قازاقستاندىقتار اراسىندا "دەپرەسسيا كەزىندە ەڭبەككە جارامسىزدىق پاراعىن راسىمدەۋگە بولا ما؟" دەگەن سۇراق تالقىلانىپ جاتىر. بۇل ماسەلەگە قاتىستى دەنساۋلىق ساقتاۋ مينيسترلىگى تۇسىنىكتەمە بەردى، دەپ حابارلايدى Aqshamnews.kz ءتىلشىسى.
دەنساۋمين جاۋابى
مينيسترلىك وكىلدەرى ەڭ الدىمەن «دەپرەسسيا» دياگنوزىن پسيحياتر عانا قوياتىنىن ەسكە سالدى. ال باستاپقى بەلگىلەردى جالپى پراكتيكا دارىگەرى نەمەسە پسيحولوگ انىقتاۋى مۇمكىن.
ۆەدومستۆونىڭ مالىمەتىنشە، ەگەر دارىگەر پاسيەنتتىڭ جاعدايى ۋاقىتشا جۇمىسقا قابىلەتتىلىگىن شەكتەيدى دەپ ەسەپتەسە، جەڭىل دارەجەدەگى دەپرەسسيا كەزىندە ەڭبەككە جارامسىزدىق پاراعى اشىلۋى مۇمكىن.
ال ورتا جانە اۋىر دارەجەلى دەپرەسسيا كەزىندە ناۋقاس ستاسيونارلىق ەم الۋى ءتيىس، بۇل – مينيسترلىك ستاندارتتارىندا كورسەتىلگەن تالاپ.
دەپرەسسيانى قالاي انىقتايدى؟
بۇدان بۇرىن پسيحياتر نابي ەسيموۆ دەپرەسسيا دياگنوزىن قويۋ ءۇشىن ءۇش نەگىزگى كريتەريي بار ەكەنىن تۇسىندىرگەن:
-
كوڭىل-كۇيدىڭ ەكى اپتادان كەم ەمەس ۋاقىت بويى تۇراقتى تومەن بولۋى؛
-
ويلاۋ بەلسەندىلىگىنىڭ تومەندەۋى – زەيىننىڭ ناشارلاۋى، قاراپايىم ەسەپتەۋلەردى قيىن ورىنداۋ؛
-
قوزعالىس بەلسەندىلىگىنىڭ تومەندەۋى – جۇمىسقا بارۋعا قينالۋ، توسەكتەن تۇرۋعا قۇلىقسىزدىق.
مينيسترلىك دەرەگى بويىنشا، دەپرەسسيا – دارىگەر باقىلاۋىن قاجەت ەتەتىن مەديسينالىق جاعداي، ال ەڭبەككە جارامسىزدىق پاراعى ناقتى كلينيكالىق جاعدايعا بايلانىستى بەرىلەدى.