الماتىدا 14 مەديسينالىق ۇيىم جانىنان جاستار دەنساۋلىق ورتالىعى اشىلدى. مۇندا 10 بەن 29 جاس ارالىعىنداعى قالا تۇرعىندارى مىندەتتى الەۋمەتتىك مەديسينالىق ساقتاندىرۋ (ءمامس) اياسىندا مەديسينالىق، پسيحولوگيالىق جانە الەۋمەتتىك كومەك الا الادى. بۇل تۋرالى الماتى قالاسى قوعامدىق دەنساۋلىق باسقارماسىندا حابارلادى.
مۇنداي ورتالىقتاردىڭ نەگىزگى مىندەتى – جاسوسپىرىمدەر مەن جاستارعا دارىگەرلەر مەن پسيحولوگتاردان كەڭەس الۋعا، جەكە جانە الەۋمەتتىك ماسەلەلەردى شەشۋگە، سالاۋاتتى ءومىر سالتى تۋرالى ءبىلىم الۋعا مۇمكىندىك بەرەتىن سەنىمدى ورتا قالىپتاستىرۋ. مۇندا وتىنىشتەردىڭ قۇپيا تۇردە قاراستىرىلۋىنا كەپىلدىك بەرىلەدى.
رەپرودۋكتيۆتى دەنساۋلىققا، جىنىستىق جولمەن بەرىلەتىن ينفەكسيالاردىڭ الدىن الۋعا جانە وتباسىلارعا پسيحولوگيالىق قولداۋ كورسەتۋگە باسا نازار اۋدارىلادى. جەكە كونسۋلتاسيالاردان باسقا ماماندار ترەنينگتەر، سەمينارلار، سپورتتىق جانە مادەني ءىس-شارالار ۇيىمداستىرادى.
№36 قالالىق ەمحانا جانىنداعى «سالاۋاتتى جاستار» ورتالىعى سونداي تابىستى جوبالاردىڭ ءبىرى. بىلتىر عانا بۇل ورتالىقتىڭ قىزمەتىن شامامەن 2،5 مىڭ الماتىلىق پايدالانعان. ونىڭ بازاسىندا قۇرىلعان ەرىكتىلەر كلۋبىندا ناۋرىزباي اۋدانىنىڭ وقۋشىلارى توپپەن جۇمىس ىستەۋدى، كوشباسشىلىقتى جانە الەۋمەتتىك جوبالاردى جۇزەگە اسىرۋدى ۇيرەنەدى.
«بۇرىن دارىگەرگە سۇراق قويۋعا قىمسىناتىنمىن. ال بۇل ورتالىقتا ءوزىمدى ەركىن سەزىنەمىن. مۇنداعى مامانداردىڭ ءبارى اشىق-جارقىن. اڭگىمەلەسىپ، سىرلاسۋعا دا بولادى. بۇل ماعان ۇلكەن قولداۋ بەرەدى»، – دەيدى ورتالىققا كەلۋشى جاستىڭ ءبىرى.
ايتا كەتەيىك، جاستار دەنساۋلىق ورتالىقتارى №4، 5، 7، 11، 12، 16، 23، 26، 29 جانە 36 قالالىق ەمحانالاردا، سونداي-اق، مەدەۋ اۋداندىق قپمسك-دە، «Almaty clinic» مەديسينالىق ورتالىعىندا، ءقاۇوو مەن «مەدسەرۆيسحيرۋرگيادا» جۇمىس ىستەپ تۇر. بۇل ورتالىقتارعا جاسوسپىرىمدەر مەن جاستار تىركەۋىنە نەمەسە تۇرعىلىقتى جەرىنە قاراماستان جۇگىنە الادى.