وقۋ-اعارتۋ ءمينيسترى عاني بەيسەمبايەۆ 6 تامىزدا وتكەن ۇكىمەت وتىرىسىندا وسىنداي مالىمەت كەلتىردى، دەپ حابارلايدى aqshamnews.kz.
ءمينيستردىڭ ايتۋىنشا، 2025-2026 وقۋ جىلىندا ەلدە 7859 مەكتەپ بالالارعا ءبىلىم بەرمەك. عاني بەيسەمبايەۆ ونىڭ ىشىندە 6387 مەكتەپتىڭ جاعدايى جاقسى ەكەنىن ايتتى.
— 1 قىركۇيەكتەن باستاپ 7،9 ءبىلىم بەرۋ ۇيىمىندا 3،9 ملن بالا ءبىلىم الادى. ونىڭ 360 مىڭى — ءبىرىنشى سىنىپ وقۋشىلارى. بۇگىنگى تاڭدا 336 مىڭ بالا مەكتەپكە قابىلداندى، — دەدى ۆەدومستۆو باسشىسى.
ال اكىمدىكتەر رەسپۋبليكا بويىنشا 1،7 ملن بالانىڭ مەكتەپتە ىستىق تاماقتى تەگىن ىشۋىنە قاجەتتى قاراجاتتى دەر كەزىندە بولگەن. بۇل بىلتىرعىدان 100 مىڭ بالاعا كوپ.
عاني بەيسەمبايەۆتىڭ سوزىنشە، بۇل وقۋ جىلىندا 510 مىڭ بالانىڭ مەكتەپكە دايىندىعىنا اكىمدىك ەسەبىنەن قولداۋ بولاتىنىن ايتقان.
ال مينيسترلىكتىڭ 29 تامىزداعى مالىمەتى بويىنشا، «جالپىعا بىردەي ءبىلىم بەرۋ قورى» اتا-انالار مەن زاڭدى وكىلدەردىڭ ەسەپشوتتارىنا مەكتەپ فورماسىن، اياق كيىم مەن وقۋ-قۇرالدارىن ساتىپ الۋعا 25،3 ملرد تەڭگە اۋدارىلعان. بۇل اكىمدىكتەردىڭ تىزىمىندەگى 500 مىڭنان استام وقۋشىعا كومەك كورسەتىلدى دەگەن ءسوز. بيىل ءبىر بالاعا بەرىلەتىن ەڭ تومەنگى تولەم مولشەرى 46 228 تەڭگە بولىپ وتىر. ال جەرگىلىكتى ءماسليحاتتاردىڭ شەشىمىمەن الماتى قالاسىندا بۇل سوما 55 مىڭ تەڭگە، جامبىل وبلىسىندا 53 117 تەڭگە، پاۆلودار وبلىسىندا — 53 663 تەڭگە بولىپ بەلگىلەنگەن.
جاڭا وقۋ جىلىندا ەل مەكتەپتەرىندە ەرەكشە ءبىلىم بەرۋ قاجەتتىلىگى بار بالالارعا ارنالعان 1093 قولداۋ كابينەتى جۇمىس ىستەيدى. بۇل كابينەتتەردە پسيحولوگتار، ارنايى جانە الەۋمەتتىك پەداگوگتەر، پەداگوگ-اسسيستەنتتەر ەرەكشە بالالارعا قولايلى جاعداي جاساپ، ولاردى مەكتەپ ورتاسىنا بەيىمدەۋگە كومەكتەسەدى.
جاڭا وقۋ جىلى باستالعانعا دەيىن 163 ءبىلىم بەرۋ ۇيىمىندا جوندەۋ جۇمىستارى اياقتالىپ، 138 مىڭنان استام وقۋشى جاڭارتىلعان جانە تولىقتاي قايتا جابدىقتالعان مەكتەپتەردە ءبىلىم الادى دەپ جوسپارلانعان بولاتىن.
رەنوۆاسيا باعدارلاماسى بويىنشا 127 مەكتەپ جاڭارتىلدى. وندا 99 مىڭعا جۋىق بالا ءبىلىم الادى. سونىمەن قاتار 1 مىڭعا جۋىق اۋىل مەكتەبىندە روبوتوتەحنيكا، حيميا، بيولوگيا، فيزيكا جانە STEM پاندەرى بويىنشا 1108 زاماناۋي كابينەت ورناتىلدى.
2025 جىلى بالالاردى قوسىمشا ءبىلىم بەرۋمەن قامتۋ 3،2 ملن بالادان 3،4 ملن-عا دەيىن ۇلعايدى. ولاردىڭ 62%-ى تەگىن ۇيىرمەلەر مەن سەكسيالارعا قاتىسادى. ءقازىر رەسپۋبليكا بويىنشا 380 ءتۇرلى باعىتتاعى ۇيىرمە بويىنشا قىزمەت كورسەتەتىن 2142 مەكتەپتەن تىس ۇيىم جۇمىس ىستەيدى.
بيىل ەلدىڭ 12 وڭىرىندە 22 وقۋشىلار سارايى سالىنىپ جاتىر. ازىرگە سولتۇستىك قازاقستان، پاۆلودار وبلىستارى مەن الماتى، شىمكەنت قالالارىندا نىساندار قولدانىسقا بەرىلدى.
بۇكىل ەل اۋماعىندا 267 مىڭ بالاعا ارنالعان 232 مەكتەپ سالىنىپ جاتىر. ونىڭ 83 مەكتەبى وقۋ جىلىنىڭ باسىندا، 111 مەكتەبى وقۋ جىلىنىڭ اياعىنا دەيىن سالىنىپ ءبىتۋ كەرەك.