4 ماۋسىم – مەملەكەتتىك رامىزدەر كۇنىنە وراي الماتىدا «باتىر» پرەزيدەنتتىك پولكىنىڭ اسكەريلەرى سالتاناتتى تۇردە تۋ كوتەرىپ، ءانۇران جاپپاي شىرقالدى، دەپ حابارلايدى almaty-akshamy.kz
پاتريوتتىق ءىس-شارا «مەدەۋ بيىك تاۋلى سپورت كەشەنىندە ءوتتى. سالتاناتتى ءىس-شاراعا الماتى اكىمى ەربولات دوسايەۆ، مادەنيەت جانە سپورت قايراتكەرلەرى، قوعام، قحا جانە جاستار ۇيىمدارىنىڭ وكىلدەرى قاتىستى. ءىس-شاراعا بارلىعى مىڭنان استام ادام قاتىستى.
قالا اۋداندارىندا دا مەرەكەلىك ءىس-شارالار مەن ءانۇران سالتاناتتى تۇردە ورىندالدى. الماتى تۇرعىندارى ساياباقتاردا، مەكتەپتەردە جانە باسقا دا قوعامدىق ورىنداردا ەلىمىزدىڭ ءانۇرانىن ورىندادى.
مەرەكەلىك ءىس-شارالار «الاتاۋ» ءداستۇرلى ونەر تەاترىندا مەرەكەلىك كونسەرت جانە جامبىل اتىنداعى قازاق مەملەكەتتىك فيلارمونياسىندا تىلەندييەۆ اتىنداعى «وتىرار سازى» اكادەميالىق فولكلورلىق-ەتنوگرافيالىق وركەسترىنىڭ «مەنىڭ ەلىم» پاتريوتتىق كونسەرتىمەن اياقتالادى.