ماجىلىستە جۇمىس بەرۋشىلەردىڭ ەڭبەك شارتىن اينالىپ ءوتىپ، ازاماتتارمەن ازاماتتىق-قۇقىقتىق كەلىسىم جاساسۋ تاجىريبەسىنە نۇكتە قويۋ ماسەلەسى كوتەرىلدى، دەپ حابارلايدى aqshamnews.kz
دەپۋتاتتار مۇنداي كەلىسىمدەر جۇمىسشىلاردى نەگىزگى الەۋمەتتىك كەپىلدىكتەردەن تولىق ايىراتىنىن ايتتى.
ءبىرىنشى وقىلىمدا قارالعان زاڭ جوباسىنا قاتىستى دەپۋتات اسحات ايماعامبەتوۆ كوپتەگەن جۇمىس بەرۋشىنىڭ شىعىندى ازايتىپ، الەۋمەتتىك مىندەتتەمەلەردەن قاشۋ ءۇشىن ەڭبەك شارتىن ەمەس، ازاماتتىق-قۇقىقتىق كەلىسىم (گپح) راسىمدەيتىنىن اتاپ ءوتتى.
- مۇنداي جاعدايدا قىزمەتكەر ەڭبەك تارتىبىنە باعىنادى، گرافيكپەن جۇمىس ىستەيدى، باسشىسى بار. ءبىراق قاعاز جۇزىندە ول — “قىزمەتكەر” ەمەس، “مەردىگەر”. بۇل الەۋمەتتىك كەپىلدىكتەردەن تولىقتاي ايىرادى، — دەدى ايماعامبەتوۆ.
دەپۋتاتتىڭ ايتۋىنشا، ازاماتتىق-قۇقىقتىق كەلىسىم بويىنشا جۇمىس ىستەيتىن ازاماتتار اقى تولەنەتىن دەمالىس الا المايدى، ايەلدەرگە بوسانۋ جانە بالا كۇتىمى بويىنشا دەمالىس بەرىلمەيدى، زەينەتاقى جارنالارى تولىق اۋدارىلمايدى، سونداي-اق مىندەتتى مەديسينالىق ساقتاندىرۋعا دا قول جەتكىزە المايدى.
ونىڭ ايتۋىنشا، ەندى بۇل تاجىريبەگە قاتاڭ شەكتەۋ قويىلادى. ەگەر ەڭبەك قاتىناسىندا ەڭبەك شارتىنا ءتان كەم دەگەندە ءبىر بەلگى بولسا، ازاماتتىق-قۇقىقتىق كەلىسىم جاساۋعا تىيىم سالىنادى.
دەپۋتات ارمان قالىقوۆ تا باستامانى قولداپ، قانداي جاعدايدا ازاماتتىق-قۇقىقتىق كەلىسىم ەڭبەك شارتى رەتىندە تانىلاتىنىن ناقتىلاۋدى سۇرادى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ ءبىرىنشى ۆيسە-مينيسترى اسكاربەك ەرتايەۆتىڭ ايتۋىنشا، ەڭبەك كودەكسىنىڭ 27-بابىنا سايكەس ەڭبەك شارتىنىڭ نەگىزگى ءۇش بەلگىسى بار: قىزمەتكەردىڭ بەلگىلى ءبىر ماماندىق نەمەسە بىلىكتىلىك بويىنشا جۇمىس اتقارۋى، مىندەتتەردى باسشىلىققا باعىنا وتىرىپ جەكە ورىنداۋى جانە تۇراقتى جالاقى الۋى.
- ەگەر ازاماتتىق-قۇقىقتىق كەلىسىم وسى بەلگىلەردىڭ بىرىنە سايكەس كەلسە، وندا ول مىندەتتى تۇردە ەڭبەك شارتى رەتىندە راسىمدەلۋى قاجەت. مۇنى الدىمەن جۇمىس بەرۋشىنىڭ ءوزى تەكسەرۋگە ءتيىس. ال مەملەكەتتىك باقىلاۋدى ەڭبەك ينسپەكسياسى جۇرگىزەدى، — دەدى ول.
ۆيسە-مينيستر ءقازىر ەلدە ەڭبەك شارتتارىن تىركەيتىن ءبىرىڭعاي جۇيە جۇمىس ىستەيتىنىن، وندا ازاماتتىق-قۇقىقتىق كەلىسىمدەر دە مونيتورينگ ءۇشىن جۇكتەلەتىنىن ايتتى.
- جۇيەدە شامامەن 300 ازاماتتىق-قۇقىقتىق كەلىسىم بار. ەگەر ينسپەكسيا ولاردىڭ ىشىندە ەڭبەك شارتىنا ءتان بەلگىلەردى كورسe، جۇمىس بەرۋشىگە ولاردى ەڭبەك شارتىنا اۋىستىرۋ تۋرالى نۇسقاما بەرىلەدى، — دەدى ەرتايەۆ.
دەپۋتاتتار بۇل وزگەرىستەر قابىلدانسا، ون مىڭداعان ازامات تولىق الەۋمەتتىك جانە ەڭبەك كەپىلدىكتەرىنە قول جەتكىزەتىنىن اتاپ ءوتتى.