الاتاۋ اۋدانىندا جارىقتاندىرۋ جۇيەسى تولىق جاڭارتىلىپ جاتىر

الماتىدا سىرتقى جارىقتاندىرۋ جۇيەسىن جاڭعىرتۋ باعدارلاماسى جالعاسىپ كەلەدى. الاتاۋ اۋدانىندا بۇرىن جارىقپەن تولىق قامتاماسىز ەتىلمەگەن كوشەلەر مەن اۋماقتاردا جارىق جەلىلەرىن قايتا قۇرۋ جۇمىستارى قولعا الىندى. بۇل تۋرالى الاتاۋ اۋدانى اكىمدىگىنىىڭ وكىلدەرى حابارلادى.

جوبالىق-سمەتالىق قۇجاتتاما 2024 جىلى ازىرلەنىپ، جالپى 255 اۋماقتى قامتيدى. ولار اۋدان اۋماعىنداعى كوشەلەر، وتكەلدەر مەن اۋلالار.

قازىرگى ۋاقىتتا قۇرىلىس-مونتاج جۇمىسى بورالداي، مادەنيەت، 13–14-تەرريتوريا، وجەت، تەرەكتى، شاپاعات، دارحان–بايبەسىك، التىن-الما، توميريس، قاراسۋ، ايگەرىم-1،2، شاڭىراق-1،2، ۇلجان-1،2، اقبۇلاق، زەردەلى، سامعاۋ جانە كوكقاينار شاعىناۋداندارىندا جۇرگىزىلىپ جاتىر.

بۇگىندە 2 870 جارىق باعانى مەن 3 390 جارىق نۇكتەسى ورناتىلدى.

جالپى جوبا بويىنشا 2 900 جارىق باعانىن، 3 550 شام ورناتۋ، جارىق جەلىلەرىنىڭ ۇزىندىعىن 93 شاقىرىمعا جەتكىزۋ كوزدەلگەن.

قۇرىلىس-مونتاج جۇمىسىن وسى جىلدىڭ قاراشا ايىنىڭ سوڭىنا دەيىن اياقتاۋ جوسپارلانعان. جوبا تولىق ىسكە اسقاننان كەيىن الاتاۋ اۋدانى 100% جارىقتاندىرىلادى.