قازاقستاندا موتور مايىن تاڭبالاۋدى ەنگىزۋ اعىمداعى جىلدىڭ قىركۇيەك ايىندا جوسپارلانۋدا، دەپ حابارلايدى aqshamnews.kz
ۇكىمەتتىڭ باسپا ءسوز قىزمەتىنىڭ حابارلاۋىنشا، قىزىل جانە قارا ۋىلدىرىق، موتور مايلارى، انتيسەپتيكتەر مەن ۆەلوسيپەدتەرگە تاڭبالاۋدى ەنگىزۋ تۋرالى شەشىم قابىلدانعان. ەاەو ەلدەرى ءونىمنىڭ ءاربىر ءتۇرى بويىنشا تاڭبالاۋدى ەنگىزۋ مەرزىمى مەن ءتارتىبىن دەربەس بەلگىلەيدى.
"ەەك كەڭەسىنىڭ شەشىمىمەن ەاەو ءبىرىڭعاي كارانتيندىك فيتوسانيتاريالىق تالاپتارىنا تۇزەتۋلەر ەنگىزىلدى. ولار قۇلپىناي انتراكنوزىنىڭ قوزدىرعىشىنان (Colletotrichum acutatum) بوس ايماقتاردان جەتكىزىلەتىن الما اعاشتارى (Malus spp.) جانە المۇرتتىڭ (Pyrus spp.) كوشەتتەرىنىڭ، تامىر ساباقتارىنىڭ، قالەمشەلەرىنىڭ جانە جەمىستەرىنىڭ شىعۋ تەگى ءۇشىن ەرەكشە جاعدايلاردى بەلگىلەۋگە قاتىستى، دەپ حابارلادى ۇكىمەت.
مەديسينالىق بۇيىمداردىڭ قاۋىپسىزدىگىن، ساپاسى مەن تيىمدىلىگىن تىركەۋ جانە ساراپتاۋ قاعيدالارى دا جاڭارتىلدى. وزگەرىستەر 2024 جىلى كلينيكالىق-زەرتحانالىق زەرتتەۋلەر جۇرگىزۋ ەرەجەلەرىنىڭ جاڭا رەداكسياسىن قابىلداۋعا بايلانىستى. ولار ءونىمدى تىركەۋگە جانە ساراپتاۋعا كەتەتىن ۋاقىت پەن ەڭبەك شىعىندارىن ازايتادى.
"ونەركاسىپتىك روبوتوتەحنيكانى دامىتۋ ءۇشىن جاڭا ەۋرازيالىق تەحنولوگيالىق پلاتفورما قۇرۋ تۋرالى شەشىم قابىلداندى. ونىڭ ماقساتى – ەاەو ەلدەرىنىڭ ونەركاسىپتىك روبوتتاردى ازىرلەۋ جانە ەنگىزۋ، سونداي-اق پەرسپەكتيۆالى كوممەرسيالىق تەحنولوگيالاردى قالىپتاستىرۋ سالاسىنداعى يننوۆاسيالىق ىنتىماقتاستىعىن ىنتالاندىرۋ. پلاتفورما اياسىندا روبوتوتەحنيكانى دامىتۋدىڭ مەملەكەتارالىق باعدارلاماسى ازىرلەنەدى. بۇل جۇمىسقا قازاقستاننان قازاقستاندىق اۆتوماتتاندىرۋ جانە روبوتوتەحنيكا قاۋىمداستىعى قاتىسادى، دەپ قوستى ۆەدومستۆو.
سونداي-اق ەنەرگەتيكا، كولىك، سىرتقى ساۋدا، باسەكەلەستىك جانە تەحنيكالىق رەتتەۋ سالالارىنداعى ماسەلەلەر قارالدى.