عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم بەرۋ كوميتەتىنىڭ ءتوراعاسى گۇلجان جاراسوۆا 2026 جىلعى 6 قاڭتاردا ۇكىمەتتەگى بريفينگتە ءبىرىڭعاي ۇلتتىق تەستىلەۋ (ۇبت) فورماتىنا جوسپارلانىپ وتىرعان وزگەرىستەر تۋرالى ايتىپ بەردى، دەپ حابارلايدى aqshamnews.kz
ونىڭ ايتۋىنشا، قازىرگى ۋاقىتتا ۇبت-نى جەتىلدىرۋ ماسەلەسى پىسىقتالىپ جاتىر.
"ۇبت – جوعارى وقۋ ورىندارىنا تۇسۋگە ارنالعان ەمتيحانداردىڭ ءبىر ءتۇرى. قازىرگى كەزدە ۇبت ءبىلىمدى تەكسەرۋگە باعىتتالعان، سونىمەن قاتار ماتەماتيكا جانە اكادەميالىق ساۋاتتىلىق بويىنشا اناليتيكالىق ويلاۋ قابىلەتتەرى دە باعالانادى. قازىرگى زاماندا جاساندى ينتەللەكت پەن اقپاراتتىق تەحنولوگيالار كەڭىنەن ەنگىزىلىپ، ءبىلىم الۋ تاسىلدەرى وزگەرىپ جاتقاندىقتان، مەكتەپ پاندەرىنەن بولەك تالاپكەرلەر ءتۇرلى دەرەككوزدەردەن قوسىمشا اقپارات مەڭگەرەدى. وسى تۇرعىدا بىزگە تالاپكەرلەردىڭ قانداي اناليتيكالىق جانە سىني ويلاۋ داعدىلارىمەن كەلەتىنىن انىقتاۋ ماڭىزدى. وسى ماقساتتا ۇبت جەتىلدىرىلىپ جاتىر. الايدا بيىل ۇبت فورماتى وزگەرمەيدى"، – دەپ ناقتىلادى گۇلجان جاراسوۆا.
ونىڭ سوزىنشە، كەلەسى جىلدان باستاپ تەست تاپسىرمالارىنىڭ مازمۇنى تالاپكەرلەردىڭ داعدىلارىن انىقتاۋعا مۇمكىندىك بەرەتىن حالىقارالىق ستاندارتتالعان تەستتەرگە سايكەستەندىرىلەتىن بولادى.
"بۇل تالاپكەرلەرگە قوسىمشا جۇكتەمە تۇسىرمەيدى. كەرىسىنشە، ولاردىڭ ءبىلىمدى قانشالىقتى مەڭگەرگەنىن جانە العان ءبىلىمىن الداعى وقۋ ۇدەرىسىندە قالاي قولدانا الاتىنىن كورسەتۋگە مۇمكىندىك بەرەدى. سوندىقتان ەشقانداي قوسىمشا اۋىرتپالىق بولمايدى"، – دەپ سەندىردى سپيكەر.