ەڭبەك جانە حالىقتى الەۋمەتتىك قورعاۋ مينيسترلىگى ەڭ جوعارى جالاقى تولەنەتىن جانە ەڭ كوپ سۇرانىسقا يە ماماندىقتار تۋرالى دەرەكتەردى جاريالادى، - دەپ حابارلايدى aqshamnews.kz ءتىلشىسى.
2025 جىلعى قازاندا Enbek.kz ەلەكترون ەڭبەك بيرجاسىندا جۇمىس بەرۋشىلەر تاراپىنان 132 مىڭ بوس جۇمىس ورنى مەن 114،1 مىڭ تۇيىندەمە جاريالانعان.
جۇمىس بەرۋشىلەر ۇسىنعان ەڭ جوعارى ەڭبەكاقى دەڭگەيلەرى:
- ءوندىرىس باستىعىنىڭ ورىنباسارى (~1 ميلليون تەڭگە)،
- كومپيۋتەرلىك ويىندار ديزاينەرى (~990 مىڭ تەڭگە)
- ومبۋدسمەن (~990 مىڭ تەڭگە) لاۋازىمدارى بويىنشا تىركەلگەن.
"ال ەڭ جوعارى ەڭبەكاقى سۇراعاندار: كوممەرسيالىق اۋە لاينەرىنىڭ ۇشقىشى (~2،8 ميلليون تەڭگە)، ءورتتىڭ الدىن الۋ جانە ءسوندىرۋ جونىندەگى كەنشى (~2 ميلليون تەڭگە) جانە باسقارما ءتوراعاسىنىڭ ورىنباسارى (~1،8 ميلليون تەڭگە). ۇسىنىلعان جانە كۇتىلەتىن ەڭبەكاقى دەڭگەيلەرى اراسىنداعى الشاقتىق ءالى دە ساقتالعان، اسىرەسە باسقارۋشىلىق جانە تەحنيكالىق سەگمەنتتەردە"، - دەلىنگەن حابارلامادا.
بوس جۇمىس ورىندارىنىڭ سانى بويىنشا ءبىلىم بەرۋ سالاسى كوش باستاپ تۇر – 41،1 مىڭ (31 پايىز)، ودان كەيىن ءارتۇرلى قىزمەت كورسەتۋ تۇرلەرى – 17،5 مىڭ (13 پايىز) جانە دەنساۋلىق ساقتاۋ مەن حالىقتى الەۋمەتتىك قورعاۋ سالاسى – 11،7 مىڭ (9 پايىز). بۇل سالالار جيىنتىق تۇردە بارلىق بوس ورىنداردىڭ شامامەن جارتىسىن قۇراپ، الەۋمەتتىك سەكتوردىڭ جۇمىسپەن قامتۋدى قامتاماسىز ەتۋدەگى ماڭىزدى ءرولىن ايقىندايدى.
قازاندا ەڭ كوپ سۇرانىسقا يە ماماندىقتاردىڭ قاتارىندا جوعارى بىلىكتىلىك تالاپ ەتەتىن قىزمەتتەر:
- تاربيەشىلەر (1،8 مىڭ بوس ورىن)،
- بۋحگالتەرلەر (1،1 مىڭ)
- ماتەماتيكا مۇعالىمدەرى (1 مىڭ) باسىم بولعان.
قازاندا جۇمىس بەرۋشىلەر كوبىنە ورتا دەڭگەيلى بىلىكتىلىككە يە مامانداردى ىزدەدى – 64،4 مىڭ بوس ورىن. بۇدان ءسال از – جوعارى بىلىكتى (34،7 مىڭ) جانە بىلىكتىلىگى جوق (32،9 مىڭ) ماماندارعا ارنالعان ورىندار بولعان.
"ەڭ كوپ بوس جۇمىس ورىندارى تۇركىستان وبلىسىندا (12 مىڭ)، استانادا (11،4 مىڭ) جانە جامبىل وبلىسىندا (8،8 مىڭ) جاريالانعان. ال تۇيىندەمەلەر سانى بويىنشا كوشباسشىلار قاتارىندا تۇركىستان وبلىسى (13،4 مىڭ)، استانا (9،1 مىڭ) جانە قىزىلوردا وبلىسى (8،3 مىڭ) تۇر"، - دەلىنگەن حابارلامادا.
جاس قۇرىلىمى تۇرعىسىنان بارلىق تۇيىندەمەنىڭ جارتىسىنا جۋىعى (51،4 مىڭ نەمەسە 45 پايىزى) 34 جاسقا دەيىنگى ازاماتتار تاراپىنان ورنالاستىرىلعان. 35–44 جاس ارالىعىنداعى ىزدەنۋشىلەر 26 پايىز (29،2 مىڭ)، 45–54 جاس ارالىعىنداعى توپ 19 پايىز (21،8 مىڭ)، ال 55 جاستان اسقاندار 10 پايىز (11،7 مىڭ) بولادى. ايەلدەر ءداستۇرلى تۇردە بەلسەندىرەك بولىپ قالا بەرەدى – ولاردىڭ ۇلەسىنە بارلىق تۇيىندەمەلەردىڭ 52 پايىزى تيەسىلى.