الماتى قالاسى پوليسيا دەپارتامەنتىندە اقپاراتتىق ساياسات، قىزمەتتىك ءتارتىپ جانە جەكە قۇرام اراسىندا زاڭدىلىقتىڭ ساقتالۋى ماسەلەلەرىنە ارنالعان قورىتىندى كەڭەس ءوتتى.
جيىندى الماتى قالاسى پد باستىعىنىڭ ورىنباسارى ءادىلعوجا قۇسايىنوۆ جۇرگىزدى، - دەپ حابارلايدى aqshamnews.kz.
كەڭەس بارىسىندا وتكەن كەزەڭدەگى جۇمىس ناتيجەلەرى قارالىپ، قىزمەتتىك ءتارتىپتى بۇزۋدىڭ تيپتىك جاعدايلارى تالداندى. سونداي-اق جاۋاپتى، كاسىبي جانە زاڭ تالاپتارىن مۇلتىكسىز ساقتايتىن پوليسيا ورتاسىن قالىپتاستىرۋعا باعىتتالعان نەگىزگى تاسىلدەر ايقىندالدى. بارلىق دەڭگەيدەگى باسشىلاردىڭ ءوز بولىمشەلەرىندەگى ءتارتىپتىڭ جاي-كۇيى ءۇشىن جەكە جاۋاپكەرشىلىگىنە، قۇقىق بۇزۋشىلىقتاردىڭ الدىن الۋعا، قىزمەتتىك ادالدىققا جات كەز كەلگەن ارەكەتكە توزبەۋشىلىك قاعيداتىن قالىپتاستىرۋعا ەرەكشە نازار اۋدارىلدى.
— ءتارتىپ — بۇل فورمالدىلىق تا، ستاتيستيكا دا ەمەس. بۇل — كۇندەلىكتى قىزمەتكە، ادامدارعا جانە زاڭعا دەگەن كوزقاراس. ءاربىر باسشى تەك كورسەتكىشتەر ءۇشىن عانا ەمەس، ءوز قاراماعىنداعى قىزمەتكەرلەردىڭ ءتارتىبى ءۇشىن دە جاۋاپ بەرەدى. جۇيە ىشىندەگى كەز كەلگەن زاڭ بۇزۋشىلىق ازاماتتاردىڭ پوليسياعا دەگەن سەنىمىن السىرەتەدى. سوندىقتان زاڭدىلىق قاعيداتى بارشاعا بىردەي، ەشبىر ەرەكشەلىكسىز ورىندالۋى ءتيىس، — دەپ تۇيىندەدى ءادىلعوجا قۇسايىنوۆ.
كەڭەس قورىتىندىسى بويىنشا قىزمەتتىك قۇقىق بۇزۋشىلىقتاردىڭ الدىن الۋدى كۇشەيتۋگە، باسقارۋشىلىق جاۋاپكەرشىلىكتى ارتتىرۋعا جانە پوليسيا قاتارىندا تۇراقتى زاڭعا باعىنۋ مادەنيەتىن قالىپتاستىرۋعا باعىتتالعان ناقتى تاپسىرمالار بەرىلدى.