الماتىدا "وميكرون" شتامىنىڭ تارالۋىمەن كوروناۆيرۋس ينفەكسياسى دەرتىنىڭ وسكەنى بايقالادى.
وسىعان بايلانىستى قالا اكىمى جۇمىس ساپارى بارىسىندا ينفەكسيالىق ستاسيونارلاردىڭ قوسىمشا توسەك-ورىنداردى ورنالاستىرۋعا دايىندىعىن تەكسەردى، دەپ حابارلايدى Almaty-akshamy.kz
باقىتجان ساعىنتايەۆ رۆ-90 ي.جەكەنوۆا اتىنداعى جۇقپالى اۋرۋلار اۋرۋحاناسىنىڭ فيليالىنا باردى. بۇگىندە مۇندا كۆي-مەن اۋىراتىن 199 پاسيەنت بار، ونىڭ ىشىندە 21ء-ى جيتب-تە. ستاسيوناردىڭ جالپى قۋاتى – 500 توسەك، ونىڭ ىشىندە 45 توسەك رەانيماسيا جانە قارقىندى تەراپيا بولىمشەسىندە.
قالا اكىمى سونداي-اق №№ 12 جانە 7 قالالىق كلينيكالىق اۋرۋحانالاردا كۆي جۇقتىرعان ناۋقاستاردى قابىلداۋعا دايىندىقپەن تانىستى. باس دارىگەرلەر كوۆيد بولىمشەلەرىنىڭ جۇمىسى جالپى مەديسينالىق كومەك كورسەتۋمەن قاتار جۇرگىزىلەتىنىن حابارلادى
20 قاڭتارداعى جاعداي بويىنشا، الماتىدا كوروناۆيرۋستىق ينفەكسيانىڭ 2 057 جاعدايى تىركەلگەن، ونىڭ ىشىندە 1 866 سيمپتومدى جاعداي. ينفەكسيالىق ستاسيونارلاردا 1 350 پاسيەنت، ونىڭ ىشىندە 187 بالا بار. جيتب-تە – 71 ناۋقاس.
جالپى، كوۆيدتىك ستاسيونارلاردىڭ قۋاتى 9 340 توسەك-ورىندى قۇرايدى، ونىڭ ىشىندە 730 رەانيماسيالىق. بۇگىندە 3 310 ورىن قولدانىستا، رەزەرۆتە 6 030 ورىن بار.
ب. ساعىنتايەۆقا وقكا بازاسىندا اشىلعان تەلەمەديسينا ورتالىعىنىڭ جۇمىسى تۋرالى باياندالدى. تمو ماماندارىنىڭ باقىلاۋىندا 10 188 پاسيەنت بار. بۇل سان اعىمداعى جىلدىڭ 1-20 قاڭتار ارالىعىندا 20 ەسە ءوستى. ورتاشا العاندا، پاسيەنتتەرگە شامامەن 5 مىڭ قوڭىراۋ شالىنادى. 20 قاڭتاردا 8 458 قوڭىراۋ سوعىلدى، ونىڭ بارىسىندا ناۋقاستىڭ جاعدايى سۇرالىپ، كۆي ەمدەۋ بويىنشا ۇسىنىمدار بەرىلەدى.
قالا اكىمى سونداي-اق №7 اۋرۋحانا بازاسىندا ورنالاسقان كۆي-عا قارسى ۆاكسينالاردىڭ قالالىق قويماسىنا باردى. قويماداعى جانە ەگۋ پۋنكتتەرىندەگى I جانە II كومپونەنتتى ۆاكسينالاردىڭ قالدىعى «سينوفارم» ۆاكسيناسىنىڭ 207 733 دوزاسىن، «كازۆاك» ۆاكسيناسىنىڭ 176 349 دوزاسىن، Pfizer 254 782 دوزاسىن قۇرايدى. ب. ساعىنتايەۆ حالىقتى كۆي-گە قارسى ەكپە الۋعا، سونداي-اق ريەۆاكسيناسيادان وتۋگە شاقىردى.
وتكەن تاۋلىكتە ءبىرىنشى كومپونەنتپەن 2 218 ادام، ەكىنشىسىمەن 1 978 ادام ۆاكسينالاندى. 2021 جىلدىڭ 1 اقپانىنان باستاپ I كومپونەنتپەن 1 095 040 ادام، II كومپونەنتپەن 1 042 772 ادام ەگىلدى. ەگىلگەندەردىڭ اراسىندا 60 جاستان اسقاندار 123 885 ادامدى قۇرايدى. Pfizer (Comirnaty) ۆاكسيناسىن 35 909 ادام الدى، ونىڭ ىشىندە 1 953 جۇكتى، 7 652 بالا ەمىزەتىن ايەل جانە 26 304 بالا مەن ءجاسوسپىرىم بار.
سول كۇنى ب. ساعىنتايەۆ كۆي تارالۋىنا قارسى ءىس-قيمىل جونىندەگى شتاب وتىرىسىن وتكىزدى. كوۆيدتىك ستاسيونارلاردىڭ باس دارىگەرلەرى پاسيەنتتەردى قابىلداۋ جانە ەمدەۋ ديناميكاسى تۋرالى باياندادى. بالالار مەن جۇكتى ايەلدەردى ەمدەۋگە ەرەكشە كوڭىل بولىنەدى. 1-20 قاڭتار ارالىعىندا قالالىق بالالار جۇقپالى اۋرۋلار اۋرۋحاناسىنا كۆي بار 346 بالا ءتۇستى. ينفەكسيالىق بولىمشەلەردە 102 جۇكتى ايەل بار.
قالا اكىمى امسك-تىڭ، تەلەمەديسينا ورتالىعىنىڭ جۇمىسىن كۇشەيتۋدى جانە رەزەرۆتىك توسەك-ورىنداردى ورنالاستىرۋعا دايىندىقتى قامتاماسىز ەتۋدى تاپسىردى. بۇدان باسقا، سانيتارلىق-ەپيدەميولوگيالىق قاۋىپسىزدىك جونىندەگى شارالاردى جالعاستىرۋ، سونداي-اق حالىقتى ۆاكسيناسيالاۋ مەن ريەۆاكسيناسيالاۋدى جانداندىرۋ قاجەت. ب. ساعىنتايەۆ ۇجىمدىق يممۋنيتەتتى قالىپتاستىرۋ پاندەميانىڭ كەزەكتى تولقىنىنا قارسى تۇرۋدىڭ بىردەن-بىر سەنىمدى ءادىسى بولىپ تابىلاتىنىن اتاپ ءوتتى.