ەڭبەك كۇنى مەن «جۇمىسشى ماماندىقتار جىلىنا» وراي الماتى قالاسىنىڭ ەڭبەك موبيلدىلىگى ورتالىعى جالپىقالالىق بوس جۇمىس ورىندارى جارمەڭكەسىن وتكىزدى.
ءىس-شارا اربات الاڭىندا مەرەكەلىك اتموسفەرادا ءوتىپ، ونداعان ءىرى كومپانيانى، مەملەكەتتىك ۇيىمداردى، كاسىپورىنداردى جانە جۇمىسسىز ازاماتتاردى بىرىكتىردى. جۇمىس بەرۋشىلەر مەن ۇمىتكەرلەر اراسىندا تىكەلەي سۇحباتتاسۋ بولىپ، بوس جۇمىس ورىندارى تۋرالى وزەكتى اقپارات الۋعا مۇمكىندىك بەرىلدى.
الماتى – ەلدەگى ەڭ قارقىندى دامىپ كەلە جاتقان ءارى جاستار كوپ شوعىرلانعان قالالاردىڭ ءبىرى. ستاتيستيكاعا سايكەس، مۇندا 700 مىڭنان استام جاس ازامات تۇرادى، ولاردىڭ شامامەن، 400 مىڭى – 14 پەن 29 جاس ارالىعىندا. سولاردىڭ ىشىندە 12،5 مىڭنان استامى جۇمىسسىز بولسا، NEET ساناتىنداعى جاستاردىڭ سانى – 40 مىڭعا جۋىق. وسىعان بايلانىستى ۇمىتكەرلەرگە 300-دەن استام بوس جۇمىس ورنى ۇسىنىلىپ، ءتۇرلى سالالار بويىنشا 2000- نان اسا قىزمەت ورنى قامتىلدى. ولاردىڭ ىشىندە ءوندىرىس، ونەركاسىپ، قۇرىلىس، كولىك پەن لوگيستيكا، ساۋدا جانە قىزمەت كورسەتۋ، دەنساۋلىق ساقتاۋ، ءبىلىم بەرۋ، ەنەرگەتيكا، اقپاراتتىق تەحنولوگيالار، مادەنيەت جانە قوعامدىق تاماقتانۋ سالالارى بار.
– ءبىز «ەفكو» ءىرى وندىرىستىك كومپانياسىنا قوعاممەن بايلانىس جونىندەگى جانە ساتۋ جونىندەگى مەنەدجەرلەردى، نارىقتى تالداۋ ءبولىمىنىڭ مامانىن، وپەراتورلاردى، حيميالىق تالداۋ زەرتحاناشىلارى جانە جۇك تيەۋشىلەردى جۇمىسقا شاقىرامىز، – دەپ اتاپ ءوتتى پەرسونالدى ىرىكتەۋ جونىندەگى مەنەدجەر كارينا پلوتنيكوۆا.
قازاقستاندا بوتەلكەدەگى سۋ مەن سۋسىندار وندىرۋگە ماماندانعان باسقا كومپانياعا ورتا بىلىممەن «ەكسپەديتور» بولىپ جۇمىسقا تۇرۋعا بولادى. تەك قانا «ۆ»، «س» ساناتىنداعى كولىك قۇرالدارىن باسقارۋ كۋالىگىنىڭ بولۋى، جۇرگىزۋشى ماماندىعى بويىنشا كەمىندە ءبىر جىلدىق ەڭبەك ءوتىلى، جەرگىلىكتى جەردى جاقسى ءبىلۋ جانە قالانى مەڭگەرۋ قاجەت. سونىمەن قاتار، جيىن بارىسىندا قولدان جاسالعان بۇيىمدار جارمەڭكەسى دە وتكىزىلدى. وندا كادەسىي قوراپشالارى، گيپستەن جاسالعان بۇيىمدار، تاقيا، شامدار جانە تاعى باسقا كوپتەگەن ءونىم ساتىلدى.