ۇلتتىق قۇرىلتاي اياسىندا ق ر عىلىم جانە جوعارى ءبىلىم ءمينيسترى ساياسات نۇربەك قورقىت اتا اتىنداعى قىزىلوردا ۋنيۆەرسيتەتىنىڭ پروفەسسور-وقىتۋشىلار قۇرامى جانە ءبىلىم الۋشىلارىمەن كەزدەستى.
جيىنعا سونداي-اق ۆيسە-مينيستر گۇلزات كوبەنوۆا جانە ءبىرقاتار جوعارى وقۋ ورىندارىنىڭ رەكتورلارى قاتىستى، - دەپ حابارلايدى Aqshamnews.kz.
الدىمەن مينيستر ۋنيۆەرسيتەتتىڭ جۋىردا قولدانىسقا بەرىلگەن جاڭا زاماناۋي كىتاپحاناسىمەن تانىستى. كەزدەسۋ بارىسىندا ساياسات نۇربەك عىلىم مەن جوعارى ءبىلىمنىڭ دامۋ باعىتتارى، ينفراقۇرىلىمدى جەتىلدىرۋ، جاساندى ينتەللەكت سالاسىنداعى جاڭاشىلدىقتار مەن العا قويىلعان ماقساتتار جايلى كەڭىنەن توقتالدى.
ءمينيستردىڭ ايتۋىنشا، ەلىمىزدە كەڭەيتىلگەن جاساندى ينتەللەكت باعىتىن وقىتۋدىڭ ەكىنشى كەزەڭى باستالىپ، 100 مىڭ ستۋدەنتتى قامتۋ جوسپارلانىپ وتىر. سونىمەن قاتار بۇل باعىتتا تەك ستۋدەنتتەر عانا ەمەس، پروفەسسور-وقىتۋشىلار قۇرامىنىڭ دا ءبىلىمىن جەتىلدىرۋ ماڭىزدى ەكەنىن اتاپ ءوتتى. وسى ماقساتتا وقىتۋشىلارعا ارنالعان ارنايى وقۋ سەمينارلارى مەن باعدارلامالار ۇيىمداستىرىلاتىنىن ايتتى.
«باعدارلامانى ودان ءارى ىسكە اسىرۋ ءۇشىن ەلىمىزدىڭ ءار وڭىرىنەن 27 جوعارى وقۋ ورنى بەكىتىلدى. وقۋ ورىندارى باعدارلامانى ىسكە اسىرۋ ءۇشىن قاجەتتى ينفراقۇرىلىم، ونىڭ ىشىندە جي سالاسىنداعى ءبىلىم بەرۋ باعدارلامالارىنىڭ، شەتەلدىك سەرىكتەستەردىڭ، ەسەپتەۋ قۋاتتارىنىڭ بولۋى سياقتى كريتەرييلەر بويىنشا ىرىكتەلدى. بۇل جوو-لار AI-Sana باعدارلاماسى بويىنشا ستۋدەنتتەر مەن پەداگوگيكالىق وقىتۋشى قۇرامىن وقىتۋدى قامتاماسىز ەتە وتىرىپ، ءوز وڭىرىندەگى جانە كورشىلەس وبلىستارداعى جوبانى ىسكە اسىرۋعا جاۋاپتى بولادى»، – دەدى مينيستر.
جيىندا سونىمەن قاتار جوعارى وقۋ ورىندارى اراسىنداعى سەرىكتەستىكتى نىعايتۋ، شەتەلدىك فيليالداردى دامىتۋ جانە زاماناۋي زەرتتەۋ ينفراقۇرىلىمىن قالىپتاستىرۋدىڭ ماڭىزى جونىندە كەڭىنەن تالقىلاندى. مينيستر بۇل قادامدار ەلىمىزدىڭ ءبىلىم بەرۋ جۇيەسىن حالىقارالىق دەڭگەيگە كوتەرۋگە باعىتتالعانىن اتاپ ءوتتى.
جۇمىس ساپارى اياسىندا ساياسات نۇربەك ۋنيۆەرسيتەتتىڭ 5 وقۋ عيماراتىندا ورنالاسقان جاساندى ينتەللەكت ينستيتۋتىنا بارىپ، SeoulTech-پەن بىرلەسىپ ىسكە اسىرىلىپ جاتقان IT جانە جاساندى ينتەللەكت باعىتىنداعى باعدارلامالىق جوبالارمەن تانىستى.
مينيستر ستۋدەنتتەرمەن ءبىلىم مەن عىلىم سالاسىنداعى وزەكتى ماسەلەلەردى تالقىلاپ، ءوزارا پىكىر الماسىپ، ىزدەنۋشىلەرگە باعىت-باعدار بەردى.