قارىزدى قايتارۋ شارالارى قولعا الىنىپ جاتىر.
الماتى تۇرعىندارى كوممۋنالدىق قىزمەتكە 1،5 ملرد تەڭگە قارىز. بۇل تۋرالى «الماتى جىلۋ جەلىلەرى» ج ش س باس ينجەنەرى دانيار قازىمبەتوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىنگى تاڭدا تۇتىنۋشىلاردىڭ پايدالانعان ىستىق سۋ مەن جىلۋ ءۇشىن كاسىپورىن الدىنداعى جالپى قارىزى شامامەن 1،5 ملرد تەڭگەنى قۇرايدى. ونىڭ ىشىندە زاڭدى جانە جەكە تۇلعالارمەن قاتار مەملەكەتتىك مەكەمەلەر دە بار. ءقازىر دەبيتورلىق قارىزدى قايتارۋ شارالارىن قولعا الىپ جاتىرمىز»، — دەدى دانيار قازىمبەتوۆ.
كومپانيا وكىلى قالا تۇرعىندارىن جىلۋ مەن ىستىق سۋعا قارىزدارىن تولەۋگە شاقىردى. بۇعان دەيىن الماتى قالاسىنىڭ اكىمدىگى مەگاپوليس جىلىتۋ ماۋسىمىنا تولىق دايىن ەكەنىن مالىمدەگەن بولاتىن.
ەرەجەگە سايكەس، قالانى جىلۋ جۇيەسىنە قوسۋ سىرتقى اۋا تەمپەراتۋراسى +8°س جانە ودان تومەن بولعاندا بەس تاۋلىك ىشىندە جۇرگىزىلەدى. ءبىرىنشى كەزەكتە جىلۋعا دەنساۋلىق ساقتاۋ، ءبىلىم بەرۋ عيماراتتارى جانە وزگە دە الەۋمەتتىك وبەكتىلەر قوسىلاتىن بولادى. كەيىن جىلۋ كوپ پاتەرلى تۇرعىن ۇيلەرگە بەرىلەدى.