ءماجىلىس دەپۋتاتى ەرمۇرات باپي بۇگىنگى جالپى وتىرىستا اتىراۋدا ءتورت قىزدىڭ تۇمشالانىپ، ارابشا جازۋى بار مەملەكەتتىك تۋ ۇستاپ تۇسكەن سۋرەتىنە قاتىستى ماسەلە كوتەردى.
ول باس پروكۋرور ب.اسىلوۆقا ساۋال جولداپ، بۇل وقيعانى جان-جاقتى زەرتتەۋدى تالاپ ەتتى، دەپ حابارلايدى aqshamnews.kz.
دەپۋتاتتىڭ ايتۋىنشا، قىزدار ۇستاعان كوك تۋداعى اراب قارپىندەگى جازۋ ارنايى باسپا قۇرالىمەن وتە ساپالى تۇردە تاڭبالانعان. سوندىقتان بۇل وقيعا تەك تۇرمىستىق بۇزاقىلىق نەمەسە ادەپسىزدىك قانا ەمەس، مەملەكەتتىگىمىزگە، ۇلتتىق ءداستۇرىمىز بەن بىرەگەيلىگىمىزگە جاسالعان اشىق ءارى ماقساتتى قارسىلىق رەتىندە قاراستىرىلۋى كەرەك. ول مۇنداي زاڭ بۇزۋشىلىقتار قاتاڭ ءارى بۇلجىتپاي جازالانۋى ءتيىس ەكەنىن اتاپ ءوتتى.
سونىمەن بىرگە، ەرمۇرات باپي بۇل ءتورت قىز الدەبىر ارانداتۋشى توپتىڭ قۇربانى بولۋى مۇمكىن ەكەنىن ەسكەرتتى. ولاردىڭ مۇنداي ارەكەتكە جاستىق البىرتتىقپەن، ماتەريالدىق قىزىعۋشىلىقپەن نەمەسە ءدىني ساۋاتسىزدىق سالدارىنان بارۋى ىقتيمال. سوندىقتان ەڭ الدىمەن وسى ارەكەتتى ۇيىمداستىرعان جانە باعىتتاعان كۇشتەردى انىقتاپ، جازاعا تارتۋ قاجەت دەدى.
دەپۋتات سونىمەن قاتار Wildberries Russ ماركەتپلەيسىندە ءتۇرى بۇرمالانعان قازاقستان تۋىنىڭ ەركىن ساتىلىپ جاتقانىن مالىمدەدى. بەكىتىلگەن ستاندارتقا ساي كەلمەيتىن، رەسمي سيپاتى وزگەرتىلگەن مەملەكەتتىك رامىزدەردى ساۋداعا شىعارعان ورىنداردى جاۋاپقا تارتۋدى جانە ساتىلعان تۋلاردى جيناپ، جويۋدى تالاپ ەتتى.
سونداي-اق، ەرمۇرات باپي زاڭناماعا تۇزەتۋلەر ەنگىزىپ، ۇلتتىق بىرەگەيلىككە نۇقسان كەلتىرەتىن، قوعامدى جىككە ءبولۋدى كوزدەيتىن تاۋارلاردى ساتاتىن ماركەتپلەيستەرگە قارسى سانكسيا سالۋدى ۇسىندى. مەملەكەت راديكالدى اعىمداردىڭ زاڭعا قايشى ارەكەتتەرىنە باقىلاۋدى كۇشەيتىپ، ءدىني قۇندىلىقتاردى بۇرمالاۋعا قارسى شارالاردى قاتاڭداتۋى قاجەت ەكەنىن ايتتى.
ول ۇلتتىق بىرەگەيلىكتى قورعاۋ ساياساتىن جۇيەلى تۇردە قالىپتاستىرۋدىڭ ۋاقىتى جەتكەنىن اتاپ ءوتتى. بۇل ماقساتتا زايىرلى ءبىلىم بەرۋ جۇيەسىن نىعايتىپ، مەكتەپتەردەگى ءدىنتانۋ ساباقتارىن ۇلتتىق مۇرا نەگىزىندە جۇرگىزۋ باعدارلاماسىن ازىرلەۋدى ۇسىندى. سونىمەن قاتار، ۇلتتىق مادەنيەتتى دامىتۋعا، ءداستۇرلى كيىم كيۋدى ناسيحاتتاۋعا جانە جاستار اراسىندا كەڭ اۋقىمدى ءتۇسىندىرۋ جۇمىستارىن جۇرگىزۋگە ءتيىستى مەملەكەتتىك ورگانداردى شاقىردى.