بيىل التى مىڭعا جۋىق ادام قانداس مارتەبەسىن الدى

ەلگە ورالعانداردىڭ جارتىسىنان كوبى وزبەكستاننان كەلگەن.

ۇستىمىزدەگى جىلدىڭ باسىنان بەرى قازاقستانعا ورالعان قانداستاردىڭ سانى ارتىپ، التى مىڭعا جۋىق ادام قانداس مارتەبەسىن الدى، دەپ حابارلايدى Almaty-akshamy.kz.

«2022 جىلعى 1 ماۋسىمداعى جاعداي بويىنشا، 5 679 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى، 1991 جىلدان بەرى رەسپۋبليكاعا 1 ميلليون 93،5 مىڭ ەتنيكالىق قازاق ورالدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.

جىل باسىنان بەرى قازاقستانعا كەلگەن قانداستاردىڭ جارتىسىنان كوبى (68،7%) وزبەكستاننان، 10،4% – قىتايدان، 8،8% – تۇرىكمەنستاننان، 2،6% – موڭعوليادان جانە 9،5% باسقا ەلدەردەن قونىس اۋدارعان.

كەلگەن ەتنيكالىق قازاقتار نەگىزىنەن الماتى (31،1%)، ماڭعىستاۋ (18،8%)، تۇركىستان (10،3%) جانە جامبىل (6،2%) وبلىستارىنا، سونداي-اق الماتى (6%)، نۇر-سۇلتان (6،9%) جانە شىمكەنت (7،9%) قالالارىنا قونىستاندى.

وسى جىلعى 1 ماۋسىمداعى جاعداي بويىنشا، ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 63،2%، ەڭبەككە قابىلەتتى جاستان كىشى قونىس اۋدارۋشىلار سانى 22،8% جانە زەينەتكەرلەر سانى 14%.

ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 11،4%-ى جوعارى ءبىلىمدى، 40،3%-ى ورتا كاسىبي ءبىلىمدى، 46،6%-ى جالپى ورتا ءبىلىمدى جانە 1،7%-نىڭ ءبىلىمى جوق.