4 ماۋسىم - تىنىشتىق كۇنى ەكەنىن ەسكەرتتى.
ماۋسىمنىڭ 4 كۇنى ساعات 00:00-دە رەفەرەندۋم الدىنداعى ۇگىت جۇرگىزۋ اياقتالادى. باس پروكۋراتۋرا وكىلى بولات دەمبايەۆ «تىنىشتىق كۇنى» ءتارتىپ بۇزعانداردىڭ جاۋاپكەرشىلىككە تارتىلاتىنىن ەسكەرتەدى، دەپ حابارلايدى Almaty-akshamy.kz.
«ەرتەڭ، 4 ماۋسىمدا ساعات 00:00-دە رەفەرەندۋم الدىنداعى ۇگىت جۇرگىزۋ اياقتالادى...بۇل ۇگىتكە، سونىڭ ىشىندە قوعامدىق پىكىرگە سۇراۋ سالۋ ناتيجەلەرىن نەمەسە رەفەرەندۋم ناتيجەلەرىنىڭ بولجامدارىن جاريالاۋمەن ۇشتاسقانعا رەفەرەندۋم وتكىزىلەتىن كۇننىڭ الدىنداعى كۇنى جانە ول وتكىزىلەتىن كۇنى، ياعني اعىمداعى جىلدىڭ 4 جانە 5 ماۋسىمىندا تىيىم سالىنادى (كونستيتۋسيالىق زاڭنىڭ 7-بابىنىڭ 4-تارماعى). وسى كۇندەرى – ۇگىتكە تىيىم سالىنعان كەزەڭدە ول جۇرگىزىلگەن جاعدايدا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 102-بابى بويىنشا جاۋاپتىلىق تۋىندايدى»، - دەلىنگەن مالىمدەمەدە.
ونىڭ ايتۋىنشا، ياعني ۇگىت-ناسيحاتقا تىيىم سالىنعان كەزەڭدە بۇل ءىس-شارالار جۇرگىزىلگەن جاعدايدا ق ر اكىمشىلىك قۇقىق بۇزۋشىلىق تۋرالى كودەكسىنىڭ (اقبتك) 102-بابى بويىنشا جاۋاپكەرشىلىك ەسكەرىلگەن.
«ەكى نەمەسە ودان دا كوپ رەت نەمەسە باسقا بىرەۋ ءۇشىن داۋىس بەرۋ، سونداي-اق ۋچاسكەلىك رەفەرەندۋم كوميسسياسى مۇشەسىنىڭ ازاماتتارعا وزگە ادامدار ءۇشىن داۋىس بەرۋگە مۇمكىندىك جاساۋ ماقساتىندا بيۋللەتەندەردى بەرۋ ارەكەتى اقبتك-نىڭ 108 جانە 110-باپتارى بويىنشا جاۋاپتىلىققا اكەپ سوعاتىنىنا دا نازار اۋدارامىز»، - دەيدى باس پروكۋروردىڭ ورىنباسارى.
ونىڭ سوزىنە قاراعاندا، كونستيتۋسياعا (83-باپ) سايكەس، پروكۋراتۋرا ورگاندارى رەفەرەندۋمعا دايىندىق پەن ونى وتكىزۋدىڭ بارلىق ساتىلارىندا زاڭدىلىقتىڭ ساقتالۋىنا جوعارى قاداعالاۋدى قامتاماسىز ەتىپ وتىر. اتالعان ماسەلەلەردى ەسكەرە وتىرىپ، باس پروكۋراتۋرا زاڭدىلىقتى قامتاماسىز ەتۋ جانە قۇقىق بۇزۋشىلىقتاردىڭ الدىن الۋ ماقساتىندا ازاماتتاردى، قوعامدىق بىرلەستىكتەر مەن بۇقارالىق اقپارات قۇرالدارىن قولدانىستاعى زاڭنامانى قاتاڭ ساقتاۋعا شاقىردى.