الماتىدا مۋزىكا، زاماناۋي ونەر، تەاتر جانە بەلسەندى دەمالىستى توعىستىراتىن اۋقىمدى قىسقى قالالىق فەستيۆال – «پانفيلوۆتاعى جاڭا جىل» باستالدى.
جوبا مەگاپوليستىڭ باستى جاڭا جىلدىق الاڭدارىنىڭ بىرىنە اينالىپ، 21 جەلتوقساننان باستاپ پانفيلوۆ كوشەسىندە ءوتىپ جاتىر. فەستيۆالدىڭ اشىلۋى جاس ءارى تالانتتى ديدجەيلەردى قولداۋعا ارنالادى.
21-30 جەلتوقسان ارالىعىندا مۇندا DJ-مارافون وتەدى: ىرىكتەۋدەن وتكەن 15 قاتىسۋشى كۇن سايىن ساعات 17:00-دەن 22:00-گە دەيىن ءارقايسىسى ەكى ساعاتتىق سەتتەرىن ۇسىنادى. بايقاۋ قالالىق مۋزىكانىڭ جاڭا تولقىنى وكىلدەرىن بىرىكتىرىپ، ۇزدىك قاتىسۋشىلار فەستيۆال سەرىكتەستەرىنەن سىيلىقتار مەن جۇلدەلەر الادى. مۋزىكالىق باعدارلاما پانفيلوۆ كوشەسىن اشىق اسپان استىنداعى جاندى ساحناعا اينالدىرادى.
مۋزىكامەن قاتار فەستيۆالدىڭ كوركەمدىك باعىتى دا دامىماق. 16 جەلتوقساندا «ەكو-شىرشا الماتى» بايقاۋىنىڭ open-call كەزەڭى اياقتالعان بولاتىن. بايقاۋعا مەكتەپ وقۋشىلارى، تاۋەلسىز سۋرەتشىلەر، ديزاينەرلەر مەن شىعارماشىلىق ۇجىمداردان 30-دان استام ءوتىنىم ءتۇستى. ىرىكتەۋ ناتيجەسىندە فينالعا وتكەن 15 قاتىسۋشىنىڭ جۇمىستارى فەستيۆال اياسىندا جۇزەگە اسىرىلىپ، كوپشىلىككە ۇسىنىلادى. ءار فيناليستكە قايتا وڭدەلگەن جانە ەكىنشى رەتتىك ماتەريالداردان ارت-شىرشا جاساۋ ءۇشىن 100 مىڭ تەڭگە كولەمىندە گرانت بولىنگەن.
بايقاۋ قورىتىندىسى مەن جەڭىمپازدار نەگىزگى مەرەكە كۇندەرى جاريالانىپ، ۇزدىك اۆتورلار اقشالاي سىيلىققا يە بولادى. فەستيۆالدىڭ ەڭ ماڭىزدى كەزەڭى 27-28 جەلتوقساندا وتەدى. بۇل كۇندەرى پانفيلوۆ كوشەسىندە ءۇش مەترلىك ماريونەتكالار، اكتەرلەر جانە جارىق ەففەكتىلەرى قاتىساتىن يممەرسيۆتى تەاترلاندىرىلعان قويىلىم كورسەتىلەدى.
شوۋ الماتىعا ارنايى جازىلعان جاڭا قالالىق ەرتەگىگە نەگىزدەلىپ، كورەرمەندەرگە كەيىپكەرلەرمەن تىكەلەي قارىم-قاتىناس ورناتۋعا مۇمكىندىك بەرەدى. قويىلىم بالالارعا دا، ەرەسەكتەرگە دە ارنالعان جانە جاڭا جىلدىق باعدارلامانىڭ ەڭ اسەرلى وقيعالارىنىڭ ءبىرى بولماق. سونداي-اق وسى كۇندەرى فەستيۆال اۋماعىندا قالالىق snow-park اشىلىپ، كورسەتىلىمدىك سىرعاناۋلار مەن جارىستار ۇيىمداستىرىلادى. سونىمەن قاتار جاس مۋزىكانتتار بايقاۋى ءوتىپ، جاڭا ەسىمدەر مەن قالالىق قاۋىمداستىقتاردى قولداۋ جالعاسادى.
ۇيىمداستىرۋشىلاردىڭ ايتۋىنشا، «پانفيلوۆتاعى جاڭا جىل» – بۇل كوشەنى مەرەكەلىك بەزەندىرۋ عانا ەمەس، مادەنيەت، ەكولوگيا، مۋزىكا جانە جاندى قارىم-قاتىناستى بىرىكتىرەتىن زاماناۋي قالالىق ءداستۇر قالىپتاستىرۋعا باعىتتالعان جوبا. فەستيۆال الماتى تۇرعىندارى مەن قوناقتارى ءۇشىن جاڭا جىل قارساڭىندا جارىققا، قوزعالىسقا جانە جاڭا قالالىق كوڭىل كۇيگە تولى اشىق كەڭىستىككە اينالماق.