الماتىدا بيبىگۇل سماقوۆا مەن گۇلنار تابانوۆانىڭ كورمەسى وتەدى. كورمە 29 قاراشاعا دەيىن جالعاسادى.
قاراشانىڭ 15 مەن 29 كۇندەرى ارالىعىندا الماتىدا سۋرەتشىلەر بيبىگۇل سماقوۆا مەن گۇلنار تابانوۆانىڭ «ارمانعا اپارار جول» اتتى كورمەسى وتەدى، دەپ حابارلايدى Almaty-akshamy.kz.
سماكوۆا بيبىگۇل 1969 جىلى دۇنيەگە كەلگەن. 1989 جىلى ن.گوگول اتىنداعى الماتى كوركەمسۋرەت ۋچيليششەسىنىڭ تەاتر-دەكوراسيا فاكۋلتەتىن جانە 1999 جىلى شاكارىم اتىنداعى سەمەي مەملەكەتتىك ۋنيۆەرسيتەتىنىڭ كوركەمسۋرەت-گرافيكا فاكۋلتەتىن بىتىرگەن. وقۋدى اياقتاعاننان كەيىن پەداگوگيكالىق كوللەدجدە بەينەلەۋ ونەرىنەن ساباق بەردى. الايدا، بىرنەشە جىلدىق پەداگوگيكالىق قىزمەتتەن كەيىن ب. سماكوۆا شىعارماشىلىقتى ۇزاق جىلدارعا قالدىرۋعا ءماجبۇر بولعان. بۇگىنگى تاڭدا ب. سماكوۆا شىعارماشىلىق پەن بالالاردى وقىتۋمەن اينالىسۋدى جالعاستىرۋدا، سونداي-اق حالىقارالىق كورمەلەردىڭ ۇيىمداستىرۋشىسى جانە قاتىسۋشىسى.
تابانوۆا گۇلنارا ن. گوگول اتىنداعى الماتى كوركەمسۋرەت ۋچيليششەسىن جانە اباي اتىنداعى قازاق مەملەكەتتىك پەداگوگيكالىق ۋنيۆەرسيتەتىن بىتىرگەن. ول 30 جىلدان استام اباي اتىنداعى قازاق ۇلتتىق وپەرا جانە بالەت تەاترىندا جۇمىس ىستەپ كەلە جاتىر. سۋرەتشى تانىمال ونەر قايراتكەرلەرى روزا باعلانوۆا، ءمادينا ەرالييەۆا، باعدات سامەدينوۆا جانە ت.ب. باس كيىمدەرىن جاساعان. گ. تابانوۆا «مادەنيەت قايراتكەرى» اتاعىنا يە بولعان (2005) جانە ەۋرازيالىق شىعارماشىلىق گيلدياسىنىڭ مۇشەسى بولىپ تابىلادى (2019).
«ارمانعا اپارار جول» – بيبىگۇل سماقوۆانىڭ شىعارماشىلىق جولىنىڭ قالىپتاسۋىنا ۇلەس قوسقان اناسىنا دەگەن شەكسىز سۇيىسپەنشىلىگىنە، جانە گۇلنارا تابانوۆامەن دوستىعىنا ارنالعان كورمە. كورمەدە سۋرەتشىلەر اراسىنداعى 40 جىلعا جۋىق دوستىق ءبىرتۇتاس شىعارماشىلىق تاندەمدە ۇسىنىلادى.