الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا احمەت جۇبانوۆ اتىنداعى دارىندى بالالارعا ارنالعان رەسپۋبليكالىق مامانداندىرىلعان قازاق مۋزىكالىق مەكتەپ-ينتەرناتىنىڭ 60 جىلدىعىنا ارنالعان بريفينگ ءوتتى، دەپ حابارلايدى aqshamnews.kz
مەرەيتويعا وراي سالتاناتتى گالا-كونسەرت 2 جەلتوقساندا الماتى تەاتر سارايىندا وتەدى. قوناقتار قاتارىندا مادەنيەت جانە اقپارات ءمينيسترى ايدا بالايەۆا، قازاقستاننىڭ بەلگىلى ونەر قايراتكەرلەرى مەن قوعامدىق كوشباسشىلارى قاتىسادى دەپ كۇتىلۋدە. كەشتىڭ باستى قاتىسۋشىلارى - مەكتەپتىڭ تالانتتى وقۋشىلارى بولماق، ولاردىڭ قويىلىمدارى كورەرمەندەرگە جارقىن ەموسيالار سىيلايتىنى ءسوزسىز.
«1964 جىلى كورنەكتى كومپوزيتور احمەت جۇبانوۆتىڭ باستاماسىمەن قۇرىلعان مەكتەپ اۋىلدىق جەرلەردەگى دارىندى بالالارعا ەۋروپالىق جانە الەمدىك مۋزىكا ونەرىمەن تانىسۋعا مۇمكىندىك بەرۋ ماقساتىندا ەسىگىن ايقارا اشتى»، – دەدى مەكتەپ ديرەكتورى، قازاقستان رەسپۋبليكاسىنىڭ ەڭبەك سىڭىرگەن قايراتكەرى نۇركەن ءاشىروۆ.
ارتتا قالعان التى ونجىلدىقتا مەكتەپتەن 1000-نان استام مۋزىكانت تۇلەپ ءۇشتى، ولاردىڭ كوپشىلىگى الەمدىك ساحنالاردا تانىمادىلىققا يە بولدى. ا.رايىمقۇلوۆا، ب. دەمەۋوۆ، ت. زابيروۆا، ا. ەڭگەپوۆ سياقتى مەكتەپ تۇلەكتەرى قازاقستاندى حالىقارالىق ارەنادا تانىستىرىپ قانا قويماي، ۇلتتىق مادەنيەتتىڭ دامۋىنا دا ۇلەس قوسۋدا.
بۇگىنگى تاڭدا مەكتەپ بەدەلدى حالىقارالىق بايقاۋلاردا تابىستى ونەر كورسەتەتىن جاس تالانتتاردى تاربيەلەۋدى جالعاستىرۋدا. ونىڭ وقۋشىلارى شەتەلدىك مامانداردان جوعارى باعا الىپ ءجۇر جانە مەكتەپتىڭ ايماقتاعى جەتەكشى مۋزىكالىق مەكەمەلەردىڭ ءبىرى رەتىندەگى مارتەبەسىن راستاپ كەلەدى.
ۇيىمداستىرۋشىلار مەرەيتويلىق كونسەرتتى جازىپ الىپ، ونى قازاقستاننىڭ مادەنيەت تاريحىندا ساقتاپ قالۋ ءۇشىن ەفيردە كورسەتۋدى جوسپارلاپ وتىرعاندارىن اتاپ ءوتتى.