الماتىدا 2025 جىلى جاستار اراسىندا ەسىرتكىگە تاۋەلدىلىكتىڭ الدىن الۋعا باعىتتالعان كەشەندى ءارى زاماناۋي ءتاسىل ەنگىزىلدى. قالادا الدىن الۋ، قايتا الەۋمەتتەندىرۋ، وقىتۋ، سيفرلىق مونيتورينگ جانە جاستاردى ەسىرتكى ناسيحاتىنا قارسى كۇرەسكە تارتۋ باعىتتارىن بىرىكتىرەتىن تۇراقتى ەكوجۇيە قالىپتاسىپ كەلەدى.
بۇل جۇمىستىڭ نەگىزگى تەتىگى الماتى قالاسىنىڭ جاستار ساياساتى باسقارماسى جۇزەگە اسىرىپ جاتقان «ناركوستوپ» جوباسى. قازىرگى تاڭدا الماتىدا 14-35 جاس ارالىعىنداعى جاستار اراسىندا ەسىرتكىگە تاۋەلدىلىگىنىڭ الدىن الۋعا باعىتتالعان 4 ارناۋلى ورتالىق جۇمىس ىستەپ تۇر. جوبا 2023-2025 جىلدارعا ارنالعان ەسىرتكىگە جانە ەسىرتكى بيزنەسىنە قارسى كۇرەستىڭ كەشەندى جوسپارىنا سايكەس جۇزەگە اسىرىلىپ جاتىر. اتالعان جوسپار 7 باعىت پەن 76 ءىس-شارانى قامتيدى. نەگىزگى ماقسات – جاستارعا اقپارات بەرىپ قانا قويماي، ولاردى ەسىرتكىنىڭ زاڭسىز اينالىمىنا قارسى ءىس-قيمىلعا تارتۋ ارقىلى ءقاۋىپسىز قالالىق ورتا قالىپتاستىرۋ.
2025 جىلدىڭ باسىنان بەرى جوبا اياسىندا 210-نان استام الدىن الۋ شارالارى وتكىزىلىپ، وعان 3،5 مىڭنان استام ەرىكتى قاتىستى. رەيد بارىسىندا ەسىرتكىگە قاتىستى سىلتەمەلەرى بار 18 مىڭنان استام ترافارەتتىك جازبا مەن گراففيتي انىقتالىپ، بويالىپ ءوشىرىلدى. بۇل شارالار قالالىق ورتاداعى ۆيزۋالدى ەسىرتكى ناسيحاتىنىڭ كولەمىن ايتارلىقتاي ازايتۋعا مۇمكىندىك بەردى. جوبانىڭ يننوۆاسيالىق باعىتتارىنىڭ ءبىرى – سيفرلىق قۇرالداردى دامىتۋ جانە «كيبەرۆولونتەرلىك» باستاماسىن ىسكە قوسۋ بولدى. 3 مىڭنان استام جاس ەرىكتى ينتەرنەت كەڭىستىكتى ۇنەمى باقىلاپ، زاڭسىز كونتەنتتى انىقتاپ، ءتيىستى ورگاندارعا جولداپ وتىرادى. ولاردىڭ جۇمىسىنىڭ ناتيجەسىندە 797 ينتەرنەت-رەسۋرس بۇعاتتالدى.
وسىلايشا، ونلاين كەڭىستىكتەگى قاۋىپتەردى تۇسىنەتىن جانە قالانىڭ سيفرلىق قاۋىپسىزدىگىنە ۇلەس قوساتىن جاڭا بۋىننىڭ بەلسەندى ازاماتتارى قالىپتاسىپ كەلەدى. ازيز كاجدەنبەكتىڭ ايتۋىنشا، قالا كەڭىستىگىن ەسىرتكى ناسيحاتىنان تازارتۋ عانا ەمەس، سونىمەن قاتار جاستار اراسىندا سانالى تاڭداۋ جاساۋ مادەنيەتى مەن دەنساۋلىققا جاۋاپكەرشىلىكپەن قاراۋ داعدىسىن قالىپتاستىرۋ باستى باسىمدىق بولىپ قالا بەرەدى. ونىڭ ايتۋىنشا، الماتىدان باستاۋ العان «ناركوستوپ» جوباسى بۇگىندە بۇكىل ەلدى قامتىعان اۋقىمدى قوزعالىسقا اينالدى. جوبا اياسىندا پەداگوگتار مەن يۋۆەنالدى پوليسيا قىزمەتكەرلەرىن دايارلاۋعا دا ەرەكشە كوڭىل ءبولىنىپ وتىر. ولار ءۇشىن تاۋەلدىلىكتىڭ الدىن الۋعا باعىتتالعان زاماناۋي تاسىلدەرگە ارنالعان وقىتۋ ترەنينگتەرى ۇيىمداستىرىلادى.
سونىمەن قاتار، پسيحيكالىق دەنساۋلىق ورتالىعى جانىندا ناۋقاستاردى قايتا الەۋمەتتەندىرۋگە باعىتتالعان شەبەرحانالار جۇمىس ىستەيدى. ولاردىڭ قاتارىندا قىش قۇمىرا جاساۋ، زەرگەرلىك ءىس جانە ءداستۇرلى قازاق قولونەرى – كيىز وڭدەۋ بار. Bip.house پلاتفورماسىمەن بىرلەسىپ، دەسترۋكتيۆتى كورىنىستەردىڭ الدىن الۋعا باعىتتالعان 10 بولىمنەن تۇراتىن جاستارعا ارنالعان ۆەرتيكالدى حيكايا ءتۇسىرىلدى. جوبانىڭ العاشقى ەكى سەرياسى 2،7 ميلليوننان استام قارالىم جيناعان.
2025 جىلى الماتىدا ءبىرقاتار ءىرى قالالىق ءىس-شارا ءوتتى. ولاردىڭ قاتارىندا AntiDope Fest فەستيۆالى، حالىقارالىق كونفەرەنسيا جانە NomadMMA «Almaty Open Cup» ءتۋرنيرى بار. دۇنيەجۇزىلىك ناشاقورلىققا قارسى كۇرەس كۇنى اياسىنداعى اۋقىمدى ءىس-شارا ماحاتما گاندي اتىنداعى ساياباقتا ۇيىمداستىرىلدى، ال مەترونىڭ توعىز بەكەتىندە اقپاراتتىق ناۋقان وتكىزىلدى.
سونىمەن قاتار، سەنات پەن ءماجىلىس دەپۋتاتتارىمەن، يۋۆەنالدى پوليسيا وكىلدەرىمەن جانە «امانات» پارتياسىمەن جۇمىس كەزدەسۋلەرى وتكىزىلدى. وندا كامەلەتكە تولماعاندار اراسىندا ەسىرتكىگە تاۋەلدىلىكتىڭ الدىن الۋعا قاتىستى زاڭنامانى جەتىلدىرۋ، ينتەرنەت كەڭىستىكتى رەتتەۋ جانە جاستاردى ەسىرتكى بيزنەسىنە تارتۋدىڭ الدىن الۋ شارالارى تالقىلاندى.
قورىتىندىلاي كەلە، «ناركوستوپ» جوباسى پروفيلاكتيكالىق جۇمىستىڭ ءتيىمدى، تەحنولوگيالىق جانە جاستاردىڭ تىكەلەي قاتىسۋىنا نەگىزدەلگەن ۇلگىسىن كورسەتتى. الماتىدا جاستاردىڭ قاۋىپسىزدىگى مەن دەنساۋلىعى مەملەكەتتىك دەڭگەيدەگى مىندەت قانا ەمەس، سونىمەن قاتار قازىرگى زامانعى قالالىق مادەنيەتتىڭ ماڭىزدى بولىگىنە اينالىپ كەلەدى.