الماتىدا قازاقستاننىڭ ءبىرىڭعاي ۋاقىت بەلدەۋىنە كوشۋ ماسەلەسىنە ارنالعان عىلىمي تالقىلاۋ ءوتتى. ساتبايەۆ ۋنيۆەرسيتەتىندە ۇيىمداستىرىلعان دوڭگەلەك ۇستەلدى ق ر عىلىم جانە جوعارى ءبىلىم مينيسترلىگى وتكىزدى، دەپ حابارلايدى aqshamnews.kz
ءىس-شاراعا 40-تان استام مامان قاتىستى. ولاردىڭ قاتارىندا ق ر عىلىم جانە جوعارى ءبىلىم مينيسترلىگى مەن ق ر دەنساۋلىق ساقتاۋ مينيسترلىگىنىڭ وكىلدەرى، جوعارى وقۋ ورىندارىنىڭ باسشىلارى، عىلىمي-زەرتتەۋ ينستيتۋتتارىنىڭ ماماندارى، مەديسينا جانە پسيحولوگيا سالاسىنداعى قازاقستاندىق ساراپشىلار، سونداي-اق قوعامدىق دەنساۋلىق ساقتاۋ جانە مەملەكەتتىك باسقارۋ سالاسىنداعى ماماندار بولدى.
قازاقستاندا ءبىرىڭعاي ۋاقىت بەلدەۋىنە كوشۋ ماسەلەسى قوعامدا ءتۇرلى پىكىرلەر تۋدىردى. ق ر عىلىم جانە جوعارى ءبىلىم ءمينيسترى ساياسات نۇربەك فورۋمنىڭ اشىلۋىندا بۇل تاقىرىپتى عىلىمي تۇرعىدان قاراستىرۋدىڭ ماڭىزدىلىعىن اتاپ ءوتتى:
«ءبىز بۇل ماسەلەنى ناقتى عىلىمي زەرتتەۋلەر تۇرعىسىنان تالقىلاۋ ءۇشىن جەتەكشى عالىمدارىمىزدى جينادىق. باستى نازارىمىز – ۇلت دەنساۋلىعى»، – دەدى ول.
ءمينيستردىڭ ايتۋىنشا، بۇل وزگەرىستىڭ ەرەسەكتەر مەن بالالار دەنساۋلىعىنا اسەرىن انىقتاۋ ءۇشىن عىلىمي قاۋىمداستىقتىڭ پىكىرىن تىڭداۋ ماڭىزدى.
كەڭەستىك كەزەڭنەن بەرى قازاقستاندا «دەكرەتتىك ۋاقىت» قولدانىلىپ كەلدى، ول تابيعي كۇن تارتىبىنەن اۋىتقۋدى تۋدىردى. بۇل جاعداي ادام اعزاسىنا كەرى اسەر ەتىپ، مەلاتونين گورمونىنىڭ جەتكىلىكسىز بولىنۋىنە سەبەپ بولدى. عالىمداردىڭ ايتۋىنشا، بۇل گورموننىڭ جەتىسپەۋشىلىگى سوزىلمالى اۋرۋلار مەن ونكولوگيالىق دەرتتەردىڭ كوبەيۋىنە ىقپال ەتتى.
شىعىس قازاقستان جانە پاۆلودار وبلىستارىنداعى تابيعي كۇن تارتىبىنە سايكەسسىزدىك دەنساۋلىق كورسەتكىشتەرىنە تەرىس اسەر ەتكەنى زەرتتەۋلەردە ايتىلدى. سونداي-اق، بۇرىنعى ۋاقىت بەلدەۋىندە مەكتەپ وقۋشىلارىنىڭ ۇيقىسى جەتىسپەۋشىلىككە ۇشىراعانى اتالىپ ءوتتى.
استروفيزيكتەر مەن گەوگرافتاردىڭ ايتۋىنشا، قازاقستان اۋماعىنىڭ باسىم بولىگى تابيعي تۇردە ءبىر ۋاقىتتىق بەلدەۋدە – UTC+5 ايماعىندا ورنالاسقان. بۇل حالىقتىڭ تابيعي بيولوگيالىق ىرعاقپەن ءومىر سۇرۋىنە قولايلى جاعداي جاسايدى.
فورۋمدا قازاقستاننىڭ ءبىرىڭعاي ۋاقىت بەلدەۋىنە كوشۋىنىڭ ەكونوميكالىق جانە الەۋمەتتىك تيىمدىلىگى دە تالقىلاندى. مىسالى، جۇڭگو مەن ەۋروپانىڭ 33 مەملەكەتى ءبىرىڭعاي ۋاقىت بەلدەۋىن قولدانادى جانە بۇل ەلدەردە ەكونوميكا تابىستى دامىپ وتىر.
دوڭگەلەك ۇستەل قورىتىندىسى بويىنشا ءبىرىڭعاي رەزوليۋسيا دايىندالىپ، مەملەكەتتىك ورگاندارعا ۇسىنىلماق. سونىمەن قاتار، بۇل قۇجات جۇرتشىلىققا دا جاريا ەتىلەدى.
قازاقستاننىڭ ءبىرىڭعاي ۋاقىت بەلدەۋىنە كوشۋى – ەلدىڭ الەۋمەتتىك، ەكونوميكالىق جانە دەنساۋلىق ساقتاۋ سالالارىندا وڭ وزگەرىستەر اكەلۋگە باعىتتالعان ماڭىزدى قادام. بۇل باستاما تابيعي ءومىر ىرعاعىنا ورالۋ ارقىلى قوعامنىڭ ءومىر ساپاسىن جاقسارتۋدى كوزدەيدى.