الماتىنىڭ الەۋمەتتىك دامۋى قالا ءۇشىن باسىم باعىت بولىپ قالا بەرەدى. بۇل تۋرالى ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا مەگاپوليس اكىمى دارحان ساتىبالدى مالىمدەدى.
قالانىڭ وركەندەۋى تەك ەكونوميكالىق كورسەتكىشتەرمەن ەمەس، ەڭ الدىمەن حالىقتىڭ ءومىر ءسۇرۋ ساپاسىمەن ولشەنەدى. وسى تۇرعىدان العاندا، الەۋمەتتىك دامۋ – قالا تۇرعىندارىنىڭ ءال-اۋقاتىن ارتتىرۋدىڭ باستى تەتىگى.
ءبىلىم بەرۋ، دەنساۋلىق ساقتاۋ، مادەنيەت، الەۋمەتتىك قامسىزداندىرۋ سياقتى سالالاردىڭ دامۋى – ءاربىر ادامنىڭ كۇندەلىكتى ومىرىمەن تىكەلەي بايلانىستى. بالالاردىڭ ساپالى ءبىلىم الۋى، تۇرعىنداردىڭ قولجەتىمدى مەديسيناعا جۇگىنۋى، كوپبالالى وتباسىلار مەن قارتتاردىڭ الەۋمەتتىك قورعالۋى – بۇنىڭ ءبارى قالادا الەۋمەتتىك تەڭدىك پەن تۇراقتىلىقتى قالىپتاستىرادى.
الەۋمەتتىك ينفراقۇرىلىمدى جاڭارتۋ، جاڭا مەكتەپتەر مەن اۋرۋحانالار سالۋ، بالاباقشا ورىندارىن كوبەيتۋ، قوعامدىق كولىكتى جەتىلدىرۋ – تۇرعىنداردىڭ ءومىر سۇرۋىنە قولايلى جاعداي جاساپ، ولارعا جايلى ورتا قالىپتاستىرادى. بۇل تەك تۇرمىستىق دەڭگەيدە عانا ەمەس، ازاماتتاردىڭ بولاشاققا سەنىممەن قاراۋىنا، قوعامداعى بەلسەندىلىگى مەن جاۋاپكەرشىلىگىنىڭ ارتۋىنا دا ىقپال ەتەدى. سوندىقتان الەۋمەتتىك دامۋ – تەك اكىمشىلىك ماقسات ەمەس، ول – حالىقتىڭ جۇرەگىنە جول تاباتىن ەڭ ماڭىزدى ستراتەگيالىق باسىمدىق.
دارحان ساتىبالدىنىڭ ايتۋىنشا، الماتىدا ءبىلىم بەرۋ جانە مەديسينالىق مەكەمەلەر جەلىسىن كەڭەيتۋ بويىنشا جۇيەلى جۇمىس جالعاسىپ جاتىر. جاقىن ۋاقىتتا 16 جاڭا بالاباقشانى پايدالانۋعا بەرۋ جوسپارلانىپ وتىر. سونىمەن قاتار جەكەمەنشىك بالاباقشالاردا 10 000 قوسىمشا ورىن اشۋعا مەملەكەتتىك تاپسىرىس بار. اتالعان شارالار 2030 جىلعا قاراي 2-6 جاس ارالىعىنداعى بالالاردى مەكتەپكە دەيىنگى بىلىممەن قامتۋدى 99 پايىزعا جەتكىزۋگە مۇمكىندىك بەرەدى. سونداي-اق «الماتى مەكتەپ ستاندارتىنا» سايكەس، وقۋشى ورىندارىنىڭ تاپشىلىعىن كەزەڭ-كەزەڭىمەن ازايتۋ ماقساتىندا الداعى 5 جىلدا 16 مەكتەپ پەن 7 قوسىمشا عيمارات سالۋ كوزدەلگەن.
«دەنساۋلىق ساقتاۋ سالاسىندا ءبىرىڭعاي ستاندارتقا سايكەس قالاداعى 475 مىڭ تۇرعىندى مەديسينالىق قىزمەتپەن قامتيتىن مەديسينالىق-سانيتارلىق العاشقى كومەك كورسەتەتىن 11 نىسان سالىنادى. سونىمەن قاتار 3 پەرزەنتحانانىڭ، 2 زاماناۋي ستاسيوناردىڭ، سونداي-اق 250 ورىنعا ارنالعان حوسپيس پەن سپيد ورتالىعىنىڭ قۇرىلىسى باستالادى. مەديسينالىق ينفراقۇرىلىمدى جاڭعىرتۋ ماقساتىندا 4 نەگىزگى ستاسيونار مەن 2 كلينيكالىق اۋرۋحاناعا اۋقىمدى قايتا جاڭعىرتۋ جۇمىستارى جۇرگىزىلەدى. بۇدان بولەك، 1،5 ملن تۇرعىندى قامتيتىن 16 قوسىمشا جەدەل مەديسينالىق جاردەم ستانسياسى سالىنادى»، – دەدى دارحان ساتىبالدى.
قالانىڭ الەۋمەتتىك دامۋى – تۇرعىنداردىڭ كۇندەلىكتى ءومىر ساپاسىنىڭ باستى كورەتكىشى. الەۋمەتتىك سالاعا جۇمسالعان ءاربىر ينۆەستيسيا – تۇرعىنداردىڭ دەنساۋلىعى مەن بولاشاعىنا باعىتتالعان قادام. ءبىلىم مەن مەديسيناعا، مادەنيەت پەن الەۋمەتتىك قولداۋعا باسىمدىق بەرۋ ءار ازاماتتىڭ ءوزىن ءقاۋىپسىز، باعالى ءارى قاجەت سەزىنۋىنە جول اشادى. سوندىقتان دا الەۋمەتتىك دامۋ تۇراقتى، وركەنيەتتى قوعامنىڭ نەگىزى بولىپ قالا بەرەدى.