سەمەيدە 19 جاستاعى تۇرعىنى الاياقتىق سحەماعا تارتىلعان. ءقازىر پوليسيا ونىڭ ءوز شوتىن قىلمىستىق ماقساتتا پايدالانىلعانىن بىلگەن-بىلمەگەنىن انىقتاپ جاتىر، - دەپ حابارلايدى aqshamnews.kz اباي وبلىستىق پوليسيا دەپارتامەنتىنە سىلتەمە جاساپ.
ۆەدومستۆونىڭ مالىمەتىنشە، 2025 جىلعى 15 جەلتوقساندا سەمەي قالالىق پوليسيا بولىمىنە استانادان بانك شوتىن تانىمايتىن ادامدارعا بەرگەنى ءۇشىن ماتەريال جولدانعان. زارداپ شەگۋشى – ەلوردا تۇرعىنىنا كەلتىرىلگەن جالپى شىعىن كولەمى 9 ملن تەڭگە بولعان.
تەرگەۋ بارىسىندا الاياقتىق جولمەن جىمقىرىلعان قاراجات ءۇشىنشى تۇلعانىڭ ەسەپشوتىنا اۋدارىلعانى انىقتالعان. ونىڭ ىشىندە 400 مىڭ تەڭگە سەمەيدىڭ 19 جاستاعى تۇرعىنىنىڭ اتىنا راسىمدەلگەن شوتقا تۇسكەن.
جىگىتتىڭ ايتۋىنشا، قازاندا وعان ينتەرنەت ارقىلى تابىس تابۋ ۇسىنىلعان. ونلاين-پلاتفورماعا تىركەلىپ، مەسسەندجەر ارقىلى بايلانىسقان بەلگىسىز ادامدار «جۇمىس» رەتىندە ونىڭ جەكە دەرەكتەرىن سۇراعان. ناتيجەسىندە، ولار جىگىتتىڭ ەسەپشوتىن قىلمىستىق جولمەن الىنعان اقشانى قابىلداۋ ءۇشىن پايدالانعان.
ءقازىر پوليسيا جىگىتتىڭ الاياقتىق سحەماعا ادەيى قاتىسقان-قاتىسپاعانىن انىقتاپ جاتىر. اباي وبلىستىق پوليسيا دەپارتامەنتى بانك كارتاسىن، شوت دەرەكتەرىن، قوسىمشالارعا قولجەتىمدىلىكتى نەمەسە جەكە مالىمەتتەردى بوگدە ادامدارعا بەرۋ – زاڭسىز ارەكەت ەكەنىن ەسكەرتتى. مۇنداي تۇلعالار الاياقتاردىڭ اقشاسىن وتكىزۋشى دروپپەر رەتىندە تانىلىپ، زاڭ الدىندا جاۋاپكەرشىلىككە تارتىلادى.