الماتىدا جاتتىقتىرۋشىلار اشىق سپورت الاڭدارىندا ساباق وتكىزەدى

جاتتىعۋلاردى بالالار مەن جاسوسپىرىمدەر سپورت مەكتەبىنىڭ باپكەرلەرى جۇرگىزەدى.

الماتىدا 22 جاتتىقتىرۋشى بالالارعا اشىق سپورت الاڭدارىندا ساباق وتكىزەدى. بۇل تاجىريبە مەگاپوليستە بىرنەشە جىل بۇرىن قالالىق سپورت باسقارماسىنىڭ باستاماسىمەن پايدا بولدى. بۇگىن «ەڭبەك» باعدارلاماسى اياسىندا 22 مامان جۇمىسقا كىرىستى، ولار 500-گە جۋىق بالانى وقىتادى، دەپ حابارلايدى Almaty-akshamy.kz قازاقپارات-قا سىلتەمە جاساپ.

الماتى قالالىق سپورت باسقارماسىنىڭ باسشىسى رۇستەم بايسەيىتوۆ بۇل جۇمىستىڭ قالاي ۇيىمداستىرىلعانىن ايتتى.

«الماتىنىڭ التى اۋدانىندا جەكپە-جەكتى وقىتۋ ورتالىقتارى اشىلدى. جاتتىعۋلاردى بالالار مەن جاسوسپىرىمدەر سپورت مەكتەبىنىڭ 14 باپكەرى وتكىزەدى. سونىمەن قاتار، قالانىڭ 8 اۋدانىندا 50 دەمالىس ورتالىعى بار، ولاردا سپورت سەكسيالارى مەن ۇيىرمەلەرى اقىسىز جۇمىس ىستەيدى، وندا 5 280 ادام قامتىلعان»، - دەيدى رۇستەم بايسەيىتوۆ.

سپورت باسقارماسىنىڭ باسشىسى 2023 جىلعا قاراي قالاداعى ورتالىقتاردى 200-گە دەيىن جەتكىزۋ جوسپارلانىپ وتىرعانىن، بيىل قوسىمشا 50 ورتالىق اشىلاتىنىن جەتكىزدى.

«بيىل 8-12 جاس ارالىعىنداعى بالالارعا ءجۇزۋ نەگىزدەرى بويىنشا تەگىن وقىتۋدىڭ قالالىق باعدارلاماسى قولدانىلدى. بارلىعى 2100 بالا قامتىلدى، ونىڭ ىشىندە بالالار ءۇيىنىڭ تاربيەلەنۋشىلەرى دە بار. سونداي-اق، الماتى قالاسىنىڭ اۋلالىق كوماندالارى اراسىندا 4500-دەن استام بالانى قامتيتىن فۋتبول ليگالارى ۇيىمداستىرىلدى. سونىمەن قاتار، «ەڭبەك» باعدارلاماسى اياسىندا 22 مامان جۇمىسقا كىرىستى، ولار 500-گە جۋىق بالانى وقىتادى»، - دەدى سپيكەر.