اقتوبەدە قالالىق جانە وبلىستىق بالالار اۋرۋحانالارى دۇرىس ەم كورسەتپەگەنى ءۇشىن ناۋقاس بالانىڭ وتباسىنا 10 ميلليون تەڭگە مورالدىق وتەماقى تولەيتىن بولدى، دەپ حابارلايدى Aqshamnews.kz ءتىلشىسى "دياپازون"-عا سىلتەمە جاساپ.
وقيعا 2023 جىلى بولعان. ءتورت جاسار قىز بالاعا ءبىر جەكە كلينيكادا "ءىرىڭدى وتيت" دياگنوزى قويىلسا، ەكىنشىسىندە "سول جاق بەت جۇيكەسىنىڭ نيەۆرالگياسى" دەگەن قورىتىندى جاسالعان. كەيىن ول قالالىق بالالار اۋرۋحاناسىنا جىبەرىلىپ، دارىگەرلەر ءىرىڭدى وتيت كەزىندە جاساۋعا بولمايتىن فيزيوەم تاعايىنداعان. وسىدان سوڭ بالانىڭ جاعدايى ناشارلاي تۇسكەن.
كەيىنگى ەم وبلىستىق بالالار اۋرۋحاناسىندا جالعاسقانىمەن، قىز بالا ۇزاق ۋاقىت انتيبيوتيكسىز قالىپ، تەك تاڭۋ جۇمىستارى عانا جۇرگىزىلگەنى ايتىلادى. دارىگەرلەر كونسيليۋمنان كەيىن ەمدەۋ تاكتيكاسىن انىقتاعانىمەن، جاقسارۋدىڭ بەلگىسى بولماعان. اقىرى اناسى بالاسىن ءوز بەتىمەن الماتىداعى "اقcاي" رەسپۋبليكالىق اۋرۋحاناسىنا اپارىپ، ەمىن سوندا جالعاستىرعان.
بالانىڭ اناسى اقتوبەدەگى قالالىق جانە وبلىستىق بالالار اۋرۋحانالارىن دۇرىس مەديسينالىق كومەك كورسەتپەدى دەپ سوتقا بەرىپ، مورالدىق زياندى وتەۋدى تالاپ ەتكەن. ساراپتاما قورىتىندىسىنا سايكەس، ەمنىڭ ۋاقىتىندا كورسەتىلمەۋى ورتاڭعى قۇلاق ينفەكسياسىنا، باسىشىلىك اسقىنۋلارعا اكەلىپ، ناتيجەسىندە بالاعا باس سۇيەگىنە رەزەكسيالىق ترەپاناسيا جاسالعان.
ءقازىر بالانىڭ ءبىر قۇلاعى مۇلدە ەستىمەيدى، ەكىنشى قۇلاعىندا تۇراقتى شۋ بار. دارىگەرلەر وعان I دارەجەلى ەستۋ قابىلەتىنىڭ جوعالۋى دياگنوزىن قويعان.
سوت شەشىمى بويىنشا، الدىمەن يۋۆەنالدى سوت ەكى اۋرۋحانانى دا 5 ميلليون تەڭگەدەن تولەۋگە مىندەتتەگەن. اپەللياسيادان كەيىن سوت القاسى بۇل شەشىمدى كۇشىندە قالدىرىپ، ەكى مەديسينالىق ۇيىمنىڭ دا بىلىكسىز كومەگى بالانىڭ جاعدايىن ۋشىقتىرعانىن اتاپ ءوتتى. ناتيجەسىندە اۋرۋحانالار جالپى سوماسى 10 ميلليون تەڭگە وتەماقى تولەيدى.