الماتىلىق ەڭبەككەرلەر جاستارعا ءومىر جولىنان سىر شەرتتى

دوڭەسباي احانايەۆ،  «الماتى سۋ» مكك-نىڭ دانەكەرلەۋشى،  «ەرەن ەڭبەگى ءۇشىن» مەدالىنىڭ يەگەرى:  

الماتىدا كوللەدج كوپ، وقيمىن دەگەن بالاعا وقۋ تەگىن 

وسى سالادا ەڭبەك ەتىپ جۇرگەنىمە جيىرما سەگىز جىل بولدى. بيىل ۇلكەن ماراپات الدىم. ءبىزدىڭ دە ەڭبەگىمىز ەلەنەدى ەكەن-اۋ دەپ قۋانعانىم راس. توتەنشە جاعدايلار بولا قالسا، تاڭنان كەشكە دەيىن جەلدىڭ وتىندە، جاڭبىر­دىڭ استىندا، اق قار-كوك مۇزدا كۇي تالعاماي جۇرە بەرەمىز عوي. ماقساتىمىز – الماتى سىندى الىپ مەگاپوليستىڭ تۇرعىندارىن ساپالى سۋمەن قامتاماسىز ەتۋ. بالالارىم، نەمەرەلەرىم بار. ۇرپاعىما جۇمىستىڭ جامانى جوق، كەز كەلگەن ەڭبەك ءقادىرلى، كەز كەلگەن ەڭبەككەر قۇرمەتتى ەكەنىن ايتىپ وتىرامىن. ءوزىم سۋ مامانى بولعاسىن، «سۋدىڭ دا سۇراۋى بار» ەكەنىن، ونى دا ۇنەمدەي بىلگەن ابزال بولاتى­نىن ەسكە سالۋدان جالىقپايمىن. ءبىر وكىنىشتىسى – بىزگە جاس ماماندار كەلۋگە ىنتالى ەمەس. ءقازىر كاسىپتىك ءبىلىم الۋعا جول اشىق، كەدەرگى جوق. الماتىدا كوللەدج كوپ، وقيمىن دەگەن بالاعا وقۋ تەگىن. جاستار وسى ماسەلەنى دە ەسكەرسە دەيمىن. 

ماقپال قوجامسەيىتوۆا،  №9 تروللەيبۋس جۇرگىزۋشىسى،  «ەرەن ەڭبەگى ءۇشىن» مەدالىنىڭ يەگەرى:  

جولاۋشىلارىما تىلەكشىمىن 

تروللەيبۋس تىزگىندەپ جۇرگەنىمە ون ءۇش جىل بولدى. جولداسىممەن وسى سالادا جۇرگەندە تانىسقانمىن. ءقازىر ەكى قىزىمىز بار. جۇمىسىم وزىمە ۇنايدى. قىزىعى كوپ، شىجىعى دا جوق ەمەس. قىزىعى سول، كۇندە ءبىر باعىت­پەن ءجۇرىپ جۇرگەن سوڭ، كوپ جولاۋشىنى سونادايدان تانىپ وتىراسىز، ءتىپتى، تۋىسىڭىز سەكىلدى سىزبەن جىلى امانداسا­دى. حال-جاعداي سۇراسامىز. سەگىزىنشى ناۋرىزدا شوكولاد ۇسىنىپ، كوڭىلىمدى كوتەرىپ تاستايدى. ايالداماسىنان ءتۇسىپ بارا جاتىپ، «شارشاماي جاقسى جەتتىم، راحمەت، قىزىم» دەپ دورباسىنداعى الما، المۇرتىن ۇسىناتىن اپالار قان­داي! كۇندەلىكتى تروللەيبۋسقا وتىراتىن جولاۋشىلارىم­نىڭ وزىمە دەگەن ىقىلاسىنا مارقايىپ قالامىن. ال شى­جىعى دەيتىنىم، كەي جاستار ۇلكەندەرگە ورىن بەرمەي، سالون ءىشى شۋ بولىپ كەتىپ جاتادى. كەيدە ۇيىنەن كوڭىلسىز شىققاندار اينالاسىنا، ساعان دا ءتيىسىپ وتەتىنى بار، ءبىرى «جەلدەتكىشىڭدى قوس» دەسە، ەكىنشىسى «ءوشىر، اۋىرىپ وتىر­مىن» دەيدى. ونداي ساتتەردە سابىر ساقتاۋعا، داۋىس كوتەر­مەۋگە، ەشكىممەن رەنجىسپەۋگە تىرىسامىن. سەبەبى، ترول­لەيبۋس تىزگىنىندە وتىرعان مەنىڭ موينىمدا كولىكتەگى جانە جول بويىنداعى جۇزدەگەن ادامنىڭ جاۋاپكەرشىلىگى، امان­دىعى تۇرادى. 

ايناگۇل سيسەنوۆا،  رەسپۋبليكالىق كارديولوگيا جانە ىشكى اۋرۋلار عزي كلينينگتىك قىزمەت ءبولىمىنىڭ سانيتارى:  

جاقسىلىق – جاقسىلىقتى شاقىرادى 

ءبىز ىرگەلى مەديسينالىق مەكەمەنىڭ تازالىعىنا جاۋاپ­تىمىز. مەن جۇمىسىمدى جاقسى كورەمىن. تازالىق ءۇس­تەمدىك قۇرعان جەردە ءتارتىپ تە، جايلىلىق تا بولادى. جانساقتاۋ بولىمىندە دە جۇمىس ىستەگەنىم بار. وندا ادام­دارعا كۇتىم جاسايمىز. جانى قينالعان ءتۇرلى ناۋقاسپەن، ءتۇرلى تاعدىرمەن بەتپە-بەت كەلەسىز. وتاعا الىپ بارا جات­قاندا جاقسى تىلەك ايتىپ قالامىز. ۋاقىت ۇزاپ بارا جاتسا، الاڭداپ جولىن كۇتەمىز. ورتامىزعا ورالعاندا بالاشا قۋانامىز. ولاردى سوزبەن دەمەپ جىبەرۋ ءۇشىن دە ادامعا ۇلكەن جۇرەك، بيىك ادامگەرشىلىك سەزىمى كەرەك دەپ ويلاي­مىن. جالپى، جۇمىسىڭىزدى رياسىز جاقسى كورسەڭىز، ادامداردى، اينالانى جاقسى كورسەڭىز، سىزدە ءبارى جاقسى دەگەن ءسوز. جاستارعا ايتارىم، كىشكەنتاي عانا دۇنيەدەن دە جاقسىلىق كورىپ تۇرۋعا ۇمتىلۋ كەرەك. ال جاقسىلىق – جاق­سىلىقتى شاقىرىپ تۇرادى.

 داۋرەن شەرىكباي،  №12 ءورت ءسوندىرۋ ءبولىمىنىڭ اعا ءورت ءسوندىرۋ قۇتقارۋشىسى،  «ازاماتتىق قورعاۋ» سەرجانتى:  

جىلدامدىق پەن ەپتىلىك جانە جۇرەك كەرەك 

بالا كۇنىمدە ادامدارعا كومەك كورسەتۋگە، جان-جا­نۋارلارعا دا قامقور بولۋعا قۇشتار ەدىم. مىنە، بۇگىندە ءورت ءسوندىرۋشى، قۇتقارۋشى قىزمەتىندە ابىرويلى ەڭبەك ەتىپ ءجۇرمىن. ءۇش جىلداي عانا بولسا دا، بۇل سالانىڭ قىر- سىرىنا تەرەڭ بويلاپ كەلەمىن. ءورت سوندىرۋشىگە ءبىرىنشى كەزەكتە جىلدامدىق، ەپتىلىك، جۇرەك كەرەك. بىزگە، مىسالى، توتەنشە جاعداي تۋرالى دابىل تۇسەتىن بولسا، ون توعىز- جيىرما التى سەكۋند اراسىندا قورعانىس كيىمدەرىن كيىپ ۇلگەرۋىڭىز كەرەك. سەبەبى، ءتىلسىز جاۋ سەكۋندتاردان دا جىل­دام بولادى. اپتاپ ىستىقتا دا ۇستىڭىزدەگى قالىڭ كيىممەن وتتىڭ ىشىنە قويىپ كەتەتىن ساتتەرىمىز دە كوپ. ءار ءسات ماڭىز­دى. ءتىپتى، الىپ بازار ورتكە ورانىپ جاتسا، ادامدارمەن بىرگە ولاردىڭ كۇنكورىسىنە اينالعان مۇلكىن دە امان الىپ قالۋعا جانتالاسامىز.

جالپى، ءبىز 102-گە قانداي حابار تۇسەدى، مىسالى، بالا ىشتە كىلتتەنىپ نەمەسە مىسىق تەمىر ترۋباعا كەپتەلىپ قالۋى مۇمكىن، سول وقيعالاردى ۇلكەن-كىشى دەمەي بارىندە تەڭ جۇرەمىز. ىزگىلىكتى مۇرات ەتكەن قوعامدا ءبىزدىڭ قىزمەتىمىز دە اسا ماڭىزدى دەپ بىلەمىن.