الىس-جاقىن شەتەلدىڭ كىل مىقتى بيشىلەرى الماتىعا جينالدى.
ا. سەلەزنيەۆ اتىنداعى الماتى حورەوگرافيالىق ۋچيليششەسىندە حورەوگرافيالىق وقۋ ورىندارىنىڭ VIII حالىقارالىق «ورلەۋ» بايقاۋى وتۋدە. 2023 جىلدىڭ 4 ساۋىرىندە باستالعان ءىس-شارا 10 ساۋىرگە دەيىن جالعاسادى.
حورەوگرافيالىق وقۋ ورىندارىنىڭ VIII حالىقارالىق «ورلەۋ» بايقاۋى الەمنىڭ جەتەكشى بالەت مەكتەپتەرى اراسىنداعى حالىقارالىق ىنتىماقتاستىقتى دامىتۋ جانە نىعايتۋ ماقساتىندا 2008 جىلى قۇرىلعان.
بايقاۋدىڭ ماقساتى - حورەوگرافيالىق وقۋ ورىندارى اراسىندا كەڭىنەن تاجىريبە الماسۋدى جۇزەگە اسىرۋ، بي ونەرىندەگى جاس دارىنداردى انىقتاۋ، ورىنداۋشىلىق شەبەرلىكتەرىن ارتتىرۋ، كلاسسيكالىق، حالىقتىق جانە زاماناۋي بيلەردىڭ وزىق داستۇرلەرىن دامىتۋ، سونداي-اق قازاقستان حورەوگرافيالىق ءبىلىمى مەن ونەرىنىڭ الەمدىك ارەناداعى ءيميدجىن ىلگەرىلەتۋ جانە باسەكەگە قابىلەتتىلىگىن ارتتىرۋ بولىپ تابىلادى.
2018 جىلى بايقاۋ يۋنەسكو دەمەۋشىلىگىمەن حالىقارالىق بالەت بايقاۋلارى فەدەراسياسىنىڭ مۇشەسى مارتەبەسىن الدى، ونىڭ پرەزيدەنتى - اتى اڭىزعا اينالعان يۋريي گريگوروۆيچ.
بيىلعى ونەر دوداسىنا قىرعىزستان، وزبەكستان، رەسەي، جاپونيا، وڭتۇستىك كورەيا، جۇڭگو، وڭتۇستىك افريكا سىندى ەلدەردەن جينالعان 150-گە جۋىق حورەوگراف قاتىسىپ جاتىر.
بايقاۋدىڭ حورەوگرافيالىق ءبىلىم بەرۋ سالاسىندا ماڭىزدى ديداكتيكالىق ميسسياسى بار. ۇيىمداستىرۋشىلار بايقاۋدىڭ ءاربىر جاڭا ماۋسىمىن قازاقستاننىڭ حورەوگرافيا ونەرىنىڭ كورنەكتى قايراتكەرلەرىنە ارنايدى. سونىمەن، حورەوگرافيالىق وقۋ ورىندارىنىڭ «ورلەۋ» حالىقارالىق بايقاۋىنىڭ VIII ماۋسىمى قازاقتىڭ تۇڭعىش كاسىبي بالەريناسى، قازاق كسر حالىق ءارتىسى سارا ىدىرىس قىزى كوشەربايەۆانىڭ 90 جىلدىعىنا ارنالدى.
سونىمەن قاتار، «قازاق حورەوگرافيالىق ونەرى مەن ءبىلىمىنىڭ كورنەكتى قايراتكەرلەرى» جانە «ۇلتتىق حورەوگرافيالىق ونەر مەن ءبىلىمنىڭ وزەكتى ماسەلەلەرى» تاقىرىپتارىندا «سەلەزنيەۆ وقۋلارى» اتتى حالىقارالىق عىلىمي-زەرتتەۋ كونفەرەنسياسى وتەدى، وندا 2023 جىلى مەرەيتويلارى اتاپ وتىلەتىن بالەت قايراتكەرلەرى د. . ءابىروۆ (100 جاس) جانە ب.گ. ايۋحانوۆ (85 جاس) شىعارماشىلىقتارى قاراستىرىلادى. كونفەرەنسيانىڭ «قازاق، قىرعىز، وزبەك بيلەرى مىسالىندا تۇركى حالىقتارىنىڭ حالىق بيلەرىنىڭ ۇقساستىقتارى مەن ايىرماشىلىقتارى» تاقىرىبىنداعى تاجىريبەلىك ءبولىمى الماتى، وزبەك جانە بىشكەك حورەوگرافيالىق ۋچيليششەلەرىنىڭ وقىتۋشىلارىنىڭ قاتىسۋىمەن وتەدى.
بايقاۋ اياسىندا قازاقستاننىڭ جانە شەتەلدىڭ حورەوگرافيالىق ونەرىنىڭ جەتەكشى ماماندارىنىڭ شەبەرلىك ساباقتارى مەن سەمينارلارى وتۋدە. ونىڭ ىشىندە فرانسيانىڭ «Ruée des Arts» بي توبىنىڭ «Costard» سپەكتاكلىنىڭ قويىلىمى مەن زاماناۋي حورەوگرافيا بويىنشا شەبەرلىك سىنىبى جوسپارلانۋدا.
ايتا كەتەرلىگى، بايقاۋدىڭ تاريحىندا العاش رەت فينالدىق تۋرلار، جاڭا Almaty Theatre ساحناسىندا كورەرمەندەردىڭ قاتىسۋىمەن وتەدى. بۇل ءوز كەزەگىندە ۇيىمداستىرۋشىلارعا جەكە «حالىق تاڭداۋى سىيلىعىن» بەلگىلەۋگە مۇمكىندىك بەرەدى. بايقاۋ جاس بالەت ارتىستەرىنىڭ ەڭ ۇزدىك نومىرلەرىنەن قۇرالعان گالا-كونسەرتپەن اياقتالادى.