الماتىدا قالالىق ءماسليحات دەپۋتاتتارى تۇرعىندارمەن ەسەپتىك كەزدەسۋلەردى تۇراقتى تۇردە وتكىزىپ كەلەدى. مۇنداي كەزدەسۋلەر اشىق فورماتتا ءتۇرلى قوعامدىق الاڭداردا وتەدى: مەديسينا مەكەمەلەرىندە، الەۋمەتتىك باعىتتاعى ۇيىمداردا، كولىك قۇرىلىمدارىندا جانە اۋداندىق ورتالىقتاردا. نەگىزگى ماقسات – اشىق ديالوگ ورناتۋ، اتقارىلعان جۇمىستاردى سارالاپ، وزەكتى ماسەلەلەر بويىنشا ورتاق شەشىم تابۋ.
⠀
ەكىنشى توقساندا دەپۋتاتتار سايلاۋشىلار الدىندا اتقارىلعان جۇمىستارى جانە نەگىزگى ناتيجەلەر جونىندە ەسەپ بەردى. كەزدەسۋلەردە «AMANAT» پارتياسىنىڭ سايلاۋالدى باعدارلاماسىنىڭ الماتى قالاسى بويىنشا بەس باسىم باعىتتاعى ىسكە اسۋ بارىسى تانىستىرىلدى: ەكونوميكا، ينفراقۇرىلىم، ءبىلىم مەن دەنساۋلىق ساقتاۋ سالاسىن دامىتۋ، ءقاۋىپسىز قالا ورتاسىن قالىپتاستىرۋ، مادەنيەت پەن جاستار ساياساتىن قولداۋ.
ماسەلەن، دەپۋتات ەلەنا ءتو مەدەۋ اۋدانىنىڭ پمسپ ورتالىعى بازاسىندا كەزدەسۋ وتكىزىپ، تۇرعىندارمەن كوك-جايلاۋ قۇرىلىسى، سپورت سەكسيالارىنىڭ قولجەتىمدىلىگى، پيك جۇمىسى جانە «شىمبۇلاق» تاۋ-شاڭعى كۋرورتىنىڭ شامادان تىس جۇكتەمەسى ماسەلەلەرىن تالقىلادى.
دەپۋتات ديانا ەرلان دا اتقارعان جۇمىستارىنىڭ قورىتىندىسىن تانىستىرسا، ايگۇل شالبايەۆا ورتالىق قالالىق كلينيكالىق اۋرۋحانادا وتكەن كەزدەسۋدە جۇزەگە اسىرىلىپ جاتقان باستامالار مەن باسىمدىقتار تۋرالى ەگجەي-تەگجەيلى ايتتى.
الماتى كولىك حولدينگىندە وتكەن كەزدەسۋدە دەپۋتات سادير حامرايەۆ قالالىق ينفراقۇرىلىمدى دامىتۋ، كولىك ۇلگىسىن جاڭارتۋ، الەۋمەتتىك نىساندار سالۋ جانە 2025–2027 جىلدارعا ارنالعان بيۋدجەت وزگەرىستەرى جونىندە بايانداما جاسادى.
كريستينا بەكمۋرزايەۆا ءوزىنىڭ ەسەپتىك كەزدەسۋىن بەلسەندى ۇزاق ءومىر ءسۇرۋ ورتالىعىندا وتكىزىپ، ەكىنشى توقساندا جولدانعان دەپۋتاتتىق ساۋالدار تۋرالى ايتىپ بەردى. ءبىرقاتار ماسەلەلەر بويىنشا وڭ ناتيجەلەرگە قول جەتكىزىلگەن. وندا بالالار ۇيلەرىنىڭ تۇلەكتەرىن جۇمىسقا ورنالاستىرۋدان، مۇمكىندىگى شەكتەۋلى توپتارعا جەڭىلدىكتەر مەن قىزمەتتەر الۋدان باستاپ كولىكتىك قولجەتىمدىلىكتى جاقسارتۋعا، اۋلالاردى اباتتاندىرۋعا جانە جەكە تۇرمىستىق جاعدايلاردى شەشۋگە جاردەمدەسۋگە دەيىنگى الەۋمەتتىك ماسەلەلەردىڭ كەڭ اۋقىمى قوزعالدى. ءبىرقاتار وتىنىشتەر بويىنشا وڭ ناتيجەلەر بار. سونىمەن قاتار، ازاماتتاردى قابىلداۋعا جانە مەملەكەتتىك ورگاندارمەن تىعىز بايلانىس ورناتۋعا ەرەكشە كوڭىل بولىنۋدە.
دەپۋتات قاراشاش جۇزەيەۆا ءوز ەسەبىندە ءبىرىنشى جارتىجىلدىقتا 40-قا جۋىق دەپۋتاتتىق ساۋال جولدانعانىن اتاپ ءوتتى. ناتيجەسىندە جارىقتاندىرۋ قالپىنا كەلتىرىلىپ، شۇڭقىرلى جولدار جوندەلىپ، قاڭعىباس جانۋارلار ۇستالىپ، اعاشتار زيانكەستەرگە قارسى وڭدەلگەن. كەيبىر جاعدايلاردا اتاۋلى قايىرىمدىلىق كومەگى دە كورسەتىلدى.