ەلىمىزدە ومىرلىك دەرەكتەر مەن ناقتى مىسالدارعا تولى تاعى ءبىر تۋىندى جارىققا شىقتى.
اسكەري جانە مەملەكەت قايراتكەرى، گەنەرال-مايور ەرلىك سەرىكباي ۇلى تايجانوۆتىڭ ومىرىنە نەگىزدەلگەن «ەلگە قىزمەت – باستى مىندەت» اتتى شىعارماشىلىق ەڭبەك دۇنيەگە كەلدى.
جيىرماسىندا ميلليونەر، وتىزىندا مينيستر اتانعان مىنا زاماندا جەتىستىككە جەتۋ، باقىتتىڭ كىلتىن تابۋ تاقىرىبىندا وقىرماندى تاڭقالدىرۋ وڭاي ەمەس. سولاي دەسەك تە، بۇل كىتاپ كوپتەگەن ادامدار ءۇشىن جۇرەگىنە جاقىن بولاتىنى ءسوزسىز. ويتكەنى، اڭىز بەن ويدان قۇرالعان ادىستەرگە ەمەس، ناقتى ومىرلىك مىسالدارعا تولى. وقىرمان باس كەيىپكەردىڭ ومىرىمەن تانىسۋ بارىسىندا ناعىز كۇرەس، شىنايى ەڭبەككە قانىق بولادى.
قاراپايىم اۋىلدىڭ بالاسى ەڭبەك جولىن سولتۇستىك قازاقستان وبلىسى، مايبالىق اۋىلىندا مەحانيزاتور بولىپ باستاعان. ارمان قۋىپ قاراعاندى قالاسىنداعى جوعارى ميليسيا مەكتەبىنە اتتانادى. وقۋعا بىردەن تۇسپەي، شارۋاشىلىق بولىمىندە قارا جۇمىسقا جەگىلەدى. قۇرىلىس جۇمىستارىمەن اينالىسادى، ارنايى وقۋ ورنىنىڭ وتىمەن كىرىپ كۇلىمەن شىعادى. ناتيجەسىندە ءوزى ارمانداعان وقۋ ورنىنىڭ كۋرسانتى اتانادى. وقۋىن ويداعىداي اياقتاپ، ارنايى ورگانداردا العاشقى ەڭبەك جولىن باستايدى. قىرىق جىل قىلمىس اتاۋلىسىمەن كۇرەسىپ، حالىقتىڭ تىنىشتىعىن قامتاماسىز ەتەدى. قازاقستان رەسپۋبليكاسى ۇلتتىق قاۋىپسىزدىك ورگاندارىندا قىزمەت اتقارىپ، جوعارى لاۋازىمدارعا جاۋاپتى مىندەتتەردى ورىندايدى. ەڭ جوعارى اسكەري شەن – گەنەرالعا دەيىن قول جەتتى. قۇرمەتتى ەڭبەك دەمالىسىنا شىقسا دا جاستاردى پاتريوتيزم رۋحىندا تاربيەلەۋ جۇمىسىنان قول ۇزگەن ەمەس. قازاقستان بويىنشا «شيتو-ريۋ كاراتە» قوعامدىق بىرلەستىگىنىڭ ءتوراعاسى رەتىندە جاستاردى سالاۋاتتى ءومىر سالتىن ۇستانۋعا، وتان قورعاۋشى ازامات بولۋعا باۋلىپ كەلەدى.
ە.تايجانوۆ 2021 جىلى ق ر پارلامەنتى ءماجىلىسىنىڭ دەپۋتاتى اتاندى. حالىق قالاۋلىسى رەتىندە قوعامداعى وتكىر ماسەلەلەردى كوتەردى، حالىقتىڭ الەۋمەتتىك ماسەلەلەرىن شەشۋگە، قيىندىق تۋعاندا ەل تىرەۋى بولۋعا تىرىستى.
اتالمىش كىتاپتا ادامنىڭ تۇلعالىق دامۋى مەن ءوسۋى تۋرالى كوپتەگەن مىسالدار كەلتىرىلگەن.
«ق ر ۇقك ورگاندارىنىڭ ارداگەرلەرى» رەسپۋبليكالىق قوعامدىق بىرلەستىگىنىڭ ءتوراعاسى،
ق ر ۇقك قۇرمەتتى قىزمەتكەرى، پولكوۆنيك
كەنجەبولات بەكنازاروۆ