الاياقتار قازاقستاندىق بلوگەردىڭ اتىنان جىلدام تابىس تابۋدى ۇسىنادى

Telegram مەسسەندجەرىندە قازاقستاندىق بلوگەر سەكانىڭ جالعان اككاۋنتى پايدا بولدى، دەپ حابارلايدى Almaty-akshamy.kz.

كيبەرقىلمىسكەرلەر ونىڭ اتىنان پايدالانۋشىلارعا ۇتىستى الۋ ءۇشىن كەم دەگەندە 100$ ينۆەستيسيا سالۋدى ۇسىنادى. Stopfake.kz بۇل الاياقتىق سحەما دەپ ەسكەرتەدى.  

سەكا – سەرعازى توقتاربەكتىڭ قىسقارتىلعان اتى. تانىمال بلوگەردىڭ YouTube-تە اۆتورلىق ارناسى جانە Instagram الەۋمەتتىك جەلىسىندە اككاۋنتى بار.

سەرعازى توقتاربەكتىڭ اتىنان جىلدام تابىس تابۋ تۋرالى فەيك روليكتەر قازنەتتە ءبىر جىلدان استام ۋاقىتتان بەرى تارالۋدا. ءبىزدىڭ سايت الاياقتاردىڭ ۆيدەونى ديپفەيك تەحنولوگياسىن قولدانا وتىرىپ جاساعانى تۋرالى جازعان بولاتىن.

ۆاينەردىڭ ءوزى دە رەسمي پاراقشالارىندا جىلدام اقشا تابۋ تۋرالى جالعان حابارلامالاردى بىرنەشە رەت جوققا شىعارعان.

«مەنىڭ قاتىسۋىممەن فەيك اككاۋنتتاردا ۇسىنىلعان كەز كەلگەن اقپارات – الاياقتاردىڭ ءىسى. سىزدەرگە بەرىلگەن ۋادە – ۋادە بولىپ قالادى. اقشا جىبەرمەڭىزدەر. اقشا تابۋ وڭاي ەمەس. شىنايى اقپارات، بەلگىسى بار وسى پاراقشادا عانا (@sekavines) – دەدى سەكا جازىلۋشىلارىنا ارناپ جازعان ستوريزدەرىنىڭ  بىرىندە.

دەمەك، بەلگىلى ادامداردىڭ رەسمي پاراقشالارىندا جاريالانعان اقپاراتقا عانا سەنۋگە بولادى. سەكانىڭ Telegram قوسىمشاسىنداعى رەسمي ارناسى: @sekavines. وزدەرىن تانىمال بلوگەر دەپ تانىستىرعان ادامدارعا اقشا جىبەرمەڭىزدەر.