ەرجان قازىحان قازاقستان رەسپۋبليكاسى اتىنان امەريكا قۇراما شتاتتارىمەن ەكىجاقتى ىنتىماقتاستىق ماسەلەلەرى بويىنشا جۇرگىزىلەتىن كەلىسسوزدەرگە جەتەكشىلىك ەتەدى.
بۇل تۋرالى 2026 جىلعى 13 قاڭتاردا اقوردانىڭ باسپا ءسوز قىزمەتى مالىمدەدى.
"مەملەكەت باسشىسىنىڭ وكىمىمەن جەنيەۆا قالاسىنداعى (شۆەيساريا) بىرىككەن ۇلتتار ۇيىمىنىڭ بولىمشەسى مەن باسقا دا حالىقارالىق ۇيىمدار جانىنداعى قازاقستان رەسپۋبليكاسىنىڭ تۇراقتى وكىلى ەرجان حوزە ۇلى قازىحانعا امەريكا قۇراما شتاتتارىمەن ىنتىماقتاستىقتىڭ وزەكتى ماسەلەلەرى بويىنشا كەلىسسوزدەر پروسەسىندەگى قازاقستان رەسپۋبليكاسى پرەزيدەنتى وكىلىنىڭ مىندەتتەرى جۇكتەلدى"، – دەپ جازىلعان رەسمي اقپاراتتا.
ەرجان قازىحان 1964 جىلعى 21 تامىزدا الماتى قالاسىندا دۇنيەگە كەلگەن. لەنينگراد مەملەكەتتىك ۋنيۆەرسيتەتىن بىتىرگەن. تاريح عىلىمدارىنىڭ كانديداتى.
ديپلوماتيالىق قىزمەتىن 1989 جىلى قازاقستان رەسپۋبليكاسى سىرتقى ىستەر مينيسترلىگىنىڭ پروتوكولدىق-ساياسي بولىمىندە ەكىنشى حاتشى رەتىندە باستاعان. كەيىن وسى بولىمدە ءبىرىنشى حاتشى بولىپ قىزمەت اتقاردى. 1992 جىلى ءبولىم مەڭگەرۋشىسى، ق ر سىرتقى ىستەر مينيسترلىگىنىڭ مەملەكەتتىك پروتوكول باسقارماسى باستىعىنىڭ ورىنباسارى بولىپ تاعايىندالدى. 1995 جىلى قازاقستان رەسپۋبليكاسىنىڭ نيۋ-يورك قالاسىنداعى بىرىككەن ۇلتتار ۇيىمى جانىنداعى تۇراقتى وكىلدىگىنە ءبىرىنشى حاتشى رەتىندە جىبەرىلىپ، كەيىن كەڭەسشى قىزمەتىنە دەيىن كوتەرىلدى.
1999–2003 جىلدارى قازاقستان رەسپۋبليكاسى سىرتقى ىستەر مينيسترلىگىنىڭ كوپجاقتى ىنتىماقتاستىق دەپارتامەنتىنىڭ ديرەكتورى بولدى.
2003–2007 جىلدارى نيۋ-يورك قالاسىنداعى بىرىككەن ۇلتتار ۇيىمى جانىنداعى قازاقستان رەسپۋبليكاسىنىڭ تۇراقتى وكىلى، سونىمەن قاتار كۋباداعى قازاقستاننىڭ ەلشىسى قىزمەتىن قوسا اتقاردى.
2007–2008 جىلدارى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى بولدى.
2008 جىلى قازاقستان رەسپۋبليكاسى پرەزيدەنتىنىڭ كومەكشىسى قىزمەتىن اتقاردى.
2009–2011 جىلدارى اۆسترياداعى قازاقستان رەسپۋبليكاسىنىڭ ەلشىسى جانە ۆەنا قالاسىنداعى حالىقارالىق ۇيىمدار جانىنداعى تۇراقتى وكىل بولدى.
2011 جىلى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قىزمەتىن اتقاردى.
2011–2012 جىلدارى قازاقستان رەسپۋبليكاسىنىڭ سىرتقى ىستەر ءمينيسترى بولدى.
2012–2014 جىلدارى قازاقستان رەسپۋبليكاسى پرەزيدەنتىنىڭ كومەكشىسى قىزمەتىن اتقاردى.
2014–2017 جىلدارى ەرجان قازىحان ۇلىبريتانيا مەن سولتۇستىك يرلانديا بىرىككەن كورولدىگىندەگى قازاقستان رەسپۋبليكاسىنىڭ ەلشىسى، سونداي-اق قوسا اتقارۋ تارتىبىمەن يرلانديا مەن يسلاندياداعى ەلشى بولدى.
2017–2021 جىلدارى امەريكا قۇراما شتاتتارىنداعى قازاقستان رەسپۋبليكاسىنىڭ ەلشىسى قىزمەتىن اتقاردى.
2021–2022 جىلدارى قازاقستان رەسپۋبليكاسى پرەزيدەنتىنىڭ حالىقارالىق ىنتىماقتاستىق جونىندەگى ارنايى وكىلى بولدى.
2022–2023 جىلدارى قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى – پرەزيدەنتتىڭ حالىقارالىق ىنتىماقتاستىق جونىندەگى ارنايى وكىلى قىزمەتىن اتقاردى.
2023 جىلعى قىركۇيەكتەن باستاپ بىرىككەن ۇلتتار ۇيىمىنىڭ جەنيەۆاداعى بولىمشەسى مەن وزگە دە حالىقارالىق ۇيىمدار جانىنداعى قازاقستان رەسپۋبليكاسىنىڭ تۇراقتى وكىلى بولىپ تاعايىندالعانعا دەيىن پرەزيدەنتتىڭ حالىقارالىق ماسەلەلەر جونىندەگى كومەكشىسى بولدى.
ديپلوماتيالىق دارەجەسى – توتەنشە جانە وكىلەتتى ەلشى.