماسەلەلەرى تۋرالى فاكۋلتەتتىڭ جۇمىس بەرۋشىلەرى ءوز ۇسىنىستارىمەن ءبولىستى.
ءتورت تىلدە، ياعني قازاق، ورىس، اعىلشىن جانە كورەي تىلدەرىندە وتكەن قىسقى مەكتەپ قاتىسۋشىلارعا حالىقارالىق تاجىريبە الماسۋعا، كوپتىلدى ورتادا ەركىن پىكىر الماسۋعا مۇمكىندىك بەردى.
