بۇگىن الماتىدا قالا اكىمدىگى مەن مادەنيەت باسقارماسىنىڭ قولداۋىمەن جاڭا كىتاپحانا سالتاناتتى تۇردە اشىلدى.
قالانىڭ 31ء-شى كىتاپحاناسى بولعان جاڭا نىسان وقۋ ءداستۇرىنىڭ قۇندىلىقتارىن سيفرلىق تەحنولوگيامەن، زاماناۋي بىلىممەن جانە كەڭ اۋقىمدى اقپاراتتىق رەسۋرستارمەن ۇيلەستىرگەن مەگاپوليستىڭ مادەني جاڭعىرۋىنىڭ سيمۆولىنا اينالدى.
كىتاپحانانىڭ اشىلۋ راسىمىنە الماتى تۇرعىندارى، قالا باسشىلىعىنىڭ وكىلدەرى، بەلگىلى جازۋشىلار، قوعام قايراتكەرلەرى جانە مادەني قاۋىمداستىق وكىلدەرى قاتىستى.
ءىس-شارا بارىسىندا الماتى قالاسى اكىمىنىڭ ورىنباسارى ابزال نۇكەنوۆ ءسوز سويلەپ، قالانىڭ ءار اۋدانىندا مادەني ورتالىقتار مەن كىتاپحانالاردى اشۋ – الەۋمەتتىك ينفراقۇرىلىمدى تۇرعىندار ءۇشىن قولجەتىمدى ەتۋگە باعىتتالعان ماڭىزدى باسىمدىقتاردىڭ ءبىرى ەكەنىن اتاپ ءوتتى. ونىڭ ايتۋىنشا، مۇنداي ورتالىقتار قوعامدىق ءومىردىڭ جاندانۋىنا ىقپال ەتىپ، قالا تۇرعىندارىنىڭ زاماناۋي اقپاراتتىق ءارى ءبىلىم بەرۋ رەسۋرستارىنا ەركىن قول جەتكىزۋىنە مۇمكىندىك بەرەدى.
كىتاپحانا زاماناۋي تالاپتارعا ساي قالىپتاسقان اۋقىمدى كىتاپ قورى مەن جەتىلدىرىلگەن ماتەريالدىق-تەحنيكالىق مۇمكىندىكتەرىنىڭ ارقاسىندا جاسى مەن قىزىعۋشىلىعى ءارتۇرلى وقىرمانداردىڭ قاجەتتىلىگىن تولىق قامتاماسىز ەتەدى.
مۇندا كومپيۋتەرمەن جۇمىس ىستەۋگە ارنالعان ارنايى زال، جەكە وقۋ ءۇشىن قولايلى تىنىش ايماقتار، سونداي-اق بىرلەسكەن كەزدەسۋلەر مەن شىعارماشىلىق باستامالاردى جۇزەگە اسىرۋعا لايىقتالعان كەڭىستىكتەر قاراستىرىلعان.
سونىمەن قاتار، كىتاپحانانىڭ باستى ەرەكشەلىكتەرىنىڭ ءبىرى - ەرەكشە قاجەتتىلىگى بار ازاماتتار ءۇشىن ارنايى بەيىمدەلگەن جۇمىس ورىندارى قاراستىرىلعان. ولار كورۋ قابىلەتى تومەن جانە زاعيپ وقىرماندارعا ارنالعان برايل باعدارلامالارى مەن دىبىستىق ينتەرفەيستەرمەن جابدىقتالعان.
«مۇنداي جاڭا ءارى زاماناۋي كىتاپحانالاردىڭ اشىلۋى – وي مەن ءبىلىمدى توعىستىرىپ، ۇلت رۋحانياتىن جاڭا دەڭگەيگە كوتەرەتىن ماڭىزدى مادەني كەڭىستىك. بۇل باستاما وقىرمان مادەنيەتىنىڭ دامۋىنا زور سەرپىن بەرەدى دەپ سەنەمىن»، – دەدى قازاقستان جازۋشىلار وداعىنىڭ ءتوراعاسى مەرەكە قۇلكەنوۆ.
جاڭا كىتاپحانانىڭ اشىلۋى قالانىڭ مادەني ينفراقۇرىلىمىن دامىتۋدىڭ ماڭىزدى قادامى بولىپ، الماتىلىقتار ءۇشىن جاڭا تارتىمدى ورتالىققا اينالماق. كىتاپحانانىڭ باستى ارتىقشىلىقتارىنىڭ ءبىرى – 20 مىڭعا دەيىن كىتاپتى قامتيتىن باي ءارى مازمۇندى كىتاپ قورى.
الماتى كىتاپحانالارىنا قاراستى جاڭا كىتاپحانا قۇلبولدى كوشەسى، 1/2، 2-كورپۋس مەكەنجايى بويىنشا ساعات 08:30-20:00 ۋاقىت ارالىعىندا قالا تۇرعىندارى مەن قوناقتارى ءۇشىن دەمالىسسىز جۇمىس ىستەيدى.
بۇگىنگى تاڭدا الماتى قالاسىندا 31 قالا كىتاپحاناسى جۇمىس ىستەيدى، ولاردىڭ ۇشەۋى تاۋلىك بويى قىزمەت كورسەتەدى.