الماتىدا قالىڭ قاردان كەيىن كوشەلەردى ۇزدىكسىز تازالاۋ جۇمىستارى جالعاسىپ جاتىر.
قار 16 قاڭتار كۇنى تاڭەرتەڭ باستالىپ، «قازگيدرومەت» رمك بولجامىنا سايكەس، بىردە توقتاپ، بىردە جاۋىپ 18 قاڭتاردىڭ تاڭىنا دەيىن جالعاسادى. 17 قاڭتار ساعات 08:00-دەگى جاعداي بويىنشا قالاعا 15 سم-دەن استام قار ءتۇستى. بۇل تۋرالى الماتى قالاسىنىڭ كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلدەرى ايتتى.
مەتەورولوگيالىق ستانسيالاردىڭ دەرەگىنە سايكەس، قار جامىلعىسىنىڭ بيىكتىگى مىناداي: اۆياسيالىق مەتەوستانسيا «اۋەجايدا» — 11 سم، «كامەنسك ءۇستىرتى» مەتەوستانسياسىندا — 38 سم، «شىمبۇلاق» مەتەوستانسياسىندا — 49 سم. كوممۋنالدىق قىزمەت قار جاۋا باستاعان ساتتەن باستاپ كۇشەيتىلگەن تاۋلىك بويى جۇمىس رەجيمىنە كوشكەن. جۇمىستارعا 2،8 مىڭنان استام جول سالاسى جۇمىسشىسى جانە 1 250 بىرلىك ارنايى تەحنيكا جۇمىلدىرىلعان.
قوزعالىس قاۋىپسىزدىگىن قامتاماسىز ەتۋ ءۇشىن 75 جەدەل بريگادا جۇمىس ىستەپ، ىلدي، ءدوڭ جانە جولايىرىقتارعا كوكتايعاققا قارسى قوسپا سەبىلگەن. قار باستالعانعا دەيىن جولعا الدىن الا كوكتايعاققا قارسى رەاگەنتتەر جانە ارنايى قوسپالار سەبىلدى. بۇل قار قالىڭ جاعدايدا دا مۇز قاتپاي، كولىكتىڭ تەپە-تەڭدىگىن ساقتاۋعا مۇمكىندىك بەردى. كەيبىر ۋچاسكەدە قاردىڭ جينالۋى ۇزاققا سوزىلعان جاۋىن-شاشىن مەن تەمپەراتۋرانىڭ اۋىتقۋىنا بايلانىستى، سونىڭ سالدارىنان قاردىڭ ەرىپ-قاتۋ ۇدەرىسى جۇرگەن.
شاعىن كولەمدى ارنايى تەحنيكا تروتۋارلار مەن قوعامدىق كەڭىستىكتەردى تەحنيكا كومەگىمەن تازارتىپ جاتىر، ال قوعامدىق كولىك ايالدامالارى، جەرۇستى وتكەلدەرى، باسپالداقتار مەن پاندۋستار قولمەن تازالانۋدا. تۇنگى ۋاقىتتا ەكى كەزەڭمەن قار سىرىپ تازالاۋ جۇرگىزىلىپ، جاپپاي قار شىعارۋ ۇيىمداستىرىلدى. قالانىڭ نەگىزگى ماگيسترالدارى مەن قوعامدىق اۋماقتارىنان 3 مىڭ تەكشە مەتردەن استام قار شىعارىلدى. تازالاۋ كەزىندە قوعامدىق كولىك باعىتتارىنا، مەديسينالىق جانە ءبىلىم بەرۋ نىساندارىنا كىرەبەرىستەرگە، سونداي-اق جۇرگىنشىلەر قوزعالىسى قارقىندى ۋچاسكەلەرگە باسىمدىق بەرىلەدى. كەزەكشى بريگادالار جولدىڭ جاي-كۇيىن تاۋلىك بويى باقىلاپ، قاجەت بولعان جاعدايدا ەڭ كۇردەلى باعىتتاردا جۇمىستاردى جەدەل كۇشەيتەدى.
قالالىق قىزمەت جۇرگىزۋشىلەردەن مۇمكىندىگىنشە كولىگىن جول جيەگىندە قالدىرماۋدى جانە ارنايى تەحنيكانىڭ قوزعالىسىنا كەدەرگى كەلتىرمەۋدى سۇرايدى. تۇرعىنداردىڭ قولداۋى كوشەلەردە ءقاۋىپسىز ءارى جايلى قوزعالىستى تەزىرەك قامتاماسىز ەتۋگە مۇمكىندىك بەرەدى. جاعداي جاۋاپتى بولىمشەلەردىڭ تۇراقتى باقىلاۋىندا، بۇل جۇمىس قالا قاردان تولىق تازارعانعا دەيىن جالعاسادى.