جوو-دا وقيتىن ستۋدەنتتەر ءار سالادا جەتىستىككە جەتكەن تۇلعالارمەن كەزدەستى
الماتىدا «جاستاردى الەۋمەتتەندىرۋ جانە وڭالتۋ» جوباسى جالعاسىپ جاتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
ءىس-شارا اياسىندا قالاداعى جوو-دا وقيتىن ستۋدەنتتەر ءار سالادا جەتىستىككە جەتكەن تۇلعالارمەن كەزدەسىپ، سۇراق الماسادى. «ادىرنا» قوعامدىق قورىنىڭ ۇيىتقى بولۋىمەن بۇگىنگە دەيىن ەلىمىزدىڭ ءار وڭىرىندە 20-عا جۋىق سەمينار-ترەنينگ وتكەن.
ماقسات – جاستاردى ەڭبەككە باۋلۋ جانە ولاردىڭ شىعارماشىلىق الەۋەتىن ارتتىرۋ. جوبا اقپارات جانە قوعامدىق دامۋ مينيسترلىگىنىڭ قولداۋىمەن ۇيىمداستىرىلىپ وتىر. بۇگىن ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى بەلگىلى كاسىپكەر سىرىمبەك تاۋمەن كەزدەستى.
«مەنىڭ كوپ ايتاتىنىم – قاراپايىم بولۋ. ءقازىر ءبىز قاراپايىمدىلىقتى جوعالتىپ الدىق تا، مەنمەندىككە سالىنىپ كەتتىك. جاستاردا جەتىستىككە جەتۋ ءۇشىن ەڭ ءبىرىنشى ۇستانىم: ول قاراپايىمدىلىق. ءبىز ازعانتاي دۇنيە بىتسە نەمەسە ازعانتاي ابىروي بىتسە، قاراپايىمدىلىقتان اتتايمىز. ءبىراق وسى بىزگە، كەرىسىنشە، الدىمىزدان سوققى بولىپ ءتيىپ جاتادى»، – دەدى كاسىپكەر سىرىمبەك تاۋ.
«بيزنەستىڭ قىر-سىرىن ۇيرەتۋ، ولاردىڭ تۇلعا بولىپ قالىپتاسۋى ءۇشىن مۇمكىندىك بەرىپ وتىرمىز. ونىڭ ءبارى تەگىن. سونىمەن قوسا، جۇمىسسىز جاستاردى تىركەپ، سوسىن جۇمىسپەن قامتۋ ورتالىق ۇسىنىپ، ولاردىڭ ورتالارىندا دانەكەر بولىپ، ەكى ورتادا بايلانىس ۇيىمداستىرىپ، قىزمەت اتقارىپ جاتىرمىز»، – دەدى «ادىرنا» قوعامدىق قورىنىڭ جەتەكشىسى ارمان اۋباكىر.