اۋانى لاستاۋدىڭ نەگىزگى كوزدەرى اۆتوكولىك شىعارىندىلارى، جىلۋ ەنەرگەتيكالىق كەشەندەر (جەو-2،3)، الماتى مەن الماتى اگلومەراسياسىنىڭ گازداندىرىلماعان ۇيلەرى مەن ساياجايلارى، وندىرىستىك كاسىپورىندار بولىپ تابىلادى. تىعىز سالىنعان نۇكتەلى قۇرىلىستار قالانى جەلدەتۋدى تومەندەتىپ، اۋانىڭ لاستانۋ دەڭگەيىنە كەرى اسەر ەتدۋ. بۇل تۋرالى "الماتىنى 2025 جىلعا دەيىن دامىتۋ باعدارلاماسى جانە 2030 جىلعا دەيىنگى نەگىزگى باسىمدىقتاردا" ايتىلعان.
2021 جىلى زالالدى زاتتاردىڭ جالپى كولەمى 127 مىڭ توننانى قۇرادى. ونىڭ ىشىندە 70 مىڭ توننا – اۆتوكولىكتەن، 46 مىڭ توننا – ستاسيونارلىق كوزدەردەن (ونىڭ ىشىندە 36 مىڭ توننا جەو-2)، 11 مىڭ توننا-جەكە سەكتوردان.
ازىرلەنگەن الماتى قالاسىن 2025 جىلعا دەيىن جانە ورتا مەرزىمدى پەرسپەكتيۆالاردى 2030 جىلعا دەيىن دامىتۋ باعدارلاماسى اياسىندا اۋاعا كەرى اسەر ەتەتىن زالالدى زاتتاردى ازايتۋ جانە قورشاعان ورتانى جاقسارتۋ بويىنشا كەزەڭ-كەزەڭمەن جۇزەگە اساتىن شارالار ازىرلەندى. الماتىدا 2023 جىلعا دەيىنگى دامۋ باعدارلاماسىنا سايكەس پايدالانىلعان گازداردىڭ ۋىتتىلىعى مەن تۇتىندىگى نورمالارىنا سايكەستىگىنە اۆتوموبيل شىعارىندىلارىن ولشەۋدى جۇرگىزۋ قاعيدالارى قابىلدانادى، اۆتوكولىكتەرگە ەكولوگيالىق سىنىپ بەرۋ تۋرالى رەگلامەنت ازىرلەنەدى. قۇجات ەۋرازيالىق ەكونوميكالىق وداقتىڭ ەكوماركيروۆكا جاساۋ جونىندەگى تەحرەگلامەنتىنە سايكەس بولادى.
2025 جىلعا دەيىن اۋانى لاستايتىن زالالدى زاتتاردىڭ دەڭگەيى تومەن ايماقتارعا كولىكتىڭ كىرۋىن شەكتەۋ ءۇشىن اۆتوموبيلدەر ەكوماركيروۆكالانادى. 2025 جىلدىڭ سوڭىنا دەيىن كوممۋنالدىق تەحنيكا – ديزەل وتىنىمەن جۇمىس ىستەيتىن 3،4 مىڭ بىرلىك ارنايى تەحنيكا مەن اۆتوبۋس سىعىمدالعان تابيعي گاز بەن ەلەكتر تارتىمىنا اۋىستىرىلادى. بۇل زالالادى زاتتاردى جىلىنا 1 مىڭ تونناعا ازايتۋعا مۇمكىندىك بەرەدى. 2025 جىلعا دەيىن 1200 ديزەلدى اۆتوبۋس گاز بەن ەلەكتر تارتىمىنا اۋىسادى. بۇل شىعارىندىلاردى جىلىنا 2 مىڭ تونناعا ازايتۋعا مۇمكىندىك بەرەدى. سونداي-اق، سىعىمدالعان تابيعي گازبەن جۇرەتىن اۆتوبۋستار ءۇشىن جاڭا ينفراقۇرىلىم سالۋ جانە ت. ب. جوسپارلانۋدا.
سونداي-اق جەكە (2025 ج.) جانە قوعامدىق ەلەكتر كولىگىن (2030 ج.) زاريادتاۋ ءۇشىن ينفراقۇرىلىم جەلىلەرى جاسالادى. 2030 جىلعا قاراي ەلەكتر اۆتوبۋستارى ءۇشىن 3 جاڭا زاماناۋي دەپو پايدالانۋعا بەرىلەدى.