الداعى كۇندەرى قار جاۋىپ، سىناپ باعاناسىنىڭ تومەندەۋىنە بايلانىستى الماتىنىڭ كوممۋنالدىق قىزمەتى كۇشەيتىلگەن جۇمىس رەجيمىنە اۋىستىرىلدى. بۇل تۋرالى قالانىڭ كوممۋنالدىق ينفراقۇرىلىمدى دامىتۋ باسقارماسى مەن تۇرعىن ءۇي ينسپەكسياسىنىڭ وكىلدەرى ايتتى.
«قازگيدرومەت» رمك مالىمەتىنشە، 15 قاڭتاردان 16 قاڭتارعا قاراعان ءتۇنى الماتىدا جاۋعان قار 17 قاڭتار كەشكە دەيىن جالعاسادى. 16 قاڭتاردا تۇنگى جانە كۇندىزگى اۋا تەمپەراتۋراسى –5…–7 گرادۋس شاماسىندا بولادى. ال 17 قاڭتاردا تۇندە اۋا تەمپەراتۋراسى –11…–13 گرادۋسقا دەيىن تومەندەپ، كۇندىز –7…–9 گرادۋس شاماسىندا ساقتالادى.
وسىعان بايلانىستى 15 قاڭتاردان باستاپ قالاداعى بارلىق كوممۋنالدىق قىزمەت كۇشەيتىلگەن رەجيمدە جۇمىس ىستەۋگە كوشىرىلدى. وندىرىستىك بازالاردا جۇرگىزۋشىلەر، مەحانيزاتورلار مەن جول سالاسى جۇمىسشىلارىنىڭ تاۋلىك بويعى كەزەكشىلىگى ۇيىمداستىرىلدى.
كوكتايعاقتىڭ الدىن الۋ ماقساتىندا قار جاۋعانعا دەيىن ارنايى تەحنيكا ورنالاستىرىلاتىن اۋماقتاردا 210 قۇم سەبەتىن كولىك كەزەكشىلىككە قويىلادى. سونىمەن قاتار الدىن الا نەگىزگى ماگيسترالدىق كوشەلەرگە سۇيىق رەاگەنتتەر سەبىلمەك.
تاۋلىك بويى 1030 بىرلىك ارنايى تەحنيكا، سونداي-اق جەكە ۇيىمداردان تارتىلاتىن 200 تەحنيكا مەن 2710 جول سالاسى جۇمىسشىسى جۇمىلدىرىلادى. اۋلا اۋماقتارىن تازالاۋ جۇمىستارىنا 1790 جۇمىسشى مەن 256 بىرلىك ارنايى تەحنيكا تارتىلادى.
بۇعان قوسا، جولدىڭ ءقاۋىپتى ۋچاسكەلەرىندە، ەڭىس پەن جوتالاردا، سونداي-اق جولايىرىقتارىنا كىرىپ-شىعاتىە جولدارعا كوكتايعاقتىڭ الدىن الۋ جانە ونى ۋاقىتىلى جويۋ ءۇشىن 75 جەدەل بريگادا جول جامىلعىسىنىڭ جاعدايىن ۇزدىكسىز باقىلاپ وتىرادى.
سونىمەن قاتار الماتى قالاسىنىڭ قۇتقارۋ قىزمەتى 16 بىرلىك ارنايى تەحنيكا مەن 50 قىزمەتكەردى تارتا وتىرىپ، تاۋلىك بويى كەزەكشىلىك ۇيىمداستىرادى. قالالىق توتەنشە جاعدايلار دەپارتامەنتى تاراپىنان 53 بىرلىك ارنايى تەحنيكا مەن 244 ادامنان تۇراتىن جەكە قۇرام كەزەكشىلىك اتقارادى.
اۋدان اكىمدىكتەرىندە اتقارىلىپ جاتقان جۇمىستاردىڭ ورىندالۋىن باقىلاۋ ماقساتىندا تاۋلىك بويعى كەزەكشىلىك ەنگىزىلەدى.
كۇننىڭ كۇرت سۋىتۋىنا، كوكتايعاقتىڭ پايدا بولۋىنا، جولدا قاردىڭ نىعىزدالىپ قاتۋىنا جانە تروتۋارلاردا مۇز قاتۋىنا بايلانىستى قالا تۇرعىندارىنان قاۋىپسىزدىك شارالارىن ساقتاۋ سۇرالادى. جۇرگىزۋشىلەرگە قوزعالىس جىلدامدىعىن ازايتىپ، كولىك اراسىنداعى اراقاشىقتىقتى ۇلعايتۋ جانە شۇعىل مانيەۆر جاساماۋ ۇسىنىلادى.
جۇرگىزۋ تاجىريبەسى از اۆتوكولىك يەلەرىنە جەكە كولىكپەن جۇرۋدەن ۋاقىتشا باس تارتىپ، قوعامدىق كولىكتى پايدالانۋعا كەڭەس بەرىلەدى. ال جۇرگىنشىلەرگە تروتۋارلاردا اباي بولۋ، سونداي-اق كوپقاباتتى ۇيلەردىڭ ماڭىندا ساقتىق تانىتۋ ۇسىنىلادى، سەبەبى شاتىردان قار قۇلاۋى مۇمكىن.