رەسەي فەدەراسياسىندا ۇقشۇ بىتىمگەرشىلىك كۇشتەرى اراسىندا «مىزعىماس باۋىرلاستىق-2021» وقۋ-جاتتىعۋىنىڭ سالتاناتتى اشىلۋ ءراسىمى ءوتتى، دەپ حابارلايدى almaty-akshamy.kz ق ر قم باسپا ءسوز قىزمەتىنە سىلتەمە جاساپ.
اسكەري مانيەۆرلەرگە ارمەنيا، بەلارۋس، قازاقستان، قىرعىزستان، رەسەي جانە تاجىكستاننىڭ بىتىمگەرشىلىك بولىمشەلەرى قاتىسادى. ولاردىڭ نەگىزگى ماقساتى – بەيبىتشىلىكتى قولداۋ جونىندەگى وپەراسيالاردى جۇرگىزۋ كەزىندە ۇقشۇ ۇجىمدىق بىتىمگەرشىلىك كۇشتەرىنىڭ قۇرامىنا كىرەتىن اسكەري بولىمدەر مەن بولىمشەلەردىڭ ۇيلەسىمدىلىگىن ارتتىرۋ.
بىرىككەن اسكەري كونتينگەنت بەيبىتشىلىكتى قولداۋ جونىندەگى وپەراسيانى دايىنداۋ مەن جۇرگىزۋ بويىنشا تاپسىرمالاردى پىسىقتايدى. ولار گۋمانيتارلىق جۇكتەردى الىپ ءجۇرۋ، جەرلەردى پاترۋلدەۋ، داعدارىس اۋماعىندا شيەلەنىستەردى رەتتەۋ ءۇشىن توسقاۋىل بەكەتتەرىن ۇيىمداستىرۋ جانە ەلدى مەكەندى بۇعاتتاۋ.
بۇعان قوسا، بىتىمگەرلەر بوسقىندار لاگەرى مەن تەكسەرۋ پۋنكتەرىندەگى جۇمىستى ۇيىمداستىرۋدا تاجىريبە جيناقتايدى.
بۇل وقۋ-جاتتىعۋعا ۇقشۇ-عا مۇشە مەملەكەتتەردىڭ قارۋلى كۇشتەرى مەن قۇقىق قورعاۋ ورگاندارىنىڭ 1،7 مىڭنان اسا اسكەري قىزمەتشىسى، سونداي-اق 300-دەن استام جاۋىنگەرلىك تەحنيكا، مي-8 جانە مي-24 تىكۇشاقتارى جۇمىلدىرىلدى.