پارلامەنت ءماجىلىسىنىڭ دەپۋتاتى ايدوس سارىم كونستيتۋسيالىق رەفورما اياسىندا ۇسىنىلعان تۇزەتۋلەرگە قاتىستى ءوز ۇستانىمىن ءبىلدىردى. بۇگىن استانادا ءوتىپ جاتقان كونستيتۋسيالىق رەفورما جونىندەگى كوميسسيانىڭ ءۇشىنشى وتىرىسىندا كوميسسيا مۇشەسى ءوز ۇستانىمى مەن ءۋاجىن جەتكىزدى.
ايدوس سارىم جاڭا پارلامەنت – قۇرىلتايدىڭ قىزمەتىنە قاتىستى 50، 51 جانە 53-باپتارعا ەرەكشە نازار اۋداردى.
سونداي-اق ول بارلىق ۇسىنىستار مەملەكەت باسشىسىنىڭ قىزىلوردا قالاسىندا وتكەن ۇلتتىق قۇرىلتايدىڭ V وتىرىسىندا بەرگەن تاپسىرمالارىن ەسكەرە وتىرىپ ازىرلەنگەنىن اتاپ ءوتتى.
«ۇسىنىلىپ وتىرعانداي، بولاشاق قۇرىلتاي پروپورسيونالدى وكىلدىك جۇيەسى بويىنشا سايلاناتىن 145 دەپۋتاتتان تۇرادى. قۇرىلتاي دەپۋتاتتارىنىڭ وكىلەتتىك مەرزىمىن قازىرگى ماجىلىسپەن بىردەي – بەس جىل دەڭگەيىندە ساقتاۋ ۇسىنىلىپ وتىر. بۇل وزگەرىس تولىق قولداۋ تابادى. سونىمەن قاتار، قۇرىلتاي دەپۋتاتتىعىنا كانديداتتارعا قويىلاتىن قوسىمشا تالاپتار ارنايى كونستيتۋسيالىق زاڭداردا كوزدەلۋى مۇمكىن»، – دەدى ايدوس سارىم.
ونىڭ ايتۋىنشا، بولاشاق قۇرىلتايدىڭ جۇمىسىنا قاتىستى ەڭ مازمۇندى ءارى تۇجىرىمدامالىق وزگەرىستەر 53-باپتا قامتىلعان. بۇل وزگەرىستەر ەلىمىزدەگى مەملەكەتتىك باسقارۋ قۇرىلىمى مەن جۇيەسىن ەلەۋلى تۇردە وزگەرتىپ، تۇراقتاندىرۋعا، بيلىك تارماقتارى اراسىنداعى قاجەتتى تەپە-تەڭدىكتى قامتاماسىز ەتۋگە، سونداي-اق وكىلدى، اتقارۋشى جانە سوت بيلىگى اراسىنداعى تەجەمەلىك ءارى تەپە-تەڭدىك قاعيداتتارىن جۇزەگە اسىرۋعا باعىتتالعان.
«قازاقستان رەسپۋبليكاسىنىڭ قولدانىستاعى كونستيتۋسياسىندا پارلامەنت پالاتالارىنىڭ فۋنكسيالارىن ناقتى سيپاتتايتىن 53-باپ 13 تارماقتان تۇرعان بولاتىن. ال سالىستىرمالى كەستەدە ۇسىنىلعان جاڭا رەداكسيادا، 23 تارماق بار ەكەنىنە نازارلارىڭىزدى اۋدارعىم كەلەدى. ياعني، وكىلەتتىكتەر كولەمى ءبىر جارىم ەسەدەن استام ارتادى. بۇل جاڭا وكىلەتتىكتەردىڭ بارلىعى جالپىۇلتتىق رەفەرەندۋمدا ماقۇلدانعان جاعدايدا ءتيىستى كونستيتۋسيالىق زاڭدار اياسىندا ناقتىلانىپ، جۇزەگە اسىرىلاتىن بولادى. اتالعان وزگەرىستەر ءتۇرلى قوعامدىق الاڭداردا بىرنەشە رەت ايتىلىپ، جۇمىس توبىنىڭ وتىرىستارىندا جان-جاقتى تالقىلاندى جانە قىزىلوردا قالاسىندا وتكەن ۇلتتىق قۇرىلتايدا مەملەكەت باسشىسىنىڭ تاراپىنان تۇجىرىمدامالىق تۇرعىدا قولداۋ تاپتى. سوندىقتان بۇل تۇجىرىمدامالىق وزگەرىستەردى ءبىز قولدايمىز»، – دەپ مالىمدەدى ايدوس سارىم.