بالالار ءتۋريزمىن دامىتۋ باعدارلاماسىنىڭ ارقاسىندا جۇزدەگەن بالا ۇشاقپەن تەگىن ۇشتى

 ىشكى ءتۋريزمدى دامىتۋعا ارنالعان جوبا جۇزەگە اسىرىلعان التى ايدىڭ ىشىندە 300-دەن اسا كىشكەنتاي جولاۋشىعا قازاقستان بويىنشا تۋريستىك جولدامالار قۇرامىندا تەگىن اۋە بيلەتتەرى تابىس ەتىلگەن، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

«باعدارلامانى جۇزەگە اسىرۋ مەحانيزمى وتە قاراپايىم. تۋريستەر تۋروپەراتورعا كەلىپ، برون جاسايدى. سول كەزدە بالالاردىڭ اۋە بيلەتتەرىنىڭ قۇنى الىنىپ تاستالادى. سەبەبى، ونى مەملەكەت سۋبسيديالايدى. ياعني، 2-دەن 17 جاسقا دەيىنگى بالالاردىڭ ۇشاقپەن ۇشۋى – تەگىن. ودان ءارى، تۋروپەراتورلار ساياحات پاكەتتەرىن تاڭداپ، قالىپتاستىرادى جانە بالالار بيلەتتەرىنىڭ شىعىنىن ءوز ەسەبىنەن وتەيدى. ال تۋرپاكەت تولىعىمەن جۇزەگە اسىرىلعاننان كەيىن ولار «قازاقتۋريزمگە» ءوتىنىم جولدايدى. ءبىز ونى 10 كۇن ىشىندە قاراپ شىعىپ، ءتيىستى قاراجاتتى تۋروپەراتورلارعا اۋدارامىز»، - دەدى «Kazakh Tourism» كومپانياسىنىڭ وكىلى ەرنۇر كەنجەبەكوۆ.

باعدارلاماعا كەز كەلگەن قازاقستاندىق وتباسى قاتىسا الادى. باستى تالاپ – جولدامانى جوباعا تىركەلگەن تۋروپەراتورلاردان ساتىپ الۋ كەرەك. ءقازىر تىزىمدە 20 كومپانيا بار. سونىمەن بىرگە، بالا اتا-اناسىمەن نەمەسە اتا-اجەسى، اعاسى، اپكەسى سىندى جاقىن تۋىستارىمەن بىرگە بولسا عانا، تەگىن اۋە بيلەتى بولىنەدى. 

«سوڭعى جىلدارى اقتاۋ، تۇركىستان قالالارىنا كوپ كوڭىل بولىنۋدە. ويتكەنى ول جەرلەردە ءىرى تۋريستىك كەشەندەر سالىندى. ارينە جەرگىلىكتى تۋريستەردىڭ نازارى ءدال سول وڭىرلەرگە تۇسەرى انىق. بۇل تەندەنسيا ءبىزدىڭ ستاتيستيكامىزدا كورسەتىلگەن. وسى ەكى دەستيناسياعا سۇرانىس جوعارى. اسىرەسە قولعا الىنعان باعدارلامانىڭ ارقاسىندا. قازاقستان - تۋريستىك بيزنەستى ىلگەرىلەتۋ ءۇشىن كيدس گوۋ فري باعدارلاماسىن ۇكىمەت دەڭگەيىندە ەنگىزگەن العاشقى ەل»، - دەيدى «Kazakh Tourism» كومپانياسىنىڭ وكىلى ەرنۇر كەنجەبەكوۆ.

كيدس گوۋ فري باعدارلاماسى بويىنشا بيىلعى جىلعا 350 ميلليون تەڭگەگە جۋىق قارجى بولىنگەن. جوبا اياسىنداعى تۋرلاردىڭ ورتاشا باعاسى - 350 مىڭ تەڭگە. سالا وكىلدەرىنىڭ ايتۋىنشا، باعدارلامانىڭ ارقاسىندا قازاقستاندىق وتباسىلار تۋريستىك جولداما قۇنىنىڭ 30 پروسەنتىنە جۋىعىن ۇنەمدەي الادى.