پارلامەنتتە ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا ازىرلەنگەن زاڭ جوباسى تالقىلانىپ جاتىر.
ءقازىر وسى قۇجاتتا «وتباسىلاردان بالالاردى مەملەكەتتىك ورگانداردىڭ تارتىپ الۋىنا مۇمكىندىك بەرەتىن نورمالار بار» دەگەن جاڭساق اقپارات تاراتىلۋدا، دەپ حابارلايدى Almaty-akshamy.kz 24.kz-كە سىلتەمە جاساپ.
وقۋ-اعارتۋ مينيسترلىگىنىڭ وكىلدەرى بۇل اقپاراتتىڭ شىندىققا جاناسپايتىنىن رەسمي مالىمدەدى. قارالىپ جاتقان زاڭ جوباسىندا جانە ماجىلىستەگى باسقا دا قۇجاتتاردا بالالاردى وتباسىلاردان تارتىپ الۋعا قاتىستى ءبىر دە ءبىر نورما جوق. ۆەدومستۆو ءارتۇرلى فەيككە سەنبەۋگە شاقىرادى.
ەدىل وسپان، ق ر وقۋ-اعارتۋ ۆيسە-مينيسترى: - مەملەكەتتىك ساياسات بالانىڭ تۋعان وتباسىندا تاربيەلەنۋ قۇقىعىن قامتاماسىز ەتىپ، بالالاردى تاربيەلەۋ مەن قاۋىپسىزدىگىن ساقتاۋ ماسەلەلەرىندە ەڭ الدىمەن اتا-انالارعا باسىمدىق بەرۋگە باعىتتالعان. مەملەكەت ومىرلىك قيىن جاعدايعا تاپ بولعان وتباسىلاردى قولداۋعا ارنالعان ءتيىمدى شارالاردى ۇنەمى ىسكە اسىرىپ كەلەدى. كامەلەتكە تولماعانداردىڭ ىستەرى جونىندەگى كوميسسيالار قۇرىلعان پسيحولوگيالىق جانە وتباسىن قولداۋ ورتالىقتارىنىڭ جۇمىسى شەڭبەرىندە وسىنداي وتباسىلارعا تۇراقتى تۇردە كومەكتەر كورسەتىلۋدە.