الماتى قالاسىندا AMANAT پارتياسىنىڭ قالالىق فيليالى جانىنداعى كوممۋنالدىق ينفراقۇرىلىم، ەنەرگەتيكا، سۋمەن جابدىقتاۋ جانە قالالىق موبيلدىلىك جونىندەگى كەڭەستىڭ 2025 جىلعا ارنالعان قورىتىندى وتىرىسى ءوتتى.
وتىرىستا پارتيانىڭ سايلاۋالدى باعدارلاماسىن ىسكە اسىرۋ جونىندەگى جول كارتاسى اياسىندا سوڭعى ءۇش جىلدا الماتى قالاسىندا جۇزەگە اسىرىلعان ينفراقۇرىلىمدىق جانە كولىك جوبالارىنىڭ ناتيجەلەرى قارالدى. جيىن بارىسىندا جاۋاپتى باسقارمالار اتقارىلعان جۇمىستار تۋرالى ەسەپ بەرىپ، نەگىزگى كورسەتكىشتەرگە توقتالدى. 2023–2025 جىلدارى قالا جول جەلىسىن جاڭعىرتۋعا باعىتتالعان كەشەندى جۇمىستار جۇرگىزىلدى. ماگيسترالدىق، راديالدى جانە ىشكى كوشەلەردى سالۋ مەن قايتا جاڭارتۋ ناتيجەسىندە جولداردىڭ جاقسى جانە قاناعاتتانارلىق جاعدايداعى ۇلەسى 95 پايىزعا جەتتى. بۇل قالا ىشىندەگى كولىك قوزعالىسىنىڭ قاۋىپسىزدىگى مەن وتكىزۋ قابىلەتىن ارتتىرۋعا ىقپال ەتتى.
قوعامدىق كولىك جۇيەسىن دامىتۋ اياسىندا جاڭا باعىتتار ىسكە قوسىلىپ، قالا ماڭى مارشرۋتتارى كەڭەيتىلدى. ناتيجەسىندە قوعامدىق كولىكپەن جولاۋشىلار تاسىمالى تاۋلىگىنە 1،7 ميلليون ادامعا دەيىن ءوستى. قالانىڭ اۆتوبۋس پاركى گازبەن جۇرەتىن اۆتوبۋستارمەن، تروللەيبۋستارمەن جانە ەلەكتروبۋستارمەن جاڭارتىلىپ، ەكولوگيالىق تازا كولىك ۇلەسى ۇلعايدى. سونىمەن قاتار، ەلەكتر كولىگىن قولداۋ ماقساتىندا ەلەكتروموبيلدەرگە ارنالعان 531 زاريادتاۋ ستانسياسى پايدالانۋعا بەرىلدى. بۇل كورسەتكىش «AMANAT» پارتياسىنىڭ باعدارلامالىق مىندەتتەرى اياسىندا ەكولوگيالىق ينفراقۇرىلىمدى دامىتۋ جونىندەگى جوسپارلى تاپسىرمالاردىڭ مەرزىمىنەن بۇرىن ورىندالعانىن كورسەتتى.
جيىن قورىتىندىسىندا اتقارىلعان جۇمىستاردىڭ وڭ ناتيجەلەرى اتاپ ءوتىلىپ، الداعى كەزەڭدە قالالىق ينفراقۇرىلىمدى ودان ءارى دامىتۋ، كولىك قولجەتىمدىلىگىن ارتتىرۋ جانە تۇرعىندار ءۇشىن قولايلى قالالىق ورتا قالىپتاستىرۋ نەگىزگى باسىمدىقتار رەتىندە بەلگىلەندى.