بۇلاردىڭ قاتارىنا يەمەن، سۋدان، وڭتۇستىك سۋدان، گازا سەكتورى جانە باسقا دا افريكا ەلدەرى كىرەدى.
بۇۇ ازىق-تۇلىك جانە اۋىل شارۋاشىلىعى ۇيىمىنىڭ ديرەكتورى ولەگ كوبياكوۆ ريا نوۆوستيگە بەرگەن سۇحباتىندا الەمنىڭ 17 ەلىندە ازىق-تۇلىك ماسەلەسى شيەلەنىسۋى مۇمكىن ەكەنىن ايتتى، دەپ حابارلايدى Almaty-akshamy.kz
"اشتىققا ۇشىراعاندار سانى تۋرالى قۇجات بار - بۇل دۇنيەجۇزىلىك ازىق-تۇلىك باعدارلاماسىمەن بىرگە شىعارىلعان قۇجات، وندا اشتىق دەندەگەن ەلدەر كورسەتىلەدى.... مۇنداي اقپارات تاياۋ كۇندە عانا شىقتى جانە قازىرگى تەندەنسيا ساقتالاتىن بولسا الەمنىڭ تاعى 17 ەلىندە ازىق-تۇلىككە قاتىستى احۋال ناشارلاۋى مۇمكىن دەپ بولجانىپ وتىر"، - دەدى كوبياكوۆ.
ول اشارشىلىق دەندەگەن ءداستۇرلى ەلدەر قاتارىنا يەمەن، سۋدان، وڭتۇستىك سۋدان، گازا سەكتورى جانە قارۋلى قاقتىعىستار، كليماتتىڭ وزگەرۋىنىڭ جاعىمسىز اسەرلەرى، تابيعي اپاتتار بولعان باسقا دا ءبىرقاتار افريكا ەلدەرى كىرەتىنىن ايتتى.
بۇۇ ازىق-تۇلىك جانە اۋىلشارۋاشىلىعى ۇيىمى (Food and Agriculture Organization - فاو) - بۇل ءارتۇرلى ەلدەردىڭ ازىق-تۇلىك رەسۋرستارى مەن اۋىل شارۋاشىلىعىن دامىتۋ ماسەلەلەرىمەن اينالىساتىن ۇكىمەتارالىق حالىقارالىق ۇيىم. ۇيىم اشتىقپەن كۇرەسۋگە باعىتتالعان حالىقارالىق قىزمەتتە جەتەكشى ءرول اتقارادى.