الماتىنىڭ ارنايى ەكونوميكالىق ايماعىنا 50 ملرد تەڭگەدەن استام ينۆەستيسيا تارتىلدى
الاتاۋ شاعىن اۋدانىنداعى «يننوۆاسيالىق تەحنولوگيالار پاركى» ارنايى ەكونوميكالىق ايماعى قۇرىلعان ساتتەن باستاپ 6 727 جۇمىس ورنىن قۇرىلدى، 50،69 ملرد.تەڭگە ينۆەستيسيا تارتىلدى، 34،7 ملرد. تەڭگەنىڭ سالىق جانە بيۋدجەتكە تولەنەتىن باسقا دا تولەمدەر تولەندى، 493،7 ملرد. تەڭگەنىڭ ءونىمى ءوندىرىلىپ، قىزمەتتەر كورسەتىلدى، ەكسپورت كولەمى 7،46 ملرد. تەڭگەگە جەتتى، دەپ حابارلايدى almaty-akshamy.kz سىلتەمە جاساپ https://t.me/almaty_akimat/19495
بۇگىندە «يتپ» اەا رەزيدەنتتەرى 160 كومپانيا، ونىڭ ىشىندە باعدارلامالىق قامتاماسىز ەتۋدى ازىرلەۋ سالاسىنداعى 105 كومپانيا («Kolesa Group»، «Azimut Labs»، «PayBox»، «ليچنايا كاسسا» جانە ت.ب.) قىزمەتىن «ەكساۋماقتىق» قاعيداتى بويىنشا جۇزەگە اسىرادى، 55 كومپانيا («Kaspi Cloud»، «Eltex Alatau»، «Nero Lab»، «Asaq»، «Prima Group»، «Almaty Enterprising Company» جانە ت.ب.) «يتپ» اەا اۋماعىندا ورنالاسقان.
2023 جىلى «يتپ» اەا-عا 15 ملرد. تەڭگە كولەمىندە ينۆەستيسيا تارتىلىپ، 1200 جۇمىس ورنى اشىلىپ، 39 كومپانيا جاڭا قاتىسۋشى رەتىندە قابىلداندى، جوبالاردى ىسكە اسىرۋ ءۇشىن اۋدانى 15 گا 7 جەر تەلىمى ءبولىندى.
«يتپ» اەا الماتى قالاسىنىڭ مەدەۋ اۋدانىندا 163 گا اۋماقتا ورنالاسقان. مەملەكەت بارلىق ينجەنەرلىك-كوممۋنالدىق ينفراقۇرىلىمنىڭ، سونىمەن قاتار، ءبىرىنشى كەزەكتەگى عيماراتتاردىڭ، اكىمشىلىك عيماراتتىڭ قۇرىلىسىن جۇزەگە اسىردى. «يتپ» اەا قاتىسۋشىلارىنا سالىق جانە كەدەندىك جۇكتەمەنى تومەندەتۋدە ءتۇرلى ارتىقشىلىقتار مەن جەڭىلدىكتەر بەرىلەدى.
«يتپ» اەا اۋماعىنداعى نەگىزگى باسىم قىزمەت تۇرلەرى IT، تەلەكوممۋنيكاسيا جانە بايلانىس، ەلەكترونيكا، جاڭارتىلاتىن ەنەرگيا كوزدەرى، رەسۋرستاردى ۇنەمدەۋ جانە تابيعاتتى ءتيىمدى پايدالانۋ، سونىمەن بىرگە، 2020 جىلدان باستاپ فارماسيەۆتيكا جانە مەديسينالىق بۇيىمدار كىردى.